II Timôthê 1:13-18
“Ih athei pơm kiơ̆ dôm tơdrong ‘lơ̆ng inh bơtho ih păng ih kư̆ lui mă kơjăp băt ‘mêm mơnat kơ bôl buăl. Yêsu Krist gơh ăn kơ bơ̆n lui kơjăp păng ‘mêm mơnat kơ đe.” (II Timôthê 1:13)
Nơ̆r jet tơchĕng pơwao:
– “Trŏ ‘blep ‘lơ̆ng đơ̆ng lu tơdrong bơtho gơh đei yua” păng “tơdrong pơjao ăn ‘lơ̆ng” noh kiơ?
– Trong 15-18, jô̆ anăn ‘bar khul bơngai phara băl. ‘Noh ‘bar khul ayơ?
– Lăng ming trong năm kiơ̆ Kră Yang, lu bơ̆n ‘bôh bơ̆n kơdih oei lăm lăm khul ayơ lăm tơdrong arih hăm bơngai nai?
Tơdah đei ‘bar nơ̆r wă kơ pơpôi pơtôm lăm chăl 1 lăm hla ar II Timôthê, na ‘noh jơ̆ nơ̆r “ athei chĭt ming tơdrong pŭn hiôk” păng “athei wei-lăng”. Tơdah “chĭt ming pŭn hiôk” sư ‘bơm nơ̆r krao pơtơm awih awăn, na “athei wei-lăng” sư ‘bơm hloi truh “trŏ ‘blep ‘lơ̆ng đơ̆ng nơ̆r bơtho đei yua” păng “pơjao ăn ‘lơ̆ng” (trong 13-14). Nơ̆r “‘lơ̆ng trŏ” wă khan “hla bơar lu bơngai jang man tơiung lu sư chhơ̆ lê̆ hơdrol” wă tơ’bôh tơdrong trŏ ‘lơ̆ng wă bơtho Bơngai lui lăm Hnam akŭm blŭng a, wă kơ đơ̆ng noh lu tơdrong lui păng nơ̆r bơtho wă kơjăp. Trŏ ‘lơ̆ng âu bơih bơngai oei tơdăm Timôthê âu đei kơtơ̆ng păng sơng iŏk đơ̆ng ‘Bok Pôl. Pơma pha ‘biơ̆, ‘noh bơih Tơdrong ‘Nao ‘Lơ̆ng đei bơtho ăn kơ Timôthê. Hăm tơdrong “‘lơ̆ng trŏ” păng pơjao ăn Tơdrong ‘Nao ‘Lơ̆ng âu, tơdrong lu bơ̆n athei “wei” (trong 13-14). Tơdah tơplih tơdrong ‘lơ̆ng trŏ ei lei lu bơ̆n ưh pă đei ‘long thưk wă pơtŏ ei wă kơ băt kơ trŏ dah glăi.” Wei-lăng” jơ̆ tơnăp tơpăt, tơnăp hăm Tơdrong ‘Nao ‘Lơ̆ng, hăm Nơ̆r Kră Yang. Hơnă wă kơ “wei-lăng” noh bơih “đon lui kơjăp păng ‘mêm mơnat lăm Kră Yang Yêsu Krist” (trong 13).
Trong 15-18 pơma gah tơdrong tơnăp tơpăt nai: tơnăp hăm đĭch đam lui kơjăp đơ̆ng Kră Yang. Nơ̆r “đei lơ tơdrong pơlung inh”, “đe chô̆ inh hăm glang” ăn kơ lu bơ̆n ‘bôh ‘nâu jơ̆ kơplah lăm chăl măng mu hăm ‘Bok Pôl. Minh lăm tơdrong mă sư tơ’bơ̆p tơdrong pơmat tat noh yua kơ “đĭ-đăng bơngai dêh Asi achăng lê̆ inh” (trong 15). Phigelus păng Hêmôgen đei tơ’bôh anăn hơđăl, rŏ lăng yua kơ bre sư ngăl juăt dêh, hơdai hăm sư, pơm kơ tơdrong ơh sơ’ngon đei achăng tŭk lê̆ rai juăt hăm sư hloh dơ̆ng. Mă khan lei ră, lăm tơdrong đei truh tăp dăr ei, ‘Bok Pôl ưh kơ lăng tơ dôm tơdrong tơpă trŏ kơ pơm kơ sư sơ’ngon, sư oei băt bơnê, sư oei hiôk lăp đon kơ lu bơngai oei dơ̆ng jê̆ hăm sư thoi kơ Ônêsip păng lu bơngai oei tơ Êphêsô (trong 18). Sư đei tơdrong pơlung tih lăm tơdrong tơnăp đơ̆ng lu sư.
Tơnăp hăm Nơ̆r Kră Yang ‘noh athei ‘măn hơdrol hloh lăm tôm tơdrong, mă khan lei ră, lu Bơngai Lui băt lui yom đêl hlôi kơbăt hơdôm chăl đei bơtho ưh kơ “achăng lê̆” lu ‘nhŏng oh oei lui kơjăp hăm Kră Yang, lu buăl juăt, lu bơngai chông anhăk tơdrong lui bơ̆n. Dang ei, tơdrong arih tơnăp ưh pă gan ‘bôh bơih. Lu bơ̆n ngăl juăt ‘măn lê̆ tơdrong kiơ mă đei lơi yua ăn kơ bơ̆n kơdih hloh kơ tơdrong tơnăp hăm đe nai. Lơ bơngai khan lăp tơdrong tơnăp hăm Kră Yang đĕch ưh kơ kăl kơ tơnăp tơduă kon bơngai. Mă-lei Kră Yang ưh kơ wă kơ lu bơ̆n tơnăp hăm Sư đĕch na achăng lê̆ lu buăl juăt hơdai, kon triu, bơngai bơtho tơdrong lui ăn kơdih đĕch mă ưh kơ đei tơdrong mă trŏ, mă loi sư kơplah tơ’bơ̆p tơdrong pơmat tat yua kơ KrăYang.
Ơ Kră Yang, apinh ăn tơdrong mơsêh đơ̆ng Yang Bơhngol ‘Lơ̆ng păng đon lui inh bơwei Tơdrong ‘Nao ‘Lơ̆ng mă inh đei sơng iŏk hăm đon lui păng tơdrong ‘mêm lăm Sư. Apinh tơgŭm inh wei-lăng, ưh kơ achăng lê̆ ding truh tơ năr tơ’bơ̆p Ih. Yua anăn Kră Yang Yêsu Krist, Amen.
Pơm thoi yơ lu bơ̆n oei bơwei, ưh kơ achăng lê̆ Tơdrong ‘Nao ‘Lơ̆ng mă bơ̆n đeí sơng iŏk?
Đŏk Sơ̆p Hla bơar ‘Bok Kei-Dei lăm pêng sơnăm: Jop 26
Kênh Youtube BHKTHN:
https://www.youtube.com/c/bhkthn
