II-Xwmtxheej Vajntxwv 10:15-19
Nqe cim:
“Tus Tswv uas muaj hwjchim loj kawg nkaus coglus hais tias, Kuv tau kom tseg licas lawm, kuv yuav ua raws li ntawd. Kuv tau npaj siab licas lawm, kuv yuav ua kom tiav li ntawd” (Yaxayas 14:24).
Lus nug rau sawvdaws xav:
- Thaum cov Yixalayees paub hais tias Vajntxwv Lehaunpau-as tsis ua raws li lawv thov ces lawv txawm ua licas?
- Vajntxwv ua licas tomqab nws mus thov tswvyim ntawm ob pab neeg?
- Qhov uas ua rau lub tebchaws faib yog tim dabtsi?
- Peb pheej nyiam hais daws peb zaj thaum ntsib kev txomnyem los raug peb zoo licas?
Ib tsoom cov mloog txhua tus,
Thaum “cov pejxeem” uas sawvcev ntawm kaum xeem Yixalayees nyob sab Qaumteb, paub hais tias vajntxwv Lehaunpau-as tsis ua raws li lawv cov lus thov, lawv thiaj ntxeev siab thiab hais tias, peb tsis muaj qabhau dabtsi yog yuav mus nrog Daviv tsev nyuag neeg ntawd ua ke. Yog li ntawd, “cov Yixalayees cia li rov mus tsev”, lawv cais tawm thiab tsis ua pejxeem rau vajntxwv Lehaunpau-as lawm, tsuas tshuav ob xeem uas nyob sab Qabteb ntawm xeev Yudas nkaus xwb. Vajntxwv Lehaunpau-as tseem tsis tau paub kaum xeem nyob sab Qaumteb npaj siab khiav tawm, nws thiaj tso Adaunilas uas yog tus thawj saib cov tubrog mus nrog“cov Yixalayees” tham tiamsis lawv muab pobzeb ntaus nws tuag lawm. Thaum ntawd vajntxwv thiaj khiav ceev nrooj mus caij tsheb nees rov los rau nram lub nroog Yeluxalees lawm. Lehaunpau-as tsis nrhiav tus Tswv, tsis thov Vajtswv pab thiab ua raws li lub siab nyiam thaum kawg nws yog tus swb.
Tej xwm uas txaus tu siab no tshwm muaj tsis yog vim vajntxwv Lehaunpau-as lub siab khavtheeb, tsis muaj tswvyim xwb, tiamsis yog muaj tiav raws li tus Tswv kev npaj tseg uas tus cevlus Ahiyas tau cev lus hais txog Lehaunpau-as, uas yog Daviv xeevntxwv yuav tsis tau kav kaum xeem rau qhov vajntxwv Xalumoos “tau ua txhaum” (I-Vajntxwv 11:6; 29-33). Thaum vajntxwv Lehaunpau-as tawv ncauj ces yeej yog tus Tswv lub hwjchim kav. Qhov ntawd qhia paub hais tias Vajtswv thiaj yog tus tswj txhua yam, tsis yog tibneeg kav xwb, Vajtswv kuj yog tus uas hais licas Nws yuav ua raws li Nws hais tseg lawm.
Thaum pom tej xwm hloov pauv lossis ntau tus tibneeg lub neej raug kev nyuaj siab peb yeej tsis totaub yog vim licas, tiamsis peb paub zoo hais tias txhua yam tshwmsim puavleej nyob qab tswjhwm ntawm Vajtswv kev tswj kav thiab Nws yog tus uas hais licas Nws yuav ua raws li Nws hais tseg, peb yuav tsis poob siab li. Keebkwm ntawm Vajtswv haivneeg dhau los, ua timkhawv txog Vajtswv kev tswj kav. Thaum lawv tus vajntxwv ua txhaum ces lub tebchaws raug faib ua ob lub; thaum vajntxwv thiab tej pejxeem ua txhaum ces lawv raug ntes coj mus ua cev qhev, tiamsis tus Tswv muaj kev npaj tseg yuav rov txhim kho lawv (Yelemis 29:14).
Thaum ntsib tej kev txomnyem, xub thawj yog peb yuav tsum los cuag tus Tswv, thov Nws qhia peb tej kev txhaum, tsis hais lub siab tawv, kev khavtheeb lossis lub siab ruam … ntawm kev ua neej thiaj ua rau peb raug tej kev nyuaj siab zoo li ntawd, kom peb paub tig los lees kev txhaum thiab thov tus Tswv zam txim peb, peb thiaj tsis ua yuam kev zoo li vajntxwv Lehaunpau-as. Txawm yog thaum peb tsis totaub lub vimchiv thaum ntsib tej kev txomnyem los peb yuav tsis tas kev cia siab rau Vajtswv tus uas ncaj ncees thiab muaj kev hlub, vim Vajtswv niaj hnub muaj homphiaj zoo rau Nws cov menyuam lub neej (Yelemis 29:11-12).
Thov Vajtswv,
Tus Tswv uas kav tej keebkwm dhau los, Koj tswj nyuam yaus lub neej tamsim no thiab yav tom ntej. Thov Koj pub rau nyuam yaus niaj hnub paub nrhiav Koj, cia siab rau Koj kom nyuam yaus muaj kev kaj siab lug rau txhua lub tsamthawj. Amees.
Ib tsoom cov mloog uas hmov thiab tshua,
Peb puas tau ntseeg siab tuag nthi hais tias Tswv tswj lub keebkwm dhau los thiab tswj peb lub neej?
Nyeem Vajluskub hauv peb lub xyoo: Exethaws 9:1-17
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
