Khiavdim 29:15-18
Nqe cim:
“Yog li ntawd, kuv twb nrog Yexus Khetos tuag saum tus ntoo khaublig lawm, txojsia uas nimno kuv muaj tsis yog kuv txoj, tiamsis yog Yexus Khetos txoj. Qhov uas nimno kuv muaj txojsia nyob twb yog vim kuv ntseeg Vajtswv tus Tub, tus uas hlub kuv thiab muab nws txojsia los txhiv kuv.” (Kalatias 2:20).
Lus nug rau sawvdaws xav:
- Tus tsiaj tim ob yog tus laug yaj uas yuav tsum muab tua fij zoo li cas?
- Tus yaj hlawv kheej fij rau tus Tswv ua kom pa tsw qab ntxiag lub ntsiab yog li cas?
- Peb yuav ua cas rau tej uas kawm tau hauv zaj hnub no?
Tom qab uas fij tus heev nyuj theej txhoj rau Aloos thiab nws cov tub tas, Mauxes ua kevcai fij ua tsaug uas muab tus laug yaj tsis muaj qhov phem tua hlawv pub rau Vajtswv. Aloos thiab nws cov tub tiag tes rau saum tus yaj taubhau qhia hais tias lawv koom ua ib nrog tus yaj, ces tua tus yaj muab cov ntshav mus nchos saum lub ntus thaj. Tom qab ntawd, muab tus yaj txiav ua tej daim, ntxuav huv cov plab hnyuv thiab tej cesqab nqa tas nrho mus tso saum lub thaj hlawv fij tsw qab ntxiag pub rau tus Tswv (nqe 15-18). Cov plab hnyuv thiab ob cesqab yog yam tsis huv uas yuav tsum muab ntxuav, piv txog tej yam tsis zoo ntawm cov povthawj lub neej uas tsis tau haum Vajtswv siab puavleej muab ntxuav kom huv. Tus yaj uas muab hlawv tas nrho saum lub thaj kom tsw qab ntxiag rau tus Tswv raws li hauv Levi Kevcai 1:10-13 tau teem tseg, piv txog cov povthawj yuav muab tas nrho lawv tus kheej rau tus Tswv, tas lawv simneej tsuas ua tus Tswv tes haujlwm kom haum Nws siab.
Cov povthawj tes haujlwm yog pab Vajtswv tej menyuam ua neej zoo thiab pehawm tus Tswv kom yog cai. Lawv ua tej kevcai, thov Vajtswv pab thiab qhia Vajtswv tej menyuam ua raws li tus Tswv siab nyiam. Saib zoo li tes haujlwm ntawd xyooj yim, tiamsis yog yuav ua tau tiav tes haujlwm uas tus Tswv kom ua thiab ua haum tus Tswv siab rau txhua yam, lawv yuav tsum raug poob sijhawm thiab dag zog ntau. Vim keeb kwm dhau los pom hais tias Vajtswv haiv neeg yeej yog cov tawv ncauj, xav ua raws siab nyiam heev dua qhov uas yuav ua raws li Vajtswv tej kevcai xwb.
Txhua tus ntseeg tseeb yeej zeem paub hais tias yus yog tus neeg ua txhaum loj kawg nkaus, tiamsis Tswv Yexus tau npaj nroos muab Nws txoj sia los cawm peb, pab hloov peb tau rov los ua Vajtswv menyuam. Tus Tswv kuj pub rau peb muaj ib lub chaw los teev tiam Nws. Peb txhua tus yuav tsum paub tus Tswv pub peb nyob lub chaw uas tus Tswv xav kom peb teev tiam Nws, thiab muab peb lub siab uas pheej xav txog tus kheej ntsia nrog Yexus Khetos saum tus ntoo khaublig, caw tus Tswv los kav peb lub neej kom ciaj sia zees thiab npaj nroos ua txhua yam rau tus Tswv uas hlub peb thiab muab Nws txoj sia tuag txhiv peb lawm.
Peb fij lub neej ua tiav tes haujlwm uas tus Tswv muab tso rau peb ua lawm tau?
Thov Vajtswv,
Tus Tswv! Nyuam yaus yeej tsis paub piav txog Koj kev hlub thiab yam txawv heev uas Koj ua rau nyuam yaus lawm. Nyuam yaus nyob ntawm no, thov Koj siv nyuam yaus rau koj tes haujlwm thiab pab kom nyuam yaus ua tiv tes haujlwm uas Koj tso rau nyuam yaus ua raws li Koj siab nyiam. Amees.
Nyeem Vajluskub hauv peb lub xyoo: II.Xwmtxheej Vajntxwv 35:20-36:8
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
