Lukas 2:13-14
- Tamsis ntawd muaj ib pab timtswv ceebtsheej coob coob los nrog tus timtswv ntawd hu nkauj qhuas Vajtswv li no:
- Thov kom Vajtswv tus uas nyob saum ntuj ceebtsheej tau koob meej, thiab thov kom cov neeg uas nyob hauv ntiajteb txhua tus uas ua haum Vajtswv siab tau zoo nyob kaj siab lug!
Nqi cim:
“Thov kom Vajtswv tus uas nyob saum ntuj ceebtsheej tau koob meej, thiab thov kom cov neeg uas nyob hauv ntiajteb txhua tus uas ua haum Vajtswv siab tau zoo nyob kaj siab lug!” (Lukas 2:14).
Lus nug rau sawvdaws xav:
- Cov lus hauv ntu Vajluskub no yog leejtwg qhuas Vajtswv?
- Zaj nkauj no muaj ntsiab lus tseemceeb li cas?
- Yam dabtsi ua rau peb tsis muaj kev kaj siab?
- Koj thiab Pawg ntseeg ntawm koj tabtom hu zaj nkauj zoo li cas?
Tom qab tus timtswv los qhia rau cov tub yug yaj txog Cawmseej los yug lawm, cov timtswv ceebtsheej tshwm los qhia kev zoo siab txog Yexus los yug, lawv hu ib zaj nkauj qhuas Vajtswv. Zaj nkauj cov timtswv hu dhau los ua ib zaj nkauj txhawb zog rau cov tub sau nkauj sab kev ntseeg Vajtswv muaj ob txhiab tawm xyoo dhau los. Zaj nkauj no yog ib zaj uas txhua tiam neeg puavleej nyiam hu, txhua lub caij koobtsheej nco txog Tswv Yexus los yug puavleej hnov hu zaj nkauj no.
Ntsiab lus hauv zaj nkauj no qhia tawm ob yam hais txog tus Cawmseej. Tim ib, Tswv Yexus los yug pub tau txojkev kaj siab tseeb rau tibneeg. Peb muaj txojkev “kaj siab” vim peb tau los nyob hauv tus Tswv (Yaxayas 9:5); peb muaj txojkev “kaj siab” vim peb tsis raug txim, rau qhov Tswv Yexus twb los tuag txhiv neeg ntiajteb tej kev txhaum lawm (1Timautes 1:15). Peb muaj kev “kaj siab” vim peb tau rov qab los nrog Vajtswv sib raug zoo, ib yam li ob txiv tub (Yauhas 1:12). Tim ob, Tswv Yexus los yug pub kev “tau zoo nyob” rau tibneeg ntiajteb. “Tau zoo nyob” txhais hais tias, tau koob hmoov lossis tau lubneej zoo tsis txob txhawj. Dhau los ntawm tus Tswv Yexus tibneeg tau txhua yam koob hmoov zoo uas Vajtswv pub (Loos 8:32), thiab yuav tau txais yam zoo uas los saum ntuj los thaum peb txaus siab lees ntseeg Tswv Yexus los ua peb tus Tswv Cawmseej.
Hnub no, tej zaum peb kuj tabtom hu zaj nkauj cov timtswv hu rau lub caij koobtsheej nco txog Tswv Yexus los yug tiamsis peb lub siab tseem tsis tau muaj txojkev kaj siab tiag tiag, lossis tej zaum peb tsuas yog ua ib tug ntseeg raws lwm tus xwb peb tsis tau txais yuav Yexus los ua peb tus Tswv Cawmseej. Peb yuav tau tig rov los xyuas tus kheej, tso tej kev txhaum tseg, rau qhov tej kev txhaum ntawd quas peb thiab Vajtswv (Yaxayas 59:2), ua rau Vajtswv tsis teb peb tej lus thov thiab tsis foom koob hmoov rau peb. Tswv Yexus twb los yug lawm, nws coj txojkev kaj siab, uas yog koob hmoov saum ntuj los pub rau tibneeg ntiajteb. Peb yog cov uas twb los ntseeg Tswv Yexus, peb cia li tsa suab hu nkauj kaj siab lug nyob hauv lub ntiajteb uas tsis muaj kev kaj siab no, peb yuav tsum qhia Tswv Yexus txojkev cawm dim rau ntau leej hauv lub caij koobtsheej nco txog Yexus los yug xyoo no, vim Tswv Yexus yog “tus uas muaj kev thajyeeb” uas Yaxayas 9:6 hais tias, “Muaj ib tug menyuam twb los yug hauv peb cov lawm! Vajtswv muab ib tug tub pub rau peb! Thiab nws yuav ua tus kav pab, nws lub npe yuav hu ua Tus Tuavxam, tus uas muaj Txujci, Vajtswv tus muaj fwjchim, Vaj Leej Txiv tus uas nyob mus ibtxhis, Vajntxwv tus uas muaj kev thajyeeb.”
Peb lub siab puas niaj hnub hu zaj nkauj kaj siab?
Thov Vajtswv:
Tswv Yexus, koj yog tus Tswv uas muaj kev thajyeeb, nyuam yaus ua koj tsaug uas koj tau los yug pub txojkev kaj siab rau nyuam yaus, thov koj cia nyuam yaus niaj hnub nyob hauv koj txojkev cawm dim thiab txoj koob hmoov uas zoo kawg nkaus. Thov koj pab nyuam yaus qhia kom lwm tus paub koj rau lub koobtsheej xyoo no. Ameeg.
Email: kawmvajluskubtxhuahnub@gmail.com
Kênh Youtube BHKTHN:
