Khiavdim 29:26-37
Nqe cim:
“Ua no kom txwm nkaus xya hnub. Lub thaj thiaj yuav dawbhuv, thiab txhua tus neeg lossis txhua yam uas mus chwv lub thaj, lub thaj yuav ua rau txhua tus neeg lossis tej khoom ntawd dawbhuv”(Khiavdim 29:37).
Lus nug rau sawvdaws xav:
- Tes haujlwm fij khoom theej txhoj, kabke tua tus tsiaj tsa cov povthawj qhia paub txog Vajtswv tus yamntxwv twg?
- Lub thaj dawbhuv muaj lub ntsiab licas nyob hauv rooj kevcai tsa povthawj?
- Zaj kawm hnub no muaj yam dab tsi ntsig txog peb cov ntseeg?
Ib tsoom cov mloog txhua tus,
Vajtswv yog tus Dawbhuv yog leejtwg mus cuag Vajtswv, tus ntawd yuav tsum dawbhuv. Vim tibneeg tsis muaj peevxwm ua tau kom yus dawbhuv, Vajtswv thiaj qhia tibneeg ua kevcai ntxuav kev txhaum los ntawm rooj kevcai fij khoom theej txhoj tiam Vajluskub Qub kom tau dawbhuv, thiab ntawd kuj yog tus duab qhia txog Tswv Yexus Khetos hauv tiam Vajluskub Tshiab, uas yog yam khoom fij zoo tshaj plaws Vajtswv twb npaj tseg lawm. Cov povthawj yuav tsum nyob hauv lub Tuamtsev ua kevcai fij khoom theej txhoj txwm nkaus xya hnub (nqe 36-37; Levis Kevcai 8:33). Qhov ntawd qhia txog tus Tswv ntaus nqi kev dawbhuv ntawm cov povthawj tseemceeb heev (Levis Kevcai 11:45).
Lub thaj yuav dawbhuv kawg nkaus tom qab xya hnub uas Aloos thiab nws cov tub tau los ua povthawj. Tus Tswv txaus siab thaum Nws haivneeg ua raws li Nws tej lus qhia tseg. Qhov uas Vajtswv nrog nraim lawv, ua rau lawv tej khoom fij, tej khoom noj thiab cov povthawj … puavleej dawbhuv. Qhov chaw twg muaj tus Tswv nyob, qhov chaw ntawd yuav dhau los ua chaw dawbhuv. Kuj ib yam li ntawd, nimno cov ntseeg tau hu ua cov neeg dawbhuv tsis yog vim peb dawbhuv dua lwm tus tiamsis vim yog peb twb los koom nrog Vajtswv Vaj Peb Leeg tus uas dawbhuv lawm. Vaj Leej Txiv xaiv peb thaum tsis tau tsim ntuj tsim teb (Efexus 1:4), Vaj Leej Tub muab Nws cov ntshav tsimtxiaj los cawm peb, thiab Vaj Ntsujplig tabtom nrog peb nyob, qhia peb, thiab ua kom peb dawbhuv txhua hnub.
Vajtswv yog kev hlub. Nws saib tus neeg uas ua Nws tes haujlwm tsimtxiaj thiab pub rau lawv muaj txhua yam txaus. Hauv ncua sijhawm xya hnub ua kevcai tsa povthawj, tus Tswv pub rau Mauxes thiab cov povthawj noj tej zaub mov uas twb muab tshwj dawbhuv tsis pub leejtwg kov. Lawv noj tus yaj uas tua fij sib raug zoo lub hauvnrob thiab cesqab. Cov nqaij ua hauv Chav Dawbhuv, noj nrog cov ncuav uas tseg rau hauv lub tawb ntawm lub Tsevntaub sib ntsib. Yog tej nqaij thiab tej ncuav seem txog tagkis sawv ntxov yuav tsum muab hlawv pov tseg (nqe 34), ua li ntawd cov povthawj thiaj muaj zaub mov tshiab noj txhua hnub. Ua tus Vajtswv tsaug vim Nws pub rau peb tau los ua “cov povthawj uas ua Vajtswv txoj haujlwm (I Petus 2:9). Tus Tswv coglus yuav pub rau peb muaj noj muaj haus txaus txhua hnub (Mathais 6:31-33). Yog li ntawd, cia li ua Nws tsaug thiab tswj tus kheej dawbhuv vim peb tus Tswv yog tus dawbhuv.
Thov Vajtswv,
Vajtswv Vaj Peb Leeg tus uas dawbhuv kawg nkaus! Thov Koj pab nyuam yaus paub muab txojkev thov Vajtswv thiab kawm Koj Txojlus saib tseemceeb, kom nyuam yaus ua tau neeg dawbhuv, mloog Koj lus thiab ua rau Koj tau ntsejmuag. Amees.
Ib tsoom cov mloog uas hmov thiab tshua,
Peb puas niaj hnub txhim kho txojkev sib raug zoo nrog tus Tswv uas dawbhuv?
Nyeem Vajluskub hauv peb lub xyoo: Exethaws 9:18-10:3
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
