Pajlug 27:17-18
Nqe cim:
“Hlau hov hlau li cas, tej neeg ib leeg kawm ntawm ib leeg ib yam li ntawd. Tu koj tej txiv ncuavpias kom zoo koj thiaj tau noj. Tus tubtxib uas tu nws tus tswv zoo yuav tau txais lus qhuas” (Pajlug 27:17-18)
Lus nug xav:
– Hlau hov hlau ntse txhais li cas?
– Nqi zog ntawm ncajncees ua haujlwm yog dabtsi?
– Peb siv zaj kawm no rau yus li cas?
Hauv lub neej kev ntseeg, muaj qee ncua sijhawm peb hnov yus tus kheej zoo li yam cuabyeej uas twb tsis ntse lawm, yeej siv zog ua kom tiav yus feem xyuam tiamsis tsis muaj kev txawj ntse. Peb nqhis nqhawv lub neej tawg paj txi txiv, muaj nqis, thiab ua rau Vajtswv tau ntsejmuag, tiamsis zoo li tsis paub yuav mus txoj kev twg thiab ua tsis tiav dabtsi li. Ob nqe pajlug no qhia peb ib txoj haukev meej tseeb pab kom peb khiav dim lub neej zoo li ntawd los ntawm ob seem: kev qhuab ntuas los ntawm kwvtij zej zog thiab tus tubtxib ncajncees ua haujlwm lub siab.
Lo lus “hlau hov hlau kom ntse” (nqe 17 )qhia peb hais tias kev sib raug zoo hauv lub neej yog ib qho tseemceeb heev. Peb tsis muaj peevxwm loj hlob ib leeg , tiamsis dhau los ntawm kev sib tham thiab sib cuag nrog lwm tus peb thiaj loj hlob txhua fab. Hlau uas muab hov lawd yuav ntse thiab muaj nqis. Ib yam li ntawd, hauv peb lub neej, kev ntseeg, kev sib cav, kev sim siab, kev txhawb zog, thiab kev pab tswvyim ntawm cov phoojywg, kwvtij nkauj muam ntseeg Vajtswv yuav pab peb loj hlob muaj zog. Tej kev sib raug zoo pab sib hov hauv kev hlub kom ua ke dhau los ua tau neeg zoo thiab loj hlob hauv kev ntseeg.
Nqe 18 hais ntxiv: “Tu koj tej txiv ncuavpias kom zoo koj thiaj tau noj”. Tus tubtxib uas tu nws tus tswv zoo yuav tau txais lus qhuas”, qhov no txhawb peb kom ncajncees thiab ua siab ntev rau txhua yam haujlwm uas Vajtswv twb muab cob rau peb lawd. Leejtwg ua tib zoo tu tsob ntoo txiv ncuavpias yuav tau txais tej txiv zoo. Ib yam li ntawd, hauv kev ua haujlwm, tsev neeg, thiab kev ua Vajtswv haujlwm, muaj lub siab ncajncees thiab mob siab ua txawm tej yam ntawd me me los kuj coj koob hmoov los rau yus. Qhov no qhia peb hais tias tsis yog tsuas xav txog yam loj xwb, tiamsis yuav tsum muaj lub siab ncajncees rau txhua yam me me hauv lub neej txhua hnub. Vim dhau los ntawm kev ua ncajncees, Vajtswv yuav ua kom peb tej haujlwm muaj nqis thiab coj koob hmoov los rau peb.
Zaj kawm no qhia peb hais tias peb yuav tsum xub nrhiav kev mus sib txuas nrog cov neeg uas yuav pab tau peb loj hlob hauv kev ntseeg thiab kev ua neej. Tej zaum yog tej pab pawg me uas koom kawm Vajlugkub ua ke, tus neeg uas pab tswvyim rau sab ntsujplig lossis ib tug phoojywg ntseeg uas peb tso siab tau. Cov neeg no yuav nrog peb sib tham qhia siab, sib txhawb, thiab tsis txajmuag pab tswvyim rau yam uas peb yuav tsum hloov dua tshiab. Dua li ntawd, peb kuj yuav tsum ntuas lwm tus, pab lawv, txhawb lawv, thiab qhia Vajtswv kev hlub rau lawv. Peb yuav tsum ua ncajncees rau txhua tes haujlwm yau: Tsev neeg, kev ua Vajtswv haujlwm lossis ib tes haujlwm uas Vajtswv muab cob rau peb lawd peb yuav tsum ua tas siab tas ntsws (Mathais 25:21). Txawm yog tej haujlwm tsis loj, tiamsis yog peb ua siab ntev thiab ncajncees ua yuav muaj nqis ntev loo rau peb thiab peb tej kwvtij zejzog.
Thov Vajtswv,
Leej Txiv Saum Ntuj Ceebtsheej, ua tsaug rau tej lus txawj ntse hauv Koj Txojlus. Thov pab nyuam yaus hloov tej yam tsis zoo hauv nyuam yaus lub neej. Thov pab nyuam yaus paub hais tej lus qhuab ntuas rau nyuam yaus cov kwvtij nkauj muam ntseeg hauv kev hlub. Thov pab kom nyuam yaus muaj lub siab ncajncees thiab muab siab rau ua txhua yam haujlwm uas Koj twb muab cob rau nyuam yaus lawd kom tiav. Nyuam yaus tuav Tswv Yexus Khetos lub npe thov, Amees.
Peb yuav tsum tau hloov yam twg kom peb thiaj li yuav muaj lub neej tawg paj txi txiv rau Vajtswv?
Nyeem Vajluskub hauv peb lub xyoos: Exwthaws 10
Kênh Youtube BHKTHN:
