Mathais 25:31-40
Nqe cim:
“Txhua haivneeg hauv qab ntuj yuav tuaj sib sau ua ke rau ntawm nws xubntiag, thiab nws yuav muab sawvdaws cais ua ob pab, ib yam li tus tswv yug yaj muab pab yaj cais tawm ntawm pab tshis mus” (Mathais 25:32)
Lus nug xav:
– Tswv Yexus piav txog hnub txiav txim zaum kawg li cas?
– Vim li cas cov uas nyob sab xis thiaj tau tus Tswv qhuas?
– Peb yuav tsum ua dabtsi qhia tias peb yog tus Tswv pab yaj tseeb?
Tswv Yexus hais txog hnub txiav txim zaum kawg hais tias: “Thaum Neeg Leej Tub los ua Vajntxwv, tagnrho cov timtswv ceebtsheej yuav nrog nws los, thiab nws yuav zaum saum nws lub zwmtxwv uas ci ntsa iab” (nqe 31). Txhua haivneeg yuav sawv ntawm Nws xubntiag. Tus Tswv yuav cais lawv ua ob pab ib yam li tus tswv yug yaj cais pab yaj thiab pab tshis. Cov tswv yug yaj hauv tebchaws Yudais nruab hnub tso yaj thiab tshis noj zaub ua ke hauv tib lub tshav zaub, tiamsis thaum tsaus ntuj lawv mam cais yaj thiab tshis nyias mus nyias. Tus Tswv hais tias cov uas nyob sab xis yog tus Tswv pab yaj tseeb, lawv yog cov uas tau Vaj Leej Txiv “txoj koob hmoov”, thiab lawv tau hu kom los “kav lub tebchaws uas twb npaj… thaum tsim lub ntiajteb los lawm” (nqe 34). Qhov no yog koob hmoov loj uas Vajtswv twb npaj cia txij thaum Nws tsim ntuj tsim teb los rau cov uas Nws xaiv.
Tus Tswv pab yaj tseeb yog cov uas ua neej qhia tshwm tus yam ntxwv ntawm tus ntseeg Tswv Yexus tseeb hauv lawv lub neej txhua hnub. Lawv pab cov neeg uas txomnyem, txais tos cov qhua tuaj deb, mus saib cov uas raug tsimtxom thiab raug kaw hauv tsev lojcuj, thiab lwm yam. Yam uas lawv xav tsis thoob yog Tswv Yexus hais tias lawv tau ua txhua yam ntawd rau Nws tus kheej. Nws hais tias: “Kuv qhia tseeb rau nej hais tias, thaum uas nej tau pab kuv cov kwvtij no ib tug, txawm yog tus ntawd muaj hwjchim yau dua cov los nej tseem pab nws thiab, qhov uas nej pab tus ntawd, twb yog nej pab kuv ntag!” (nqe 40).
Niaj hnub nimno, thaum peb saib rau hauv Pawg Ntseeg, peb nyuaj zeem paub hais tias leejtwg yog tus ntseeg tseeb thiab leejtwg yog tus ntseeg cuav, leejtwg yog yaj thiab leejtwg yog tshis. Tus Tswv tsis xav kom peb txiav txim, tiamsis kom peb tos txog hnub kawg, thaum ntawd tus Tswv yuav cais yaj thiab tshis kom meej. Hnub ntawd yuav tsis muaj ib qho yuam kev li. Yam tus Tswv xav kom peb uas yog pab yaj tseeb ua yog ua neej paub saib xyuas thiab pab peb cov kwvtij nkaujmuam, yog cov uas Vajtswv muab tso nyob ib ncig ntawm peb, cov uas tsis muaj chaw vamkhom thiab cov uas ntsib kev txomnyem, rau qhov lawv tabtom cheemtsum tau kev pab. Timthawj Yauhas qhia hauv I Yauhas 3:17 hais tias: “Yog tus npluanuj pom nws kwv nws tij txomnyem, tiamsis nws tsis quavntsej lawv li, tus ntawd yuav ua li cas hais tau hais tias nws yog tus uas hlub Vajtswv?” Muaj ntau zaus peb hais tias peb hlub tus Tswv, peb ua haujlwm rau tus Tswv, tiamsis peb tsis quav ntsej peb cov kwvtij nkaujmuam li. Yog li ntawd, yuav kom peb yog pab yaj tseeb nyob rau hnub kawg, qhov tseemceeb tsis yog nyob ntawm peb txoj haujlwm, peb daim ntawv povthawj kawm tiav, lossis peb tej lus hais, tiamsis yog nyob ntawm peb lub neej qhia tshwm txojkev ntseeg dhau ntawm kev hlub tshua thiab pab cov neeg nyob ibncig uas tabtom cheemtsum tau kev pab.
Thov Vajtswv,
Tus Tswv uas muaj kev hlub, thov Koj pab kom nyuam yaus niaj hnub tau txais Koj txojkev hlub, kom nyuam yaus ua neej hlub, saib xyuas thiab pab cov kwvtij nkaujmuam nyob ib puag ncig uas tabtom ntsib kev txomnyem thiab kev sim siab. Nyuam yaus tuav Tswv Yexus Khetos lub npe thov, Amees.
Peb qhia tshwm peb txojkev hlub, kev saib xyuas thiab kev pab rau cov uas tabtom ntsib kev txomnyem li cas?
Nyeem Vajluskub hauv peb lub xyoos: Exethaws 6
Kênh Youtube BHKTHN:
