Klei Aê Diê Blŭ: Klei Mtô Mñă Klei Bhiăn 15:12-18
Êlan kliăng: “Kâo brei klei mtă mrâo kơ diih: brei diih bi khăp hdơ̆ng diih pô; msĕ si kâo khăp leh kơ diih, brei diih bi khăp hdơ̆ng diih pô msĕ mơh. Hŏng klei anei jih jang mnuih srăng thâo kơ diih jing phung ƀĭng kna kâo, tơdah diih bi khăp hdơ̆ng diih pô.” (Y-Yôhan 13:34-35).
Klei êmuh ksiêm mĭn: Hbĭl phung Israel phưi brei klei êngiê kơ phung hlŭn diñu? Ya klei Aê Diê čuăn kơ khua sang brei ngă hŏng hlŭn ñu hlăk bi êngiê digơ̆? Ya klei yuôm klei bhiăn anei kơ phung ƀuôn sang Aê Diê? Si drei mă yua klei hriăm anei?
Hlăm găp djuê phung Israel, mâo lu mnuih kyua klei hdĭp dleh knap đei snăn digơ̆ nao mă bruă kơ gŏ sang mâo klei đĭ kyar hĭn. Aê Diê čuăn kơ digơ̆ mă bruă hlăm năm thŭn, truh thŭn tal kjuh khua sang srăng bi êngiê brei digơ̆ wĭt. Kdlưn hĭn mơh, hlăk phung hlŭn mdei mjưh mă bruă, êlâo kơ digơ̆ wĭt, khua sang srăng brei mnơ̆ng mâo ênoh yuôm kơ digơ̆. Dôk mĭn lăng, tơdah hlŭn mdei bruă ƀiădah amâo brei ôh mnơ̆ng năng pioh kơ digơ̆ hdĭp hlăm hruê ti anăp, snăn amâo sui ôh digơ̆ srăng lŏ đuôm nư mrâo leh anăn lŏ wĭt dơ̆ng jing hlŭn mơh. Aê Diê čuăn msĕ snăn kyuadah Ñu amâo čiăng ôh mâo mnuih kyua kbiă hriê mơ̆ng klei hdĭp ƀun ƀin tơl jih klei hdĭp knŏng jing sa čô ngă hlŭn, dlăng msĕ si dhut digơ̆, knŏng tơdah digơ̆ pô ruah klei hdĭp msĕ snăn (êlan 16). Tơdah snăn, phung hlŭn anei amâo srăng ƀuh ôh klei Aê Diê pap kơ diñu.
Kdlưn hĭn kơ pô mkăn, phung ƀuôn sang Aê Diê brei jing mnuih thâo săng brei kơ klei hdĭp phung ngă hlŭn, kyuadah phung aê đưm diñu tuôm jing hlŭn kơ phung Êjip leh. Kyuanăn, Aê Diê yua klei bhiăn anei êlâo hĭn čiăng mñă kơ phung ƀuôn sang Aê Diê, Ñu yơh jing Pô tuôm bi mtlaih leh diñu mơ̆ng klei jing hlŭn čiăng mjing diñu phung ƀuôn sang doh jăk, snăn phung ƀuôn sang Aê Diê brei bi êngiê phung ayŏng adei mă bruă leh kơ diñu hlăm năm thŭn.
Hlăm ênuk anei dlăng ti êngao amâo lŏ ƀuh ôh klei yap tal mnuih ngă hlŭn, ƀiădah ăt adôk lu klei ktư̆ juă ai mă bruă hŏng lu mta êlan mdê mdê. Yua mnuih mă bruă êgao hnơ̆ng čiăng ba wĭt mnga kơ khua ƀiădah prăk mlan tla amâo năng ôh hŏng ai digơ̆ tuh leh. Kyua klei hdĭp dleh dlan snăn yơh digơ̆ gĭr tŭ klei arăng ktư̆ juă anăn, ƀrư̆ hruê boh kbưi klei ƀun leh anăn mdrŏng prŏng hĭn êjai. Aê Diê čiăng kơ phung anak ƀuôn sang Ñu hdĭp bi êdah klei thâo bi khăp, tla prăk kơ pô mă bruă năng hŏng ai digơ̆ tuh leh, mơak brei mnơ̆ng kơ digơ̆ hŏng klei kmah msĕ si Khua Yang pô brei mnơ̆ng kơ drei êbeh dlai, čiăng kơ hŏng klei hdĭp anăn bi lar klei khăp kơ lu mnuih thâo kral Khua Yang jing Pô bŏ hŏng klei jăk leh anăn klei pap kơ klei hdĭp digơ̆.
Si Pô arăng ƀuh Khua Yang jing mơ̆ng klei hdĭp drei?
Wah lač: Ơ Khua Yang, jing Pô khăp leh anăn bi êdah klei jăk Ih kơ klei hdĭp kâo nanao. Akâo Ih đru kâo hdĭp thâo khăp tui si Klei Aê Diê Blŭ mtô čiăng mâo kdrêč đru bi hrŏ klei amâo mtăp mđơr, klei ktư̆ juă dôk lar hlăm ƀuôn sang.
Dlăng Klei Aê Diê Blŭ hlăm tlâo thŭn: Klei Mmuñ Hđăp 119:137-176; 120:1-7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
