Klei Aê Diê Blŭ: Y-Mathiơ 26:30-35
Êlan kliăng: “Snăn hlei pô mĭn ñu dôk dơ̆ng, brei ñu răng huĭdah ñu srăng lĕ buh” (I Kôrantô 10:12)
Klei êmuh ksiêm mĭn: Ya klei yuôm Khua Yang Yêsu hưn kơ phung ƀĭng kna Ñu? Si Khua ƀĭng kna Y-Pêtrôs leh anăn phung ƀĭng kna mkăn bi êdah klei diñu đăo đei kơ klei diñu dưi ngă? Klei Khua ƀĭng kna Y-Pêtrôs lĕ brei ya klei hriăm kơ drei pô?
Leh mmuñ sa Klei Mmuñ Hđăp bi ruĕ Knăm Klei Găn, Khua Yang Yêsu kbiă nao kơ čư̆ Ôliwơ mbĭt hŏng phung pluh sa čô khua ƀĭng kna. Ktuê êlan êbat, Khua Yang Yêsu hưn sa klei yuôm bhăn snăk kơ digơ̆: “Mlam anei jih jang diih srăng êran đuĕ lui Kâo” (êlan 31). Boh blŭ “êran đuĕ” čiăng lač kơ klei jih jang phung ƀĭng kna srăng tuôm hŏng klei lông dlăng kơ klei đăo prŏng snăk leh anăn jih jang digơ̆ srăng lĕ sơăi hlăm klei đăo kyua Khua Yang. Anei jing sa klei hưn êlâo brei răng ktang snăk ƀiădah Khua ƀĭng kna Y-Pêtrôs ka ƀuh mơh boh kjham klei srăng truh, kyuanăn ñu jhŏng blŭ hŏng klei mgao tơdah lač kơ ñu pô jing kdlưn hĭn kơ phung mkăn: “Wăt tơdah jih jang srăng êran đuĕ lui Ih, kâo amâo srăng lui Ih ôh” (êlan 33). Khua Yang Yêsu hưn kơ ñu thâo klă snei: “Sĭt nik Kâo lač kơ ih, mlam anei yơh, êlâo kơ mnŭ knô kdjô̆ ih srăng hngah kơ Kâo tlâo blư̆” (êlan 34). Ƀiădah Y-Pêtrôs pô leh anăn jih jang phung ƀĭng kna mkăn ăt lač kơ diñu srăng dôk sĭt suôr hŏng Khua Yang msĕ sơăi (êlan 35).
Khua Yang Yêsu thâo êlâo leh klei dleh dlan srăng truh kơ phung ƀĭng kna tơdah arăng mă leh anăn bi mdjiê Ñu, Ñu thâo anăn jing klei digơ̆ ka tuôm bi tlă anăp ôh hlăm ênuk digơ̆ tui hlue Ñu. Hrô kơ klei thâo kral klei awăt pô akâo kơ Khua Yang ktrâo brei êlan srăng dưi, Khua ƀĭng kna Y-Pêtrôs leh anăn jih jang phung ƀĭng kna mkăn ăt đăo kơ diñu pô dôk kjăp. Hlăm mlam anăn mtam, jih jang diñu lĕ sơăi! Jih jang phung khua ƀĭng kna êran đuĕ, bi Khua ƀĭng kna Y-Pêtrôs lĕ hngah kơ Khua Yang.
Mơ̆ng klei Khua ƀĭng kna Y-Pêtrôs đăo đei kơ ñu srăng dôk kjăp atăt truh kơ klei lĕ, drei ƀuh rup drei pô hlăm anăn. Wăt tơdah drei mă tŭ nanao klei Khua Yang hưn êlâo brei răng, tăp năng mơ̆ng trăn Klei Aê Diê Blŭ drei dôk dlăng, dôk hmư̆, amâodah mơ̆ng klei knap mñai Khua Yang brei truh…čiăng kơ drei tĭng ksiêm sĭt hŏng klei đăo, ƀiădah drei ăt khăng knang kơ klei drei pô tuôm găn leh amâodah knang kơ klei drei dưi ngă leh hlăm wưng leh êgao, brei drei đăo đei kơ klei dưi drei pô leh anăn amâo lŏ mđing ôh kơ klei bi hriăm mơ̆ng Khua Yang. Thâodah Khua Yang jao kơ drei djă sa mta bruă kyuanăn drei knang kơ drei pô amâo lŏ knang kơ Khua Yang ôh, kyuanăn yơh ênưih snăk drei lĕ hlăm klei đăo leh anăn ngă soh. Khua Yang tuôm mtă leh kơ Khua ƀĭng kna Y-Pêtrôs brei răng snei: “Ơ Y-Simôn, Y-Simôn, nĕ anei Satan akâo leh klei dưi čiăng hdei diih msĕ si mdiê ƀlê” (Y-Luk 22:31). Anăn ăt jing klei mtă kơ grăp čô drei brei răng msĕ mơh čiăng kơ drei djă krơ̆ng ti Khua Yang tơl tuč êlan êbat hlăm klei hdĭp myang drei. “Kyuadah drei amâo bi kdơ̆ng hŏng kđeh leh anăn êrah ôh, ƀiădah hŏng phung khua kiă kriê, hŏng phung mâo klei dưi, hŏng phung khua mtao lăn ala ênuk mmăt anei, hŏng phung yang jhat ƀai dôk hlăm jih adiê” (Êphêsô 6:12). Akâo Khua Yang đru drei thâo răng đăm mĭn kơ drei dôk dơ̆ng ôh, huĭdah drei srăng lĕ buh!
Ya klei Khua Yang dôk mtă brei răng hlăm klei hdĭp myang drei?
Wah lač: Ơ Khua Yang Yêsu, đru kâo djăl mă tŭ klei Ih čiăng bi hriăm kâo, đru kâo thâo dôk hmư̆ hŏng klei luă gŭ, bi mlih hĕ čiăng tlaih mơ̆ng klei lĕ buh leh anăn ngă klei bi mơak kơ Khua Yang nanao. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Yôp 14
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
