Mathiơ 25:31-40
“Năr ei kơnh đĭ-đăng rim khul kon bơngai akŭm ‘bơ̆t anăp Inh, na Inh gô klah asong lu sư jing ‘bar khul, kư̆m thoi bơngai wei triu klah asong triu păng bơbe sư ‘bar khul.” (Mathiơ 25:32)
Nơ̆r jet tơchĕng pơwao:
– Kră Yang Yêsu roi tơbăt tơdrong Sư sek tơlang ning mônh thoi yơ?
– Yua kơ kiơ lu bơngai mă oei gah ‘ma na Kră Yang pơư?
– Bơ̆n kăl kơ pơm tơ’bôh tơdrong kiơ wă tơbăt bơ̆n jơ̆ triu Kră Yang tơpă?
Kră Yang Yêsu pơma gah tơdrong năr sek tơlang ning mônh “Năr ei kơnh Inh Kon Bơngai mơsêh tih-tin ‘lơ̆ng rŏ jur tơ teh âu hơdai păng lu linh jang ‘lơ̆ng, Inh gô oei kơpal tangdŏ pơtao ‘lơ̆ng rŏ.” (trong 31). Đĭ đăng kon bơngai gô dơ̆ng ‘bơ̆t anăp Sư. Kră Yang gô klah asong kon bơngai jing ‘bar khul thoi bơngai wei klah asong triu păng bơbe. Bơngai wei triu tơ dêh Juđê kơ ‘năr Sư achăng triu păng bơbe sa hơdai tơ lăm tơmăn, mălei truh tơ kơ sơ̆ na klah lê̆ triu păng bơbe phara. Kră Yang khan lu bơngai mă oei gah ‘ma noh triu Kră Yang tơpă, lu sư jơ̆ bơngai “’Bă Inh ăn kơ iĕm hiôk tơpă” păng khan kơ lu sư “năm mơ̆t oei tơ dêh Sư bĕ, Sư hơmet kơ iĕm anih đơ̆ng Sư pơjing plĕnh teh sơ̆ bơih” (trong 34). ‘Nâu bơih tơdrong tih dêh Kră Yang hơmet lê̆ đơ̆ng Sư pơjing plĕnh teh ‘măn kơ lu bơngai mă Sư rơih iŏk.
Triu Kră Yang noh lu bơngai arih tơ’bôh dôm tơdrong ‘lơ̆ng đơ̆ng minh ‘nu Bơngai Lui tơpă lăm tơdrong arih rim năr. Lu sư tơgŭm lu bơngai oei kơ’bah, sơng iŏk lu bơngai tơmoi, năm ngôi pơlung lu bơngai đe pơm kơnê̆ pơm bơnă.v.v… Tơdrong mă lu sư lăng hlĭch noh Kră Yang khan lu sư pơm ăn kơ Kră Yang lơ tơdrong, “Na Inh bơngai mă pơm Pơtao iĕm gô khan kơ iĕm thoi âu: Inh khan kơ iĕm tơpă, yua kơ iĕm băt tơgŭm mơnat kơ lu ‘nhŏng oh Inh âu mă iĕ hloh kơ lu iĕm đe sơ̆, tơdrong iĕm pơm noh dang iĕm tơgŭm Inh mơ̆n.” (trong 40).
Dang ei, kơplah lăng tơ Khul Bơngai Lui, bơ̆n lăng tơnat dêh wă kơ băt bơngai ayơ thoi yơ jơ̆ bơngai lui tơpă păng bơngai lui hơlĕnh, ayơ triu, ayơ bơbe. Kră Yang ưh kơ wă bơ̆n sek tơlang, na athei gô năr tuch luch, Kră Yang gô klah asong triu păng bơbe rơđah hơđăl. Lăm năr noh, gô ưh kơ đei hơwơ̆l ôh. Tơdrong Kră Yang wă kơ bơ̆n noh jơ̆ triu Kră Yang tơpă, arih athei hiơ̆k, tơgŭm bĕ kơ lu bơngai ‘nhŏng oh bơ̆n, lu bơngai mă oei jum dăr kơ bơ̆n, lu bơngai kơdrô̆, pơmat tat, lu sư kăl kơ tơgŭm. Yôhan jơ̆ng ‘bang Kră Yang đei bơtho lăm kơthơ I Yôhan 3:17 “Bơngai bu mơdrŏng ‘bôh ‘nhŏng oh sư dơnuh hin sơmă ưh kơ mơnat ăn tơmam kiơ kơ ‘nhŏng oh sư, dah ưh kơ tơdŏng dih băl tơdrong jang, noh thoi yơ khan sư ‘mêm kơ ‘Bok Kei-Dei lĕ?”, phŏ lơ wơ̆t bơ̆n khan bơ̆n ‘mêm kơ Kră Yang bơ̆jang kơ Sư, mălei ưh kơ đei hiơ̆k tơgŭm kơ lu ‘nhŏng oh bơ̆n. Wă kơ jing thoi triu tơpă lăm năr tuch luch ning mônh, tơdrong gĭt kăl ưh kơ sĭ khan đơ̆ng tơdrong jang, ‘băng hŏk dah nơ̆r pơma lơ̆ng na tơpă sư đơ̆ng pơm tơ’bôh đon lui đơ̆ng tơdrong arih ‘mêm mơnat tơpă hăm lu bơngai jum dăr kơ bơ̆n oei kăl kơ tơgŭm.
Ơ Kră Yang mă ‘mêm mơnat, apinh Ih tơgŭm inh ling lang mơn tơdrong ‘mêm Ih, wă kơ inh arih băt ‘mêm mơnat, hiơ̆k tơgŭm păng pơm tơ’bôh hloi tơchĕng dŏng tơgŭm tơpă kơ lu ‘nhŏng oh arih jum dăr kơ inh mă oei đei tơdrong pơmat, pơlong lăng, krao khan yua anăn Kră Yang Yêsu Krist, Amen.
Bơ̆n oei pơm tơ’bôh jơhngơ̆m ‘mêm mơnat, hiơ̆k tơgŭm lu bơngai đei tơdrong pơmat thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: Êsơtê 6
Kênh Youtube BHKTHN:
