Klei Aê Diê Blŭ: Y-Mathiơ 25:31-40
Êlan kliăng: “Jih jang găp djuê mnuih srăng bi kƀĭn ti anăp Ñu, leh anăn Ñu srăng bi kah digơ̆ jing dua phung msĕ si mgăt biăp bi kah biăp mơ̆ng bê” (Y-Mathiơ 25:32)
Klei êmuh ksiêm mĭn: Si Khua Yang hưn bi êdah kơ klei phat kđi knhal tuč? Ya ngă phung dôk tĭng hnuă mâo klei Khua Yang bi mni? Ya klei brei drei bi êdah čiăng thâo klă kơ drei jing phung biăp sĭt Khua Yang?
Khua Yang Yêsu hưn bi êdah kơ klei phat kđi knhal tuč snei: “Tơdah Anak Mnuih srăng hriê hlăm klei guh kơang Ñu mbĭt hŏng jih jang phung dĭng buăl jăk, hlăk anăn Ñu srăng dôk gŭ ti dlông jhưng mtao guh kơang Ñu” (êlan 31). Jih jang găp djuê mnuih srăng dôk dơ̆ng ti anăp Ñu. Khua Yang pô srăng bi kah digơ̆ jing dua phung msĕ si mgăt biăp bi kah biăp mơ̆ng bê. Khua Yang lač phung tĭng hnuă jing biăp sĭt Ñu, digơ̆ jing phung “Ama Kâo hơêč hmưi leh”, leh anăn digơ̆ jing phung Ñu iêô hriê “mă tŭ ƀuôn ala mtao mkra leh kơ digơ̆ mơ̆ng mphŭn hrih lăn ala” (êlan 34). Anei jing klei brei mdê yuôm bhăn êdimima Khua Yang mprăp leh mơ̆ng mphŭn hrih lăn ala pioh kơ phung Ñu ruah leh.
Biăp sĭt Khua Yang jing phung hdĭp bi êdah jih jang knuih jăk mơ̆ng sa čô đăo kơ Krist sĭt hlăm klei hdĭp grăp hruê. Digơ̆ đru phung dôk hlăm klei knap mñai, jum phung tue, čuă čhưn phung arăng ngă jhat, krư̆ kđăl…Klei digơ̆ bi kngăr jing Khua Yang lač digơ̆ ngă leh kơ Ñu pô lu bruă snăk, “Sĭt nik Kâo lač kơ diih, êjai diih ngă leh klei anăn kơ sa čô hlăm phung ayŏng adei Kâo đơ điêt anei jing klei diih ngă leh kơ Kâo yơh” (êlan 40).
Hruê anei, dlăng kơ Phung Sang Aê Diê, dleh snăk kơ drei thâo kral hlei jing phung đăo sĭt, hlei jing phung đăo mgưt, hlei biăp, hlei bê. Khua Yang amâo čiăng drei phat kđi ôh, ƀiădah brei drei dôk guôn tơl truh hruê knhal tuč, Khua Yang pô srăng bi kah biăp mơ̆ng bê hŏng klei klă. Hlăm hruê anăn, amâo srăng mâo sa klei čhuai ôh. Klei Khua Yang čiăng kơ drei jing phung biăp sĭt Ñu jing: brei drei thâo uêñ mĭn, đru phung ayŏng amai adei drei, jih jang phung Ñu dưm leh jŭm dar drei, phung ƀun ƀin knap mñai, digơ̆ dôk čiăng kơ klei đru. Khua ƀĭng kna Y-Yôhan mtô leh hlăm hră Y-Yôhan 3:17, “Tơdah arăng mâo ngăn dŏ lăn ala anei leh anăn ƀuh ayŏng adei ñu mâo klei kƀah, ƀiădah kđăl ai tiê kơ gơ̆, si klei Aê Diê khăp dưi dôk hlăm ñu lĕ?” (I Y-Yôhan 3:17). Lu blư̆ drei lač drei khăp kơ Khua Yang, mă bruă kơ Ñu, ƀiădah amâo mâo uêñ ôh kơ phung ayŏng adei drei. Čiăng dưi jing biăp sĭt hlăm hruê knhal tuč, klei yuôm jing amâo djŏ bruă drei djă ôh, kăn djŏ hră hưn kơ adŭ drei hriăm amâodah boh blŭ hŏng klei thâo rei, ƀiădah jing klei bi êdah klei đăo hlăm klei dôk dơ̆ng ƀơ̆ng huă hŏng klei khăp klă kơ phung riêng gah dôk hlăm klei knap mñai.
Si drei dôk bi êdah klei khăp, klei uêñ mĭn leh anăn đru phung dôk hlăm klei dleh dlan knap mñai?
Wah lač: Ơ Khua Yang khăp, đru kâo thâo kral sĭt klei Ih khăp kơ kâo čiăng kâo dưi khăp, uêñ mĭn leh anăn mâo bruă ngă klă đru phung ayŏng adei dôk hlăm klei knap mñai jŭm dar kâo. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: H’Êsther 6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
