Xakhaliyas 8:16-17
Nqe cim zaj kawm:
“Ntawm no yog tej uas nej yuav tau ua: Ib leeg yuav tsum hais lus tseeb rau ib leeg, txiav txim ncaj ncees hauv tsev tu plaub, qhov uas ua siab dawb siab zoo coj kev thajyeeb los rau sawvdaws.” (Xakhaliyas 8:16)
Lus nug xav:
– Vajtswv nqua hu cov Yixalayees kom ua dabtsi?
– Tej no tseemceeb li cas?
– Tej lus qhia no muaj nqis li cas rau hauv tsevneeg?
Tomqab uas mus ua cev qhev rov qab los, haivneeg Yixalayees rov pib txhim lub nroog Yeluxalees thiab lub Tuamtsev. Tiamsis, yam Vajtswv saib tseemceeb tshaj tsis yog kev txhim vaj tse xwb, tiamsis yog kev rov txhim kho lawv kev ua neej thiab tej kev sib raug zoo. Tus Tswv hais tias: “Ib leeg yuav tsum hais lus tseeb rau ib leeg, txiav txim ncaj ncees hauv tsev tu plaub, qhov uas ua siab dawb siab zoo coj kev thajyeeb los rau sawvdaws. Tsis txhob tuav tswvyim ua phem rau lwm tus. Tsis txhob coglus ua timkhawv tsis tseeb (nqe 16-17). Ntawm no yog txojcai rau ib haivneeg uas qhia tshwm Vajtswv tus yamntxwv: qhov tseeb, ncajncees thiab hlub tshua.
Lo lus samhwm: “Ib leeg yuav tsum hais lus tseeb rau ib leeg” (nqe 16), qhia txog qhov tseemceeb ntawm kev hais lus tseeb thiab ua ncajncees hauv tej kev sib raug zoo, tsis hais hauv zejzog lossis hauv tsevneeg. Kev ua neej ncajncees hauv tsevneeg pib ntawm tej lus uas peb hais thiab tus yamntxwv uas peb coj. Thaum muaj lus dag, kev sib ntseeg siab yuav tawg; tiamsis thaum muaj qhov tseeb, txojkev hlub yuav loj hlob.
Tus Tswv nqua hu hais tias: “Tsis txhob tuav tswvyim ua phem rau lwm tus” (nqe 17a). Lo lus no yog raws nraim li Tswv Yexus tej lus qhia thaum Nws qhia kom hlub yus tej kwvtij zejzog ib yam li hlub yus lub cev, thiab tsis txhob khaws kev ntxub ntxaug lossis kev xav ua phem rau lwm tus (Mathais 22:37-39; Malakaus 12:31). Tej lus qhia no ceebtoom peb txog qhov cheem tsum ntawm kev sib koom siab, kev hlub tshua thiab kev totaub lwm tus hauv peb tej kev sib raug zoo, tshwjxeeb yog hauv tsevneeg. Tomqab ntawd, tus Tswv tseem samhwm meej hais tias: “Tsis txhob coglus ua timkhawv tsis tseeb” thiab tshaj tawm hais tias tej ntawd yog yam Nws “ntxub” (nqe 17b). Lo lus no qhia tias kev cog lus cuav lossis kev dag ntxias yog ib qho txhaum loj, thiab kuj nthuav dav mus txog txhua yam kev hais lus dag thiab kev ua tsis ncaj. Vim Vajtswv tus mojyam yog ncajncees thiab qhov tseeb, Nws thiaj ntxub tej haujlwm ntawd.
Hauv lub neej ntawm tsevneeg, ntu Vajluskub no yog ib lo lus ceebtoom uas muaj nqis heev. Niamtxiv ua neej ncajncees thaum lawv hais lus tseeb, ua raws li tej lus cog tseg, thiab coj ncaj rau txhua tus. Txij nkawm txhim kev sib ntseeg siab thaum nkawd ua siab ncaj thiab daws tej kev tsis sib haum los ntawm lub siab sib haum xeeb. Menyuam kawm paub hlub thaum lawv pom niamtxiv ua neej ncaj ncees thiab paub zam txim. Qhov ntawd yog daim duab ntawm ib lub tsev uas qhia tshwm Vajtswv txojkev ncajncees thiab txojkev hlub. Nyob hauv ib lub neej uas muaj kev sib cais thiab kev tsis ncaj ntau zuj zus, tus Tswv tseem nqua hu kom peb ua neej txawv. Kev ua neej ncajncees tsis yog hais hauv ntaub ntawv xwb, tiamsis yuav tsum ua tshwm dhau ntawm tej lus peb hais, peb xav thiab peb ua txhua hnub. Thaum peb hais lus tseeb, tsis khaws kev phem cia hauv siab, thiab txhim tej kev sib raug zoo raws kev ncajncees thiab kev hlub, ces peb tsevneeg thiab Pawg Ntseeg yuav qhia tshwm Vajtswv txojkev nyob nrog nraim kaj siab lug.
Thov Vajtswv,
Tus Tswv, thov Koj pab kom nyuam yaus ua neej tseeb tabmeeg Koj thiab tabmeeg txhua tus. Thov Koj tiv thaiv nyuam yaus lub siab kom deb ntawm kev dag ntxias thiab tej kev xav phem. Thov cia nyuam yaus tsevneeg qhia tshwm Koj txojkev ncajncees, txojkev kaj siab thiab txojkev hlub txhua hnub. Nyuam yaus tuav Tswv Yexus Khetos lub npe thov, Amees.
Yam dabtsi qhia tias peb tabtom ib leeg ua neej tseeb rau ib leeg?
Nyeem Vajluskub hauv peb lub xyoos: Xakhaliyas 10
Kênh Youtube BHKTHN:
