Klei Aê Diê Blŭ: Y‑Yôp 1:20-22; 2:7-10
Êlan kliăng: “Si ngă, drei knŏng mă tŭ klei jăk mơ̆ng kngan Aê Diê mơ̆, leh anăn amâo mă tŭ ôh klei jhat?” (Y‑Yôp 2:10b).
Klei êmuh ksiêm mĭn: Si klei truh kơ Y‑Yôp dôk tlă anăp? Si knhuah ñu bi êdah hlăk klei truh bhiâo riâo rit? Si drei lŏ ngă wĭt hlăk klei knap mñai truh kơ drei?
Hră Y‑Yôp čih wĭt lu blư̆ Aê Diê pô yơh mni Y‑Yôp “amâo mâo klei arăng dưi ƀuah ôh leh anăn kpă ênô, sa čô huĭ mpŭ kơ Aê Diê, leh anăn weh đuĕ mơ̆ng klei jhat.” Ƀiădah Satan lač, Y‑Yôp dưi jing msĕ snăn kyuadah mâo Aê Diê hơêč hmưi kơ ñu. Leh anăn Satan akâo kơ Aê Diê lông dlăng klei đăo Y‑Yôp. Snăn yơh mđrông klei knap mñai truh bhiâo riâo rit, ñu luč jih mliêt ngăn drăp leh anăn wăt pluh čô anak ñu khăp hơiêng (Y‑Yôp 1:1-19). Ƀiădah, ñu ăt sa hnơ̆ng đăo knang kơ Aê Diê. Y‑Yôp bi êdah klei ênguôt hnĭng ñu kyua anak luč hŏng klei “hiêk ao jhung ñu, kuêh ƀŭk ñu, buôn ti lăn, leh anăn kkuh mpŭ” (1:20). Wăt ti krah klei ênguôt hnĭng, knap mñai, ñu ăt thâo săng jih jang klei ñu mâo jing mơ̆ng Aê Diê, jing dŏ Aê Diê, kyuanăn khădah luč jih ñu ăt kjăp ai tiê đăo knang kơ Ñu. Aê Diê thiê brei, ăt Ñu dưi sua mă wĭt, kyuanăn ñu ăt mpŭ mni kơ Aê Diê (1:21). Klei Aê Diê Blŭ lač klă “Y‑Yôp amâo ngă soh ôh, kăn kčŭt ƀuah Aê Diê rei” wăt ti krah klei jhat truh kjham kjhuê̆ msĕ snăn (1:22).
Tui tluôn anăn, Satan lŏ akâo kơ Aê Diê brei ñu dưi ngă kơ asei mlei Y‑Yôp hŏng “ruih tiêng jhat snăk mơ̆ng plă jơ̆ng truh ti čŏng kŏ” (2:7). Hlăm klei ruă asei mlei ktang tĭt, ñu ruă knap kjham hĭn êjai kyuadah mô̆ ñu pô yơh ha blŭ klei phĭ jhat snăk (2:9). Ƀiădah wăt tŭ klei mbhĭt mprah, Y‑Yôp ăt djă pioh kluôm dhuôm klei đăo kơ Aê Diê leh anăn amâo ngă soh hŏng Ñu ôh.
Y‑Yôp lŏ wĭt lač kơ mô̆ ñu hŏng klei êmuh čiăng lač êlam dhŭt msĕ si tlŏ ai tiê mô̆ Y‑Yôp leh anăn wăt kơ lu phung đăo ênuk anei, si ngă, drei knŏng mă tŭ klei jăk mơ̆ng kngan Aê Diê mơ̆, leh anăn amâo mă tŭ ôh klei jhat? (2:10b) Drei khăng hơ̆k mơak mmuñ bi mni, lač jăk kơ Aê Diê hlăk Ñu hơêč hmưi kơ drei lu klei jăk jĭn ti lăn ala anei, ƀiădah tơdah klei jhat knap mñai truh, drei blŭ dŭñ leh anăn ƀuah kơ Aê Diê. Brei drei hriăm mơ̆ng klei Y‑Yôp bi hmô čiăng dưi gĭr tŭ, dôk kjăp đăo knang leh anăn bi mni kơ Aê Diê hlăm klei jhat truh. Đăo kơ Aê Diê leh anăn tui hlue Khua Yang amâo djŏ ôh drei dưi tlaih đuê̆ mơ̆ng klei jhat truh, ƀiădah ti krah klei knap mñai drei thâo sĭt mâo Aê Diê dôk mbĭt leh anăn hdră Ñu pioh kơ drei jing jăk nanao. Khua Yang Yêsu lač leh: “Kâo lač leh klei anei kơ diih, čiăng kơ diih dưi mâo klei êđăp ênang hlăm Kâo. Hlăm lăn ala diih srăng mâo klei knap mñai; ƀiădah dôk kjăp bĕ, Kâo dưi leh hŏng lăn ala.” (Y‑Yôhan 16:33). Kyuanăn, brei drei đăo kjăp kơ Khua Yang wăt êjai tuôm hŏng klei jhat truh leh anăn thâo săng klă êjai hlăm klei truh anăn yơh, klei đăo drei hriăm mjuăt leh anăn đĭ hriê kơ prŏng tơdah drei ăt dôk kjăp leh anăn mpŭ mni kơ Aê Diê.
Si ngă drei hŏng jih ai tiê đăo knang leh anăn bi mni kơ Aê Diê êjai mâo klei êđăp ênang amâodah hlăm klei jhat truh mơ̆?
Wah lač: Ơ Khua Yang, akâo kơ Ih đru kâo tui hriăm mơ̆ng klei bi hmô Y‑Yôp, đăo knang leh anăn mpŭ mni kơ Aê Diê nanao wăt tơdah klei jhat truh bhiâo riâo rit kơ klei hdĭp kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Bruă Mtao 4
Kênh Youtube BHKTHN:
