Yausuas 24:14-15
Nqe cim zaj kawm:
“…kuv thiab kuv tsevneeg, peb yuav pehawm tus Tswv tib leeg xwb.” (Yausuas 24:15)
Lus nug xav:
– Yausuas tau ua dabtsi thaum nws paub tias nws tabtom yuav tas simneej?
– Lo lus tshajtawm hais tias: “…kuv thiab kuv tsevneeg, peb yuav pehawm tus Tswv tib leeg xwb” qhia txog Yausuas feemxyuam rau nws tus kheej thiab nws tsevneeg li cas?
– Peb tsevneeg yuav tsum ua neej li cas thiaj hais tau khov kho ib yam li Yausuas?
Thaum Yausuas paub tias nws tabtom yuav tas simneej, nws tau hu cov Yixalayees txhua xeem thiab lawv cov thawjcoj los sib sau ua ke thiab hais tej lus kawg rau lawv (Yausuas 24:1-13). Tomqab uas rov hais txog Vajtswv txojkev cawm tus Tswv haivneeg dim ntawm kev ua qhev hauv tebchaws Iziv los, Yausuas cob lus rau lawv hais tias: “Txij no mus, nej yuav tsum hwm tus Tswv, muab siab npuab nws thiab muaj lub siab dawb pehawm nws. Tsis txhob pe tej vajtswv uas nej cov yawgkoob pe tim tebchaws Mexuputamias thiab nram tebchaws Iziv, nej pehawm tus Tswv tib leeg xwb” (nqe 14). Nws paub tias haivneeg no yuav tsis ua siab ncaj rau tus Tswv, yog li ntawd nws thiaj muab nws tsevneeg ua qauv los txhawb cov pejxeem. Nws tshaj tawm rau Vajtswv haivneeg khov kho hais tias, kev xaiv tus uas lawv yuav pehawm yog nyob ntawm lawv kev txiav txim siab, tiamsis txawm lawv yuav xaiv leejtwg los xij, nws thiab nws tsevneeg yuav pehawm tus Tswv tib leeg xwb (nqe 15).
Yausuas paub tias tsevneeg yog lub hauvpaus ntawm zejzog thiab Pawg Ntseeg. Tsevneeg uas ua neej ncajncees yog tsevneeg uas txawb lawv lub hauvpaus rau saum Vajtswv Txojlus thiab pehawm tus Tswv kawg siab kawg ntsws. Kev xaiv pehawm tus Tswv yog kev xaiv ncajncees. Yausuas txiav txim siab tias nws tsevneeg yuav yog ib tsevneeg ua neej ncajncees, pib kiag ntawm tus coj thawj hauv tsevneeg ua ntej. Nws tshaj tawm rau haivneeg Yixalayees khov kho hais tias: “Kuv thiab kuv tsevneeg, peb yuav pehawm tus Tswv tib leeg xwb.” Lo lus tshaj tawm no qhia txog feemxyuam ntawm tus coj thawj hauv tsevneeg, Nws hais tias “kuv… yuav pehawm tus Tswv” ua ntej tshajplaws. Tsis yog nws tus kheej ua siab ncaj rau tus Tswv, tiamsis nws tseem muaj feemxyuam rau nws “tsevneeg”, coj nws tus pojniam, menyuam thiab xeebntxwv koom ua ke pehawm tus Tswv. Thaum tsevneeg xyaum ua neej ncajncees, sib hlub thiab ua Vajtswv haujlwm ua ke, ces qhov ntawd yuav yog lub hauvpaus uas nthuav mus txog ntau tsevneeg hauv Pawg Ntseeg, thiab kuj ua tau qauv zoo rau cov neeg nyob ib puag ncig.
Niaj hnub nimno, yuav kom peb cov tsevneeg hais tau ib yam li Yausuas tias: “Kuv thiab kuv tsevneeg, peb yuav pehawm tus TSWV tib leeg xwb”; ua ntej tshaj, tus coj thawj hauv tsevneeg yuav tsum ua qauv zoo, nyob ze tus Tswv thiab Nws Txojlus, ua siab ncaj rau tus Tswv, ua neej sib hlub thiab ua ncaj hauv tsevneeg. Tsis tas li ntawd xwb, nws kuj yuav tsum paub tias nws muaj feemxyuam rau pab yaj me uas Vajtswv muab cob rau nws hauv tsevneeg, xub tseg sijhawm los txhim kho tej menyuam kev loj hlob sab ntsujplig los ntawm kev coj tsev neeg pehawm Vajtswv, sib qhuab ntuas kom ua siab ncaj pehawm tus Tswv, thiab kom txhua tus kub siab lug ua Vajtswv haujlwm raws li tej txiajntsig uas Vajtswv pub. Thov kom peb txhua tsevneeg dhau los ua qauv zoo rau ntau tsevneeg ntxiv txog kev ua neej ncajncees thiab sib hlub raws li Vajtswv Txojlus qhia.
Thov Vajtswv,
Tus Tswv, thov Koj pab kom nyuam yaus ua neej ua qauv hauv kev ncajncees, thiab coj nyuam yaus tsevneeg taug kev nrog Koj hauv kev ncajncees. Thov Koj siv nyuam yaus thiab nyuam yaus tsevneeg los ua kom Koj lub npe tau koob meej dhau ntawm lub neej ncajncees thiab kev sib hlub hauv tsevneeg. Nyuam yaus tuav Tswv Yexus Khetos lub npe thov, Amees.
Lwm tus yuav hais li cas thaum lawv pom peb tsevneeg txojkev ua neej?
Nyeem Vajluskub hauv peb lub xyoos: Xakhaliyas 8
Kênh Youtube BHKTHN:
