Klei Aê Diê Blŭ: Klei Bi Hriêng 28:3
Êlan kliăng: “Sa čô ƀun ƀin ktư̆ juă phung ƀun ƀin jing msĕ si êa hjan ktang bi rai jih mnơ̆ng pla” (Klei Bi Hriêng 28:3)
Klei êmuh ksiêm mĭn: Rup êa hjan ktang bi rai jih mnơ̆ng pla lač kơ ya klei hlăm êlan Klei Bi Hriêng anei? Si ngă klei hdĭp Mtao Y-Ahap jing msĕ si angĭn êbŭ bi rai hrô kơ klei rŭ mdơ̆ng? Si drei ba yua klei sĭt nik anei kơ klei hdĭp pô?
Êlan Klei Bi Hriêng hruê anei bi êdah sa rup ktang msĕ si angĭn êbŭ. Arăng kreh yua rup adiê hjan čiăng lač klei jăk jĭn kyua êa hjan bi doh, bi êđăp leh anăn rông lăn, ba klei hdĭp kơ yan boh mnga, rơ̆k tơ̆k. Ƀiădah dŭm gưl adiê hjan prŏng đei amâo dah adiê hjan angĭn êbŭ srăng “bi rai jih mnơ̆ng pla mjing”, đung jih mnơ̆ng pla mjing, ba klei bi rai. Ăt msĕ mơh, phung khua kiă kriê ktư̆ juă phung dleh dlan, jing phung awăt êdu, snăn diñu amâo ba klei kpă ênô amâo dah klei jăk ôh, ƀiădah knŏng ba klei jhat leh anăn bi rai. Klei hdĭp Mtao Ahap bi êdah klă klei truh mơ̆ng klei ktư̆ juă phung ƀun ƀin: Mtao Ahap mă leh đang boh kriăk ƀâo Y-Nabôt hŏng klei bi mdjiê gơ̆ hŏng klei amâo djŏ klei bhiăn. Kyuanăn, Aê Diê phat kđi leh Mtao Ahap mơ̆ng Khua pô hưn êlâo Y-Êli. Knhal tuč, Mtao Ahap djiê hlăm klei bi blah, êrah ñu asâo hlia ti anôk Y-Nabôt djiê (Dlăng kơ I Bruă Mtao 21:19; 22:38). Leh anăn phung găp djuê ñu rai tuč, leh anăn mô̆ ñu H’Jêsêbel djiê knap mñai msĕ si Klei Aê Diê Blŭ lač leh. Aê Diê bi êdah nanao klei Ñu khăp kơ phung ƀun ƀin, kơ phung awăt leh anăn kơ phung kƀah mnơ̆ng. Bruă klam gĭt gai, wăt tơdah hlăm yang ƀuôn, hlăm Phung Sang Aê Diê amâodah hlăm gŏ sang, mâo Aê Diê brei čiăng răng mgang leh anăn đru kơ phung mkăn, amâo djŏ ôh čiăng mjhua digơ̆. Tơdah phung mâo klei dưi bi mjhua hŏng klei dưi kyua klei tŭ dưn kơ ñu pô, diñu jing msĕ si angĭn êbŭ bi rai hrô kơ bruă rŭ mdơ̆ng.
“Sa čô ƀun ƀin ktư̆ juă phung ƀun ƀin jing msĕ si êa hjan ktang bi rai jih mnơ̆ng pla” (êlan 3). Klei sĭt nik anei ăt yua kơ jih jang drei. Wăt tơdah ti anôk bruă, jih jang drei jing “phung ƀun ƀin” ti anăp Aê Diê. “Kyuadah drei amâo tuôm djă ba sa mta mnơ̆ng ôh kơ lăn ala, leh anăn kăn drei dưi mă ba sa mta mnơ̆ng rei mơ̆ng lăn ala.” (I Y-Timôthê 6:7).Jih jang klei drei mâo jing kyua Aê Diê brei. Jih jang klei pap kơ drei mâo kyua klei Aê Diê pap brei. Aê Diê dưm grăp čô drei hlăm bruă mdê mdê, ƀiădah ti anăp Aê Diê, jih jang drei jing msĕ si sa čô “mnuih ƀun ƀin” leh anăn msĕ si sa čô “mnuih knap mñai” msĕ sơăi. Kyuanăn brei drei dôk dơ̆ng ƀơ̆ng huă hŏng klei kpă Aê Diê, bi êdah klei pap, klei kpă, leh anăn klei khăp. Hlăm Khua Yang Yêsu Krist, drei ƀuh leh klei bi hmô kluôm ênŭm mơ̆ng Pô amâo ktư̆ juă phung ƀun ƀin ôh, ƀiădah ñu bi ti gŭ ñu pô “čiăng ngă bruă kơ arăng, leh anăn jao klei hdĭp Ñu jing ênoh bi tui kơ lu mnuih” (Y-Markôs 10:45). Akâo kơ Aê Diê brei kơ drei hdĭp leh anăn dôk dơ̆ng ƀơ̆ng huă hdơ̆ng drei hluê si klei bi hmô Aê Diê, khăp, mă bruă kơ pô mkăn hrô kơ bi ktư̆ juă hdơ̆ng pô.
Si ngă drei hdĭp hŏng ƀun ƀin, kñap mñai?
Wah lač: Ơ Ama Hlăm Adiê, Jing Aê Diê kpă ênô leh anăn bŏ hŏng klei pap, akâo kơ Ih pap brei kơ kâo tơdah kâo mjhua klei hmăi pô amâodah ngă ngơi mang hŏng phung dôk čiăng klei đru. Akâo kơ Ih đru kâo mâo ai tiê msĕ Khua Yang, bŏ hŏng klei khăp, klei kpă ênô leh anăn klei luă gŭ. Akâo kơ Ih đru kâo hdĭp čiăng ba klei jăk mơak hrô kơ bi êka kơ pô mkăn. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôp 22
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
