Tơdrong Pơđơ̆k 27:17-18
“Bơsei pat bơsei suĕng, Kŭm thoi bơngai pat pơhrăm buăl sư. Bơngai bu bơwei tơm hơra, gô sa plei sư; Bu chu bơwei yŏng sư, đe gô pơyom.” (Tơdrong Pơđơ̆k 27:17-18)
Nơ̆r jet tơchĕng pơwao:
– Bơsei pat bơsei suĕng wă khan kiơ?
– Lĕch đơ̆ng tơdrong tơnăp lăm tơdrong jang ‘noh kiơ?
– Lu bơ̆n yua ‘bai pơhrăm ‘nâu ăn kơ bơ̆n thoi yơ?
Lăm đon lui, phŏ đei năr ‘bôh mơn kơdih nhen thoi tơmam đe yua đĭ hơ̆l bơih pă han bơih, mălei oei adrin chu pơkeh hiơ̆k bơngơ̆t mălei ưh pă han bơih, lu bơ̆n hơpơi rơhing chăl arih đei yua, gĭt kăl păng pơ ư-ang anăn Kră Yang ‘lơ̆ng rŏ, mălei nhen thoi oei ‘ma ‘ngieo ưh kơ đei ‘bôh yua kiơ. ‘Bar trong lăm pơđơ̆k tơ kơpal ‘noh đei tơ’bôh trong năm trŏ rơđah wă rơngei đơ̆ng trong ‘nâu đei tơlĕch ‘bar tơdrong: Tơdrong pat hơmet lăm bơngai tơpôl lơ păng jơhngơ̆m bơngai wei lăng tơmam tơnăp.
Nơ̆r “Bơsei pat bơsei suĕng” (trong 17) đei tơ’blŏk gah tơdrong gĭt kăl lăm tơdrong tơ’bưh chăl arih. Lu bơ̆n ưh kơ đei arih păng wơ̆ ‘lŏ minh drô̆ ôh, mălei yua kơ đơ̆ng đei tơ’bưh hăm bơngai nai, na lu bơ̆n wơ̆ ‘lŏ tôm. Bơsei đei pat na jing han păng đei yua. Lăm chăl arih gah bơhngol păng kơdih akâu đei tơdrong hơtŭt băl, tơdrong pơlong, pơlung păng mơ̆ng kiơ̆ đơ̆ng nơ̆r bôl buăl, ‘nhŏng mŏ oh lăm đon lui gô tơgŭm lu bơ̆n wơ̆ ‘lŏ pran kơtang. Dôm tơdrong tơ’bưh băl gô tơgŭm bơ̆n pat hơmet băl lăm tơdrong ‘mêm wă kơ hơdai băl jing bơngai ‘lơ̆ng păng wơ̆ ‘lŏ hloh.
Pơtrơp trong 18: “Bơngai bu bơwei tơm hơra, gô sa plei sư; Bu chu bơwei yŏng sư, đe gô pơyom.”, pơlung jơhngơ̆m tơpăt păng pơnam lăm tơdrong jang Kră Yang pơjao. Bơngai bu chơ̆n bơwei tơm hơra gô sa plei sư. Lăm tơdrong jang, hnam dơnŏ dah bơ̆jang kơ Kră Yang, jơhngơ̆m tơnăp păng đĭ jơhngơ̆m mă đơ̆ng tơdrong iĕ gô ba ăn pŭn hiôk. Tơdrong ‘nâu gô bơtho ăn kơ bơ̆n ưh kơ sĭ đei yua tih đĕch ôh, mălei bơ̆n athei hiơ̆k bơwei dih băl păng tơnăp hăm tơdrong jang iĕ rim năr. Yua kơ đơ̆ng tơdrong tơnăp ‘noh, ‘Bok Kei-Dei gô pơm kơ tơdrong jang bơ̆n gĭt păng đei ba ăn pŭn hiôk.
‘Bai pơhrăm ‘nâu tơ’blŏk ăn kơ lu bơ̆n nuih tơguăt hăm lu bơngai gơh tơgŭm bơ̆n wơ̆ ‘lŏ lăm đon lui păng lăm chăl arih. Wă khan lăm tơpôl iĕ pơhrăm nơ̆r Kră Yang, bơngai bơtho gah bơhngol dah hơdai bơngai gah đon lui. Lu bơ̆n âu gô hơdai klah asong, pơlung păng huay kơ mơlâu tơlĕch nơ̆r pơma hơdai wă tơgŭm dih băl tơplih ‘nao păng wơ̆ ‘lŏ klaih kơ noh dơ̆ng, kư̆m pơ̆n nuih pat hơmet băl tơgŭm dih băl, pơm kơdranh păng pơlung’nhŏmg mŏ oh jum dăr. Lu bơ̆n athei ling lang tơnăp lăm rim tơdrong jang iĕ: Tơdrong jang, hnam dơnŏ, tơdrong awih awăn, dah mă lăm tơdrong jang mă Kră Yang pơjao, athei pơyơ̆r akâu jăn păng jang đĭ jơhngơ̆m (Mathiơ 25:21). Mă khan lu tơdrong jang ưh kơ tih, mălei dah adrin păng tơnăp, Kră Yang gô tuh pŭn hiôk păng ba ăn lơi yua sot đunh ăn kơ lu bơ̆n păng lu bơngai cheng bơ̆n.
Ơ Kră Yang ‘Bă pal plĕnh, bơnê kơ Ih, yua kơ tơdrong hơgei lăm nơ̆r Ih. Apinh tơgŭm inh sơng iŏk păng tơplih dôm tơdrong ưh kơ ‘lơ̆ng lăm chăl arih păng tơlĕch nơ̆r pơma tơpăt kơ ‘nhŏng oh inh. Apinh Ih tơgŭm inh ling lang tơpăt lămm tơdrong jang Kră Yang pơjao. Krao khan yua anăn Yêsu Krist, Amen.
Lu bơ̆n kăl kơ hơmet ming tơdrong kiơ wă kơ chăl arih đei yua kơ Kră Yang?
Đŏk Sơ̆p Hla bơar ‘Bok Kei-Dei lăm pêng sơnăm: Êsơtê 10
Kênh Youtube BHKTHN:
