Mathais 10:1-4
Nqe cim
“Nws xaiv tau kaum ob leeg, nws hu kaum ob leeg ntawd ua cov timthawj. Nws hais rau lawv hais tias, “Kuv xaiv nej los nrog kuv nyob. Kuv yuav txib nej mus qhia Txojmoo Zoo, thiab kuv yuav pub hwjchim rau nej kom nej ntiab tau dab” (Malakaus 3:14-15).
Lus nug rau sawvdaws xav:
- Tswv Yexus hu pes tsawg leej thwjtim los cuag Nws?
- Nws hu lawv los ua dabtsi?
- Niaj hnub nimno, peb xam pom peb tej koobhmoov thiab feemxyuam rau tus Tswv yog dabtsi?
Qhib thawj ntawm tshooj 10, Timthawj Mathais qhia rau peb pom txog qhov uas Tswv Yexus faib Nws lub nra rau cov thwjtim. Tus Tswv xav kom Nws cov thwjtim xam pom lawv tej koobhmoov thiab feemxyuam thaum lawv tau tus Tswv xaiv ua timthawj.
Timthawj Mathais tau ua tib zoo qhia txog tej koobhmoov zoo kawg nkaus uas tus Tswv pub rau 12 tug timthawj: Txoj koobhmoov xubthawj yog lawv tau Tswv Yexus xaiv. Saib mus rau Lukas 10:1, muaj xya caum leej thwjtim tau tus Tswv txib ua tsheej nkawm tawm mus, nyob hauv no tus Tswv hu 12 leej los cuag Nws. Tsis yog pab 12 leej no muaj yam tshwjxeeb dua lwm tus tiamsis qhov no yog koobhmoov uas tus Tswv pub rau lawv xwb. Txoj koobhmoov tim ob yog lawv tau tus Tswv muab hu ua “timthawj”. Lo lus “thwjtim” muaj lub ntsiab hais txog cov neeg uas tabtom kawm nrog lawv tus xibhwb, tiamsis lo lus “timthawj” muaj lub ntsiab hais tias lawv twb kawm tiav txhua yam thiab npaj txhij tau txib mus lawm. Txoj koobhmoov tim peb uas tus Tswv pub rau lawv yog “…muab hwjchim rau lawv ntiab tau dab thiab kho tau txhua yam mob huv tibsi”. Kaum ob tug timthawj no tau tus Tswv pub hwjchim ua tau tej txujci uas Tswv Yexus tau ua los lawm, cov timthawj tau nias cim tawm mus ua tes haujlwm qaum ntuj dhau los ntawm qhov uas lawv muaj hwjchim ntiab tau dab thiab kho tau txhua yam mob.
Yog li ntawd cov timthawj li feemxyuam yog dabtsi? Malakaus 3:14 hais txog lawv li feemxyuam, “Nws xaiv tau kaum ob leeg, nws hu kaum ob leeg ntawd ua cov timthawj. Nws hais rau lawv hais tias, “Kuv xaiv nej los nrog kuv nyob. Kuv yuav txib nej mus qhia Txojmoo Zoo”. Lawv muaj feemxyuam sib txuas nrog tus Tswv kom muaj zog sab ntsujplig, vim tus Tswv hais tias “…yog nej tsis txuas rau ntawm kuv, nej yeej ua tsis tau ib yam dabtsi li” (Yauhas 15:5). Lawv muaj feemxyuam tawm mus tshajtawm Txojmoo Zoo coj ntau tug los cuag tus Tswv, lawv tsis txhawj ntshai thaum ua tes haujlwm ntawd vim Tswv Yexus twb pub rau lawv muaj txaus hwjchim lawm.
Nyob hauv tus Tswv Pawg Ntseeg niaj hnub nimno, coob tug ntseeg tseem tsis tau totaub txog lawv tej koobhmoov thiab lawv li feemxyuam. Coob tug tseem tsis tau txaus siab rau qhov uas lawv yog tus Tswv cov menyuam, tseem tsis quavntsej ua tus Tswv haujlwm, tseem muab tej koobhmoov tus Tswv pub mus faus cia… Peb yuav tsum paub hais tias tus Tswv tau xaiv peb tawm hauv neeg ntiajteb los, pub rau peb paub Nws, pub rau peb tau koobhmoov los ntawm Vaj Ntsujplig kom xwv peb ua tau Nws tes haujlwm tawg paj txi txiv. Ntawd yog tej koobhmoov zoo kawg nkaus uas tus Tswv pub rau peb, peb tsis txhob ua txuj tsis pom Vajtswv tes haujlwm. Txhua tus yuav tsum pom qhov uas tau ua tus Tswv menyuam thiab tau ua Nws txoj haujlwm yog ib txoj koobhmoov loj kawg nkaus rau nyias tus kheej.
Peb puas tau ua tiav tej uas tus Tswv muab cob rau peb ua lawm tau?
Thov Vajtswv
Tus Tswv, thov pab nyuam yaus niaj hnub nco Koj txiaj ntsig vim Koj tau tuag txhiv thiab cawm nyuam yaus lubneej, thov pab nyuam yaus paub siv tej koobhmoov uas Koj pub los ua Koj teg haujlwm tawg paj txi txiv, kom dhau nyuam yaus tes haujlwm coj tau coob leej los cuag Koj. Amees.
Nyeem Vajluskub peb lub xyoos: Ntawv Nkauj 25
Tshooj Youtube BHKTHN: https://www.youtube.com/c/bhkthn
