Klei Aê Diê Blŭ: Y-Sakari 8:16-17
Êlan kliăng: “Klei anei brei diih ngă: blŭ bĕ klei sĭt nik hdơ̆ng diih, phat kđi bĕ hlăm ƀăng jang diih ya jing klei djŏ leh anăn bi mâo klei êđăp ênang,” (Y-Sakari 8:16)
Klei êmuh ksiêm mĭn: Ya klei Aê Diê iêô mthưr brei phung ƀuôn sang Israel ngă? Si klei yuôm jih mta klei anei? Si ênoh yuôm klei mtô anei kơ gŏ sang drei?
Leh ruê̆ wưng arăng mă ba jing mnă, phung ƀuôn sang Israel lŏ wĭt rŭ mdơ̆ng ƀuôn prŏng Yêrusalem leh anăn sang yang. Ƀiădah lĕ, klei Aê Diê mđing uêñ hĭn jing lŏ bi mrâo klei hdĭp ênuah ênô leh anăn jih jang klei bi mguôp. Khua Yang lač: “Klei anei brei diih ngă: blŭ bĕ klei sĭt nik hdơ̆ng diih, phat kđi bĕ hlăm ƀăng jang diih ya jing klei djŏ leh anăn bi mâo klei êđăp ênang, đăm mĭn hlăm ai tiê diih čiăng ngă klei jhat ôh hdơ̆ng diih, leh anăn đăm khăp kơ klei kat asei luar ôh,” (êlan 16-17). Anei jing hnơ̆ng čuăn kơ sa êpul êya dôk hdĭp mtrang ktlă knuih Aê Diê: klei sĭt nik, klei djŏ, klei khăp.
Blŭ bĕ klei sĭt nik hdơ̆ng diih (êlan 16), kñăm kơ klei yuôm klei sĭt leh anăn klei kpă hlăm klei bi mguôp hŏng ala ƀuôn ti êngao leh anăn wăt hlăm gŏ sang pô. Klei ngă djŏ hlăm gŏ sang kčưm dơ̆ng mơ̆ng klei blŭ leh anăn knuih dôk hdĭp sĭt kpă. Tơdah mâo klei luar, klei đăo knang srăng rai luč; ƀiădah tơdah rông ba klei sĭt kpă, snăn klei khăp mâo atur đĭ hriê kơ prŏng.
Khua Yang iêô mthưr: “đăm mĭn hlăm ai tiê diih čiăng ngă klei jhat ôh hdơ̆ng diih” (êlan 17a). Klei mtă anei kwang asăp Khua Yang Yêsu mtô hlăk Ñu kñăm kơ klei yuôm brei khăp kơ phung riêng gah msĕ si kơ drei pô leh anăn amâo đuôm ai djă pioh klei bi roh amâodah mâo klei mĭn ngă jhat kơ mnuih mkăn ôh (Y-Mathiơ 22:37-39; Y-Markôs 12:31). Klei blŭ ktrâo atăt anei mñă kơ drei klei yuôm kơ klei thâo khăp, thâo bi pap leh anăn bi thâo săng brei, hlăm jih jang klei bi mguôp hŏng mnuih mkăn, boh nik nak hlăm gŏ sang. Tui tluôn anăn, Khua Yang mtă klă mngač: “Đăm khăp kơ klei kat asei luar ôh” leh anăn hưn klă klei anăn jing klei Ñu “bi êmut” (êlan 17b). Klei anei blŭ ktang kơ klei jhat kjham kơ klei ƀuăn rơ̆ng soh wê, mbĭt anăn pŏk êlan kơ bruă ngă jhat ƀai mplư luar. Kyuadah knuih Aê Diê jing klei ngă djŏ leh anăn kpă ênô snăn Khua Yang bi êmut kơ jih jang bruă ngă msĕ snăn.
Hlăm klei hdĭp gŏ sang, trăn anei jing klei mñă sĭt klă snăk. Amĭ ama dôk hdĭp kpă ênô tơdah blŭ klei sĭt, djă pioh klei ƀuăn leh anăn dôk dơ̆ng ƀơ̆ng huă mtăp mđơr. Ung mô̆ mkŏ mdơ̆ng klei đăo knang tơdah hdĭp sĭt kpă leh anăn mkra msir klei amâo bi djŏ hŏng ai tiê klei mĭn bi grăng. Phung anak hriăm thâo khăp tơdah ƀuh amĭ ama dôk hdĭp kpă ênô leh anăn thâo bi pap brei. Anăn jing rup sa boh gŏ sang ktlă mngač klei kpă ênô leh anăn klei khăp Aê Diê. Dôk hdĭp ti krah ala ƀuôn bŏ hŏng klei bi kah phung leh anăn kƀah klei sĭt kpă, Khua Yang ăt iêô mthưr drei brei dôk hdĭp mdê hĭn. Dôk hdĭp kpă ênô amâo djŏ hdră mkra mjing mang ôh, ƀiădah brei hdĭp hlăm knhuah blŭ, knhuah mĭn leh anăn bruă ngă grăp hruê. Tơdah blŭ klei sĭt kpă, ai tiê amâo rông ba klei jhat ƀai ôh leh anăn jih jang klei bi mguôp mdơ̆ng ti dlông klei kpă ênô leh anăn klei khăp, gŏ sang leh anăn Phung Sang Aê Diê srăng ktlă mtrang klei êđăp ênang Aê Diê dôk mbĭt.
Ya klei brei ƀuh drei dôk hdĭp sĭt kpă hdơ̆ng pô?
Wah lač: Ơ Khua Yang, đru kâo dôk hdĭp sĭt kpă ti anăp Ih leh anăn hŏng jih jang mnuih. Akâo Ih krơ̆ng ai tiê kâo tlaih đuĕ mơ̆ng klei mplư luar leh anăn klei mĭn jhat ƀai. Brei gŏ sang kâo ktlă mtrang klei kpă ênô, klei êđăp ênang leh anăn klei khăp Khua Yang grăp hruê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Sakari 10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
