II Kevcai 15:12-18
Nqe cim:
“Nimno kuv yuav muab ib txoj kevcai tshiab rau nej: Nej ib leeg yuav tsum hlub ib leeg ib yam li kuv hlub nej. Nej ib leeg yuav tsum hlub ib leeg. Yog nej ib leeg hlub ib leeg, sawvdaws thiaj yuav paub hais tias nej yog kuv cov thwjtim.” (Yauhas 13:34-35).
Lus nug rau sawvdaws xav:
- Cov qhev uas yog neeg Yixalayees tau tso mus thaum twg?
- Vajtswv txojcai qhia kom tus tswv yuav tsum ua licas rau tus qhev thaum yuav tso lawv mus?
- Txoj kevcai no muaj lub ntsiab licas rau tus Tswv haivneeg?
- Peb ua raws zaj kawm no licas?
Nyob hauv cov Yixalayees, muaj ntau tug vim lubneej txomnyem thiaj mus ua qhev rau tej tsevneeg uas muaj dua lawv. Vajtswv qhia kom cov neeg no tsuas ua haujlwm rau lub xyoo xwb, txog xyoo tim xya tus tswv yuav tsum tso lawv mus. Tsis tas li ntawd xwb, thaum tus qhev yuav tawm mus, tus tswv yuav tsum muab ib yam khoom muaj nqis pub rau tus qhev. Muab los xav, tus qhev tso haujlwm tseg lawm, yog tsis muaj kev pab rau nws lubneej tomntej, ces tsis ntev thiab xwb nws yuav raug rov mus qiv txais, yuav rov ua nuj ua nqi, thaum kawg nws yuav raug mus ua qhev ib ntus dua. Vajtswv muab txojcai li ntawd, vim Nws tsis xav kom cov uas yug los tau lubneej txomnyem raug mus ua qhev tas simneej, tshwj qhov uas lawv xav ua qhev li ntawd (nqe 16). Yog tseem ua li ntawd, cov raug ua qhev yuav tsis pom txog tus Tswv txojkev hlub pub rau lawv.
Tshaj lwm tus, tus Tswv haivneeg haj yam yuav tsum totaub cov uas raug ua qhev, vim lawv tej yawg koob tau ua qhev hauv tebchaws Iziv los lawm. Yog li ntawd, tus Tswv xav siv txojcai no los ua kev qhuab ntuas Nws haivneeg hais tias, Nws tau cawm lawv dim ntawm cev qhev, los ua ib haivneeg ywjpheej lawm, yog li ntawd tus Tswv haivneeg yuav tsum tso cov kwvtij uas ua lawv qhev rau lub xyoo lawm dim mus.
Nyob rau tiam niaj hnub nimno, txawm yog tsis muaj kev ua cev qhev lawm, los tseem muaj ntau yam kev qhuab yuam ua haujlwm sib txawv. Cov mus ua haujlwm nrhiav nyiaj raug ua tshaj lub zog kom tus tswv tau nyiaj ntau, tiamsis tej nqi zog lawv tau tsis phim lub zog lawv poob. Vim lubneej txomnyem, lawv thiaj tiv tej kev qhuab yuam li ntawd, ua rau cov muaj yim muaj, cov pluag yim pluag. Vajtswv xav kom Nws cov menyuam ua lubneej qhia tshwm txojkev hlub, txaus siab muab tej nqi kom phim lub zog rau tus tuaj ua zog, ua yam zoo rau lawv ib yam li tus Tswv tau ua zoo rau yus; kom dhau lubneej ntawd, nthuav tawm rau lwm tus paub hais tias tus Tswv yog Tus uas zoo thiab Nws hlub lawv txhua tus.
Lwm tus saib pom Tswv Yexus yog tus zoo licas dhau ntawm peb lubneej?
Tus Tswv, Koj yog tus hlub thiab ua zoo rau nyuam yaus. Thov pab nyuam yaus ua tau lubneej sib hlub li Koj Txojlus qhia, koom tes rhuav tshem tej kev tsis ncaj ncees povtseg. Amees.
Nyeem Vajluskub hauv peb lub xyoos: Phau Ntawv Nkauj 119:137-120:7
Kênh Youtube BHKTHN:
