Klei Aê Diê Blŭ: Y-Yôsuê 24:14-15
Êlan kliăng: “…Bi kâo leh anăn phung hlăm sang kâo, hmei srăng mă bruă kơ Yêhôwa.” (Y-Yôsuê 24:15)
Klei êmuh ksiêm mĭn: Ya klei Y-Yôsuê ngă leh, tơdah thâo ñu giăm djiê? Ya bruă klam Y-Yôsuê hŏng ñu pô leh anăn hŏng gŏ sang, hlăk ñu hưn klă “… kâo leh anăn phung hlăm sang kâo, hmei srăng mă bruă kơ Yêhôwa”? Si brei gŏ sang drei hdĭp čiăng dưi hưn ktang kjăp msĕ si Y-Yôsuê?
Tơdah thâo kơ ñu giăm wĭt kơ Khua Yang, Y-Yôsuê iêô bi kƀĭn jih jang phung găp djuê Israel leh anăn phung khua diñu čiăng blŭ čhưn knhal tuč (Y-Yôsuê 24:1-13). Leh ñu lŏ mñă klei hƀuê ênuk bi mtlaih phung ƀuôn sang Aê Diê kbiă mơ̆ng klei jing hlŭn kơ phung Êjip, ñu mtă mtăn hŏng jih ai tiê: “Snăn ară anei huĭ mpŭ bĕ kơ Yêhôwa, leh anăn mă bruă kơ Ñu hŏng klei ênuah leh anăn hŏng klei sĭt suôr. Hwiê hĕ phung yang phung aê diih đưm mă leh bruă ti nah yŭ Êa Krông Ơphrat leh anăn hlăm čar Êjip, leh anăn mă bruă bĕ kơ Yêhôwa.” (êlan 14). Ñu thâo phung găp djuê anei dleh djă pioh klei dôk sĭt suôr hŏng Khua Yang, kyuanăn ñu mă gŏ sang ñu čiăng bi hmô, bi mđĭ ai kơ phung ƀuôn sang. Ñu hưn kjăp ktang hŏng phung ƀuôn sang Aê Diê snei, bruă ruah kơ hlei Pô diñu mă bruă jing klei diñu pô čuăn ruah, ƀiădah wăt tơdah hlei pô diñu ruah dưn, bi ñu dê leh anăn jih gŏ sang ñu knŏng mă bruă hjăn kơ Yêhôwa (êlan 15).
Y-Yôsuê thâo săng gŏ sang yơh jing atur kơ ala ƀuôn leh anăn kơ Phung Sang Aê Diê. Gŏ sang hdĭp ênuah ênô jing gŏ sang mdơ̆ng ti dlông atur Klei Aê Diê Blŭ leh anăn jih ai tiê mă bruă kơ Khua Yang. Gŏ sang čuăn ruah mă bruă kơ Aê Diê jing klei čuăn ruah kpă ênô. Y-Yôsuê čuăn kơ gŏ sang ñu jing gŏ sang hdĭp ênuah ênô, êlâo hĭn dơ̆ng mơ̆ng khua gŏ sang. Ñu hưn ktang kjăp hŏng phung ƀuôn sang Israel snei: “Bi kâo leh anăn phung hlăm sang kâo, hmei srăng mă bruă kơ Yêhôwa.”. Klei hưn anei brei ƀuh bruă klam khua gŏ sang, “Bi kâo … mă bruă kơ Yêhôwa”, jing êlâo hĭn. Amâo djŏ knŏng hjăn păn ñu dôk sĭt suôr hŏng Khua Yang ƀiădah ñu mâo bruă klam hŏng “phung hlăm sang kâo”, atăt gai mô̆, anak, čô hlăm gŏ sang hrăm mbĭt mă bruă kơ Yêhôwa. Tơdah gŏ sang hdĭp knhuah hdĭp ênuah ênô, thâo bi khăp leh anăn hrăm mbĭt mă bruă kơ Khua Yang, snăn anăn yơh jing atur čiăng dưi bi lar kơ lu gŏ sang mkăn hlăm Phung Sang Aê Diê, mbĭt anăn jing klei bi hmô jăk kơ phung ƀuôn sang riêng gah.
Hruê anei, čiăng kơ grăp boh gŏ sang drei dưi hưn msĕ si Y-Yôsuê snei: “Bi kâo leh anăn phung hlăm sang kâo, hmei srăng mă bruă kơ Yêhôwa.”, êlâo hĭn, brei khua gŏ sang hdĭp bi hmô jăk, suôr tliêr hŏng Khua Yang leh anăn Klei Aê Diê Blŭ, dôk sĭt suôr hŏng Khua Yang, hdĭp thâo khăp, ênuah ênô hlăm gŏ sang. Êngao anăn, brei thâo săng bruă klam pô hŏng êpul biăp điêt Khua Yang jao kơ drei hlăm gŏ sang, čiăng kơ êlâo hĭn brei kiă kriê dlăng ba klei hdĭp myang phung anak čô hŏng klei pioh mmông kkuh mpŭ kơ Khua Yang hlăm sang pô, bi mñă hdơ̆ng pô sĭt suôr kkuh mpŭ kơ Khua Yang leh anăn grăp čô jih ai tiê mă bruă kơ Khua Yang tui si klei pap Khua Yang brei. Hmăng hmưi grăp gŏ sang drei srăng jing klei bi hmô jăk kơ lu gŏ sang mkăn hlăm knhuah hdĭp ênuah ênô leh anăn thâo bi khăp hlăm klei atăt gai mơ̆ng Khua Yang leh anăn mơ̆ng Klei Ñu Blŭ.
Ya klei mnuih mkăn srăng lač tơdah dlăng kơ knhuah hdĭp gŏ sang drei?
Wah lač: Ơ Khua Yang, brei kâo bi hmô jăk hlăm knhuah hdĭp ênuah ênô leh anăn atăt gai gŏ sang kâo êbat mbĭt hŏng Khua Yang hlăm klei kpă ênô. Akâo Khua Yang mơak yua kâo leh anăn gŏ sang kâo bi guh kơang Anăn Khua Yang hŏng knhuah hdĭp ênuah ênô leh anăn thâo bi khăp hlăm gŏ sang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Sakari 8
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
