Klei Aê Diê Blŭ: Y-Yêrêmi 23: 30-32
Êlan kliăng:
“Wăt phung khua pô hưn êlâo leh anăn phung khua ngă yang amâo mpŭ kơ Aê Diê ôh; wăt hlăm sang kâo, kâo ƀuh leh klei ƀai diñu ngă, Yêhôwa lač.
“Kyuanăn êlan diñu srăng jing êbhơr, arăng srăng suôt diñu kơ klei mmăt leh anăn diñu srăng lĕ buh tinăn. Kyuadah kâo srăng bi truh klei jhat kơ diñu hlăm thŭn kâo bi kmhal diñu,” (Y-Yêrêmi 23:11-12).
Klei êmuh ksiêm mĭn: Klei Yêhôwa lač srăng bi kdơ̆ng hŏng hlei pô? Ya ngă? Ya klei truh mơ̆ng bruă ngă phung khua pô hưn êlâo mgưt hlăm phung đaŏ kơ Khua Yang? Hbĭl phung srăng msĕ hŏng phung khua pô hưn êlâo mgưt anăn?
Yêhôwa lač Ñu srăng bi kdơ̆ng hŏng phung amâo mâo Ñu tiŏ nao ƀiădah diñu ngă mgưt jing pô blŭ bi ala kơ Khua Yang. Anăn jing phung “phung tlĕ klei kâo blŭ hdơ̆ng diñu pô” (êlan 30)., “phung yua êlah diñu leh anăn lač, ‘Snei Yêhôwa blŭ” (êlan 31), “phung hưn êlâo klei êpei luar,” Yêhôwa lač, “Leh anăn phung hưn klei anăn leh anăn atăt phung ƀuôn sang kâo wơr dliê hŏng klei diñu luar leh anăn ngă pliă plia” (êlan 32). Bruă ngă luar anei amâo djŏ knŏng amâo ba ya klei tŭ kơ buôn sang Aê Diê ôh ƀiădah lŏ ngă kơ diñu soh čhuai. Kyua anăn, Yêhôwa lač Khua Yang srăng bi kdơ̆ng hŏng digơ̆.
Boh blŭ “bi kdơ̆ng hŏng…” dưi mñă wĭt tlâo blư̆ hlăm jih tlâo êlan Klei Aê Diê Blŭ anei brei ƀuh hnơ̆ng kjham mơ̆ng klei phung khua pô hưn êlâo mgưt ngă. Kyua amâo djŏ Aê Diê tiŏ nao ôh anăn amâo mâo ôh Klei Aê Diê Blŭ. Khădah, ai tiê diñu plă plia anăn tlĕ mă Klei Aê Diê Blŭ mơ̆ng phung pô hưn êlâo mkăn. Diñu lŏ mñă leh anăn dlăng anăn msĕ si pô dưi mâo klei bi ƀuh mơ̆ng Aê Diê. Mbĭt hŏng anăn, diñu hưn mdah klei tui si kđeh pô čiăng ƀiădah ngă mgưt hŏng klei lač jing Aê Diê blŭ. Diñu hiu hưn klei êpei luar, hiu hưn pô ăt mâo klei Aê Diê bi êdah, čiăng hiu mplư phung êdu awăt tui hluê êlan soh pioh duah klei tŭ kơ pô amâo djŏ jing kkuh mpŭ kơ Aê Diê ôh.
Klei hưn răng mơ̆ng Yêhôwa jing Ñu srăng bi kdơ̆ng hŏng phung khua pô hưn êlâo mgưt, hiu mčeh luar klei blŭ mtă kơ grăp čô drei, kyua mâo lu blư̆ čiăng hiu mplư phung mkăn, amâo dah čiăng mgang kơ bruă pô ngă soh, drei amâo hêñ lač anăn jing: “Klei Khua Yang čiăng, Khua Yang lač…”! Msĕ si tăp năng: čiăng bi dôk ung mô̆ hŏng phung amâo đaŏ, amâo lŏ čiăng mă bruă kơ Aê Diê, duh hlăm dŭm bruă mnia blei soh hŏng klei đaŏ… Hruê anei, drei dưi mâo Klei Aê Diê Blŭ hlăm Hdruôm hră Klei Aê Diê Blŭ, mơ̆ng klei anăn drei dưi thâo klei Khua Yang čiăng hlăm klei hdĭp pô, amâo djŏ jing êpei amâo dah luar. Brei drei hdơr Aê Diê ƀuh jih, kyua anăn brei drei răng sĭt čiăng ngă tui si kđeh asăr pô ƀiădah lač anăn jing klei Khua Yang čiăng kâo ngă.
Ya hdră drei khăng duah klei Aê Diê čiăng hlăm klei hdĭp?
Ơ Khua Yang! Kâo mni lač jăk kơ Ih brei leh kơ kâo Klei Ih blŭ hlăm Klei Aê Diê Blŭ čiăng kâo thâo klei Ih čiăng hlăm klei hdĭp kâo. Akâo kơ Ih brei kâo tui duah klei Ih čiăng hlăm djăp mta bruă điêt amâo dah prŏng.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
