Klei Aê Diê Blŭ: Y‑Mathiơ 10:1-4
Êlan kliăng: “Ñu ruah pluh dua čô pia digơ̆ khua ƀĭng kna brei dôk mbĭt hŏng Ñu čiăng tiŏ nao digơ̆ hiu mtô, leh anăn brei kơ digơ̆ klei dưi suôt phung yang jhat” (Y‑Markôs 3:14‑15).
Klei êmuh ksiêm mĭn: Dŭm čô Khua Yang Yêsu iêô phung ƀĭng kna nao hŏng Ñu? Ya ngă Khua Yang iêô diñu? Hruê anei, ya klei pap leh anăn bruă klam drei pô hŏng Khua Yang?
Mphŭn pŏk kdrêč 10, Khua ƀĭng kna Y‑Mathiơ brei drei ƀuh hdră Khua Yang Yêsu hmaĭ leh anăn kah mbha klei ktrŏ Ñu hŏng phung ƀĭng kna, Khua Yang čiăng phung ƀĭng kna Ñu ƀuh klei pap leh anăn bruă klam pô sĭt Aê Diê ruah jing phung ƀĭng kna.
Khua ƀĭng kna Y‑Mathiơ thâo mbruă lač kơ klei pap prŏng prĭn Khua Yang brei kơ êpul 12 čô khua ƀĭng kna: Klei pap tal sa jing Khua Yang Yêsu ruah diñu. Dlăng hlăm Y‑Luk 10:1, mâo kjuh pluh čô ƀĭng kna Khua Yang tiŏ nao mdua mdua, tinei Khua Yang iêô 12 čô nao hŏng Ñu. Amâo djŏ êpul 12 čô anei mâo klei yuôm bhăn hĭn kơ phung mkăn ôh ƀiădah anei jing klei pap Khua Yang brei kơ diñu. Klei pap tal dua jing Khua Yang iêô diñu jing “Khua ƀĭng kna”. Boh blŭ “ƀĭng kna” jing phung dôk tui hlue hriăm hŏng sa čô nai, boh blŭ “Khua ƀĭng kna” jing diñu mâo leh djăp klei dưi găl čiăng dưi tiŏ nao. Klei pap tal tlâo jing Khua Yang brei kơ diñu “…klei myang dưi suôt phung yang čhŏ, leh anăn dưi bi hlao djăp mta klei ruă duam”. Pluh dua čô khua ƀĭng kna anei Aê Diê brei klei myang yuôm bhăn čiăng kơ diñu dưi ngă ya klei Khua Yang Yêsu ngă leh, phung khua ƀĭng kna dưi bi mklă kơ klei tiŏ nao mơ̆ng adiê hlăm bruă mâo klei dưi suôt phung yang jhat leh anăn dưi mdrao hlao djăp klei ruă duam.
Snăn ya jing bruă klam phung khua ƀĭng kna? Y‑Markôs 3:14 brei thâo bruă klam diñu, “Ñu ruah pluh dua čô pia digơ̆ khua ƀĭng kna brei dôk mbĭt hŏng Ñu čiăng tiŏ nao digơ̆ hiu mtô”. Diñu mâo bruă klam bi mguôp hŏng Aê Diê čiăng mâo sa klei hdĭp mngăt suaih pral “…Kyuadah tơdah amâo mâo kâo, diih amâo dưi ngă sa klei ôh” (Y‑Yôhan 15:5). Diñu mâo bruă klam brei hiu hưn Klei Mrâo Mrang Jăk ba lu mnuih wĭt kơ Aê Diê, amâo huĭ hyưt ôh sĭt ngă bruă hiu hưn klei đăo kyua Khua Yang Yêsu brei leh kơ diñu djăp klei dưi.
Hlăm Sang Aê Diê ară anei, lu phung đăo ăt ka thâo săng jih klei pap leh anăn bruă klam pô. Lu mnuih ăt ka mơak hŏng bruă jing anak Aê Diê, ăt ngă ngơi mang hlăm klei mă bruă kơ Aê Diê, ăt dôk mdăp talăng Aê Diê brei kơ pô… Brei drei thâo ti krah anak mnuih, Khua Yang ruah leh drei êlâo, brei drei thâo kral Ñu, brei klei thâo kơ drei mơ̆ng Yang Mngăt Jăk čiăng drei dưi mă bruă mâo klei tŭ dưn. Anăn jing klei pap prŏng Aê Diê brei kơ drei, drei amâo dưi ngă ngơi mang ôh hŏng bruă Lăn Adiê. Grăp čô brei ƀuh bruă jing anak Aê Diê leh anăn dưi dôk ti anăp Ñu čiăng mă bruă jing sa klei pap prŏng Aê Diê brei kơ pô.
Drei bi leh leh dŭm bruă klam Aê Diê jao kơ pô mơ̆ ka?
Wah lač: Ơ Khua Yang, akâo kơ Ih đru kâo hdơr knga kơ Ih kyua Ih bi tui leh anăn bi mtlaih klei hdĭp kâo, akâo kơ Ih đru kâo mđĭ lar klei pap Ih brei čiăng mă bruă tŭ dưn kơ Ih, hlăm dŭm bruă kâo ngă Aê Diê srăng ba lu mnuih wĭt hŏng Ih.
Dlăng klei Aê Diê Blŭ hlăm tlâo thŭn: Klei Mmuñ Hđăp 25
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
