Yausuas 8:1-2
Nqe cim:
“Tus TSWV hais rau Yausuas hais tias, “Cia li coj tagnrho koj cov tubrog mus tua lub nroog A-is; tsis txhob ntshai lossis qaug zog. Kuv yuav pab kom koj mus tua yeej tus vajntxwv uas kav lub nroog ntawd; kuv twb muab nws lub tebchaws, lub nroog thiab nws cov pejxeem cob rau koj tes lawm” (Yausuas 8:1)
Lus nug xav:
– Vim li cas tus Tswv thiaj hais rau Yausuas hais tias, “tsis txhob ntshai lossis qaug zog”?
– Thaum lawv txeeb tau lub nroog A-is raws li tus Tswv tau coglus lawm, lawv yuav tsum ua dabtsi thiab muaj cai tau ua dabtsi?
– Peb yuav tsum ua dabtsi thaum nyuam qhuav hla ib qho kev swb?
Tom qab cov Yixayees mloog tus Tswv lus thiab daws qhov teebmeem ntawm kev txhaum lawm, Vajtswv xav kom lawv sawv tsees mus txeeb lub nroog A-is. Yav tas los, vim Akhas tau ua txhaum, nws tau nyiag tej khoom uas tsim nyog muab fij rau tus Tswv tom qab uas lawv txeeb tau lub nroog Yelikaus. Vim li ntawd, cov Yixayees thiaj swb rog loj heev. Tej zaum nimno lawv tseem muaj kev txhawjxeeb thiab ntshai. Lawv yuav ua li cas thiaj paub tseeb hais tias tsis tshuav ib qho kev txhaum twg zais cia hauv yus cov pejxeem lawm. Tej zaum lawv ntshai tsam lawv tseem yuav swb rog dua. Tej zaum lawv kuj ua xyem xyav txog Yausuas kev coj, vim yav tas los lawv twb yeej ib txwm swm Mauxes txoj kev coj lawm… Nyob rau hauv lub tsamthawj ntawd, tus Tswv thiaj hais rau Yausuas hais tias: “tsis txhob ntshai lossis qaug zog” Vajtswv xav kom Yausuas thiab cov pejxeem tsis txhob tso tseg, tiamsis yuav tsum sawv rov los ntawm qhov kev swb, vim tseem muaj ib txoj haujlwm loj nyob tom hauv ntej. Tamsim no, qhov teebmeem kev txhaum hauv cov pejxeem twb daws tau lawm, lawv txoj kev sib raug zoo nrog Vajtswv kuj tau rov kho zoo lawm, tus Tswv rov los nrog lawv nyob thiab foom koob hmoov rau lawv ntxiv. Vajtswv coglus hais tias Nws twb muab lub nroog A-is tus vajntxwv, cov neeg hauv lub nroog thiab lawv lub tebchaws cob rau Yausuas txhais tes lawm. Cov Yixayees kuj yuav tsum rhuav tshem lub nroog no ib yam li lawv tau rhuav tshem lub nroog Yelikaus.
Yav tas los, thaum cov Yixayees txeeb tau Yelikaus, yog thawj lub nroog hauv Tebchaws uas Vajtswv Coglus, cov pejxeem yuav tsum rhuav tshem txhua yam khoom uas lawv txeeb tau los pov tseg zoo ib yam li thawj phaum txiv hmab txiv ntoo yuav tsum muab fij rau tus Tswv (2 Kevcai 26:1-4). Tiamsis nim no, tus Tswv tso cai rau lawv khaws tej khoom uas lawv txeeb tau los thiab tej tsiaj txhu ntawm lub nroog A-is, ib yam li yav tas los Vajtswv tau tso cai rau lawv ua (2 Kevcai 2:35; 3:7). Yog Akhas tos kom txog thaum Vajtswv tso cai ces yuav tsis raug them tus nqi kim heev uas yog nws thiab nws tsev neeg txojsia.
Paub tseeb hais tias peb txhua tus yeej tau ntsib txoj kev swb hauv peb lub neej. Tiamsis txawm yav dhau los yuav zoo li cas los xij, thov tsis txhob poob siab. Cia li sawv tsees los thiab mus txuas ntxiv rau tom hauv ntej. Cia Vajtswv Txojlus txhawb peb zog, tsis txhob cia tej txoj kev swb yav dhau los ua rau peb tso tseg. Ib yam li cov Yixayees, thaum muaj tus Tswv nrog lawv nyob, lawv tsis ntshai ib yam dabtsi li. Thaum peb twb daws tau qhov teebmeem kev txhaum hauv peb lub neej lawm, yuav tau tus Tswv nyob nrog peb, yog li ntawd, cia peb muab txoj kev poob siab thiab kev ntshai tso tseg. Cia li taug kev nrog tus Tswv mus ntxiv thiab ua Nws tes haujlwm. Vajtswv pub cai kom muaj kev swb tshwmsim los, Nws kuj yuav pub cai kom muaj kev kovyeej thaum txog rau lub sijhawm uas Nws teem tseg, thaum peb mloog Nws lus thiab ua raws Nws lub siab nyiam kawg siab kawg ntsws. Kev swb tsis yog yam txaus ntshai; yam txaus ntshai yog peb swb lawm, tiamsis tsis muaj kev ntseeg txaus kom sawv rov los thiab mus ntxiv.
Thov Vajtswv;
Tus Tswv, thov Koj pab kom nyuam yaus paub tso siab rau Koj thiab Koj Txojlus, kom nyuam yaus muaj zog sawv rov los ntawm nyuam yaus tej kev swb. Thov Koj pab kom nyuam yaus mus txuas ntxiv thiab ntseeg ruaj khov hais tias Koj yuav pub nyuam yaus kov yeej thiab ua tiav Koj tes haujlwm raws li Koj lub sijhawm. Nyuam yaus tuav Tswv Yexus Khetos lub npe thov, Amees.
Txoj kev ntshai thiab kev poob siab tabtom cuamtshuam peb kev nrog tus Tswv mus li cas?
Nyeem Vajluskub hauv peb lub xyoos: Yauj 21
Kênh Youtube BHKTHN:
