Jôsuê 8:1-2
“Kơplah noh, Kră Yang khan kơ Jôsuê: Ih ‘nĕ kơ hli tơrơ, chông ba đĭ-đăng lu linh hơdai ih, iung năm blah bĕ pơlei Ahi, to Inh jao sư lăm tơpang ti ih, pơtao Ahi, kon pơlei sư, pơlei hăm tơring noh.” (Jôsuê 8:1)
Nơ̆r jet tơchĕng pơwao:
– Yua kơ kiơ Kră Yang khan kơ Jôsuê “ih ‘nĕ kơ hli tơrơ”?
– Kơplah blah iŏk đei pơlei Ahi kiơ̆ kơ nơ̆r Kră Yang pơkă, kon pơlei Kră Yang athei pơm kiơ păng gơh pơm kiơ?
– Lu bơ̆n kăl kơ pơm kiơ kơplah hlôi đơ̆ng răm ‘băm truh?
Đơ̆ng rŏng kơ kon pơlei Isơrael chu nơ̆r Kră Yang pơkeh tơdrong yoch, ‘Bok Kei-Dei wă kơ lu sư iung năm blah bĕ pơlei Ahi. Adrol ki, yua kơ đơ̆ng tơdrong yoch Akan, sư tơtông iŏk tơmam trŏ kơ pơyơ̆r kơ Kră Yang, đơ̆ng rŏng kơ blah iŏk pơlei Jêrikô, thoi noh na Isơrael tơblah thuơ răm tih tơpă. Rŏ lăng jơ ‘nâu lu sư oei tơtăm đĕch, hli tơrơ. Lu sư tơtăm pơm thoi yơ wă kơ băt hơđăl ưh pă đei tơdrong yoch ayơ oei ôn lăm kon pơlei. Rŏ lăng lu sư hli gô tơblah thuơ dơ̆ng. Rŏ lăng lu sư ưh kơ lui ngeh ‘bok Jôsuê pơgơ̆r, yua kơ hơdrol ki lu sư juăt bơih hăm tơdrog ‘bok Môis pơgơ̆r… kơplah noh, Kră Yang khan kơ Jôsuê: “Ih ‘nĕ kơ hli tơrơ”. Kră Yang wă kơ Jôsuê păng kon pơlei huay kơ kơdŭn tơrŏng, mălei wă kơ lu sư iung bĕ đơ̆ng tơblah thuơ yua kơ oei đei tơdrong jang tih tơ anăp. Jơ ‘nâu, kơplah tơdrong yoch oei lăm kon pơlei đei pơkeh đang bơih, tơdrong tơ’bưh ‘Bok Kei-Dei hăm lu sư đei hơmet ming bơih. Na Kră Yang oei hơdai lu sư dơ̆ng păng tuh pŭn hiôk kơ lu sư. Kră Yang pơkă pơjao pơlei Ahi ăn kơ lu sư, kon pơlei păng pơlei hăm tơring noh lăm tơpang ti Jôsuê. Kon pơlei Isơrael kư̆m dai wă pơrăm pơlei ‘nâu nhen thoi pơrăm dêh pơlei Jêrikô.
Adrol sơ̆, kơplah blah iŏk pơlei Jêrikô, pơlei blŭng a blah đei lăm dêh pơkă, kon pơlei gô pơrăm đĭ lê̆ dôm tơmam pơlei blŭng a na pơyơ̆r kơ ‘Bok Kei-Dei (Bơtho khôi juăt 26:1-4). Hrei ‘nâu, Kră Yang ăn kơ lu sư yua iŏk tơmam păng sem dơrong lăm dêh Ahi dah blah iŏk đei pơlei ‘nâu, thoi hơdrol sơ̆ lu sư đei pơm bơih thoi noh (Bơtho khôi juăt 2:35; 3:7). Băt mă Akan chang gô ding truh năr Kră Yang ăn lei na ưh pă pŭ iŏk tơdrong truh noh kơ akâu jăn sư păng hnam dơnŏ!
Rŏ lăng lăm rim ‘nu kơ bơ̆n đei tơ’bơ̆p tơdrong răm truh lăm chăl arih. Mălei chăl arih sơ̆ thoi yơ hĭ, ‘nĕ kơ bơ̆l hăl. Athei iung bĕ athei yak năm tơ anăp. Athei yua nơ̆r Kră Yang ba ăn tơdrong pơlung, tơplih kơ tơdrong răm noh pơm kơ bơ̆n kơdŭn tơrŏng. Nhen thoi kon pơlei Isơrael, mưh đei Kră Yang oei hơdai, lu sư ưh pă đei hli tơrơ tơdrong kiơ bơih. Kơplah lu bơ̆n đei pơkeh tơdrong yoch lăm chăl arih, păng đei Kră Yang oei hơdai, lei na hŭt tŭk tơdrong gleh lap, hli tơrơ, na yak kiơ̆ trong Kră Yang păng bơ̆jang kơ Sư. Kră Yang ăn tơdrong răm truh, lei na Sư kư̆m ăn tơdrong kĕ jei trŏ kơ jơ năr Sư mưh lu bơ̆n chu kơ Sư tôm tơdrong. Tơdrong răm ‘băm ưh kơ hli ôh, mălei hli kơ ưh kơ đei đon lui kơjăp wă iung năm tơ anăp.
Ơ Kră Yang, apinh Ih tơgŭm inh wă kơ inh băt gơnang kơ Ih păng nơ̆r Ih wă kơ iung dơ̆ng đơ̆ng răm ‘băm truh. Apinh Ih ăn kơ inh yak kiơ̆ hăm jơhngơ̆m lui ngeh, Ih gô ăn kơ inh kĕ jei păng kĕ trŏ kơ jơ Ih ăn. Krao khan yua anăn Kră Yang Yêsu Krist, Amen.
Lu tơdrong hli tơrơ, sơ’ngon ayơ đei ‘bơm lăm tơdrong ih yak kiơ̆ Kră Yang păng tơdrong bơ̆jang kơ Sư?
Đŏk Sơ̆p Hla bơar ‘Bok Kei-Dei lăm pêng sơnăm: Jop 21
Kênh Youtube BHKTHN:
