Jôsuê 7:16-26
“Bơngai bu ôn tơdrong yoch sư ưh kơ đei pŭn hiôk; Mă-lei đei bu tơbral păng achăng lê̆ sư gô đei mơnat.” (Tơdrong Pơđơ̆k 28:13)
Nơ̆r jet tơchĕng pơwao:
– Jôsuê pơm kiơ đơ̆ng rŏng kơ Kră Yang tơ’bôh ăn trong gơh chă ‘bôh bơngai pơm yoch?
– Akan păng hnam dơnŏ sư pŭ iŏk tơdrong răm truh kiơ?
– Lu bơ̆n pơhrăm iŏk kiơ đơ̆ng roi hơ’mon ‘nâu?
Đơ̆ng rŏng kơ Kră Yang bơtho tơbăt ‘bôh bơngai mă tơtông ‘nâu trŏ kơ pơlôch, Jôsuê sư pơm hloi pơge năr đơ̆ng rŏng, sư iung đơ̆ng hrôih păng krao kon pơlei dơ̆ng jê̆ kiơ̆ adrĕch khul. Hơdrol adrĕch Juđa tơ’bôh roi, pơtrơp, Serach roi, păng sapđi roi; Tuch luch Akan roi. ‘bok Jôsuê athei Akan roi tơbral tơpă dôm tơdrong, ‘nĕ kơ ôn minh tơdrong kiơ, ‘bôh kơ đei trong kiơ wă ôn dơ̆ng, Akan drơ̆ng tơbral yoch inh pơm yoch hăm Kră Yang tôm đêl pơm. Hơdrol hloh sư “’bôh” lăm sư tơtông minh blah ao dêh babilôn ‘lơ̆ng dêh, dang ‘bar ky̆ hu păng maih dang drâu hrĕng gram, đơ̆ng noh “ham ‘maih iŏk” păng “iŏk” dôm tơmam ‘noh, đơ̆ng rŏng kơ noh sư bŭ “ôn lê̆” dôm tơmam ‘nâu anih sư. Tơdrong mă sik teh bŭ ôn lăm anih sư, tơpă hnam dơnŏ ‘bôh rơđah, mălei lu sư hreh đĕch. Jôsuê wơh bơngai năm tơ anih sư ‘noh chă ‘bôh tôm tơmam ‘noh, chĕp tơ’bôh pơdah ‘bơ̆t anăp Kră Yang, dôm tơmam Kră Yang mălei iŏk tơtông.
Jôsuê păng kon pơlei pơla rôp AKan hăm lu kon drŏnglo, kon drŏkăn sư, iŏk hu ao tai păng maih mă đêl sư ôn, hăm dôm tơmam gah sư păng chông klơ̆m pơlôch păng tơmo. AKan păng đĭ hnam dơnŏ glăi lu sư tơchĕng khan ‘bŭ ôn dôm tơdrong mă bơ̆n pơm glăi noh tơplơ̆ hăm bơ̆n, thoi noh jing lăng pơi tơdrong pơma pơkă kơdih akâu bơ̆n, Kră Yang bơih băt tôm tơdrong, ‘bôh tôm tơdrong, Kră Yang ‘bôh kơplah sư lăng ‘nhĕng, ‘maih wă, iŏk tơtông tơmam trŏ kơ pơlôch, păng ‘bôh sư ôn dôm tơmam ‘noh. Tuch luch dôm tơdrong sư pơm đei pơdah ‘bôh rơđah ‘bơ̆t anăp tơpôl kon pơlei lơ. Akan păng đĭ hnam dơnŏ sư pŭ iŏk thoi tơmam măk, tơdrong pôk pơư păng truh tơdrong lôch.
Ưh kơ đei bu gơh ôn hlơp yoch ‘bơ̆t anăp Kră Yang. Nơ̆r hơ’mon việt nam đei pơma “ ‘long gĭt hlơp gô đei minh năr pơdah băt rơdah”. Mă bơngai lăm teh đak kư̆m lui khan, dah đei ‘bơm dôm tơdrong kiơ khan ôn hlơp mălei minh ayơ noh kư̆m gô pơdah ‘bôh rơđah đêl pơm yoch. Lu bơ̆n rai huay kơ ôn mă dôm yoch bơ̆n ‘bơ̆t anăp ‘Bok Kei-Dei mơsêh, băt tôm păng ‘lơ̆ng rơgoh, mă bơ̆n tơdrong pơm yoch hlơp dang yơ. Tơdah “Oei ôn” tơdrong ayơ, athei apinh roi kơ Kră Yang, tơbral păng apinh Sư mơnat. Athei gơnang kơ Kră Yang wă kơ kĕjei đơ̆ng tơdrong pơhlŭ, ‘nĕ kiơ̆ kơdih ‘maih wă, ‘nĕ kơ lăng păng tơchĕng dôm tơdrong kơnê̆, ‘nĕ kơ ăn jơhngơ̆m ba truh tơ pơm yoch ‘bơ̆t anăp Kră Yang. Mă tơpă, ưh kơ năm kiơ̆ hơdai, trong tơdrong yoch, pơm jing pơhơi ưh kơ gĭt nơ̆r Kră Yang pơkă.
Ơ Kră Yang, Ih băt tôm tơdrong, apinh Ih tơ’blŏk kơ inh ling lang kơchăng ưh kơ đei bu gơh ôn hlơp yoch ‘bơ̆t anăp Kră Yang, apinh Ih ăn kơ inh băt gơnang kơ Ih wă kơ kĕ jei đơ̆ng dôm tơdrong pơhlŭ păng inh apinh Ih tơgŭm inh huay pă pơm pơm yoch ‘bơ̆t anăp Ih. Krao khan yua Anăn Yêsu Krist, Amen.
Lu bơ̆n hăm oei đei ôn tơdrong yoch ‘bơ̆t anăp Kră Yang păng ‘nhŏng oh bơ̆n lăm khul bơngai lui?
Đŏk Sơ̆p Hla bơar ‘Bok Kei-Dei lăm pêng sơnăm: Jop 20
Kênh Youtube BHKTHN:
