Klei Aê Diê Blŭ: Klei Bi Hriêng 21:21
Êlan kliăng: “Hlei pô tui duah klei kpă ênô leh anăn klei khăp srăng ƀuh klei hdĭp, klei kpă ênô, leh anăn klei arăng mpŭ.” (Klei Bi Hriêng 21:21)
Klei êmuh ksiêm mĭn: Si êlan Klei Bi Hriêng anei hưn kơ klei hơêč hmưi mnuih thâo mĭn srăng mă tŭ? Si klei yuôm klei hơêč hmưi anei? Si êlan Klei Bi Hriêng anei đru drei thâo săng hdră êlan hdĭp?
Sa klei ƀuăn jăk mơak mâo tlâo mta, Mtao Salômôn lač anăn jing “klei hdĭp, klei kpă ênô, leh anăn klei arăng mpŭ”. Klei Aê Diê Blŭ brei thâo, anei jing dŏ Aê Diê leh anăn jing klei Ñu srăng brei kơ mnuih huĭ mpŭ kơ Ñu (Klei Mmuñ Hđăp 3:1-3; 27:6; 75:4-10; Klei Bi Hriêng 8:18). Kyuanăn drei amâo dưi ôh tui duah čiăng mâo klei hdĭp, klei kpă ênô leh anăn klei arăng mpŭ, ƀiădah anei jing boh tŭ dưn tơdah drei “tui duah klei kpă ênô leh anăn klei khăp”.
“Tui duah” mblang jing tui tiŏ, hiu duah bi mâo, bi êdah ai tiê klei mĭn êpa mhao, hur har, gĭr ktĭr, amâo mdei ôh hlăm bruă ngă amâodah tui duah ya mta klei, leh anăn tinei yơh jing “klei kpă ênô leh anăn klei khăp”. “Klei kpă ênô” mâo wăt klei kpă ênô myang ti anăp Aê Diê leh anăn klei kpă ênô hlăm ƀuôn sang ti anăp mnuih. Kyuanăn, tui duah klei mtăp mđơr mblang jing tui duah jih jang klei djŏ hlăm ală Aê Diê, amâo djŏ knŏng hlăm ală phung mnuih ôh. Bi “klei khăp” mblang jing klei hdĭp jăk, klei sĭt suôr. Kyuanăn, mnuih tui duah klei khăp jing mnuih thâo mĭn duh kơ klei khăp, jing mnuih hdĭp klei hdĭp thâo khăp. Mnuih “tui duah klei kpă ênô leh anăn klei khăp” snăn srăng mâo klei jăk mơak kyuadah anei jing klei Aê Diê mtă leh anăn klei Ñu čiăng: “… ya klei Yêhôwa mtă brei ih ngă. Jing klei ngă klei kpă leh anăn khăp klei pap, leh anăn êbat mbĭt hŏng Aê Diê ih hŏng klei luă gŭ.” (Y-Mika 6:8).
Mâo sa mta klei mdê yuôm snăk, mnuih thâo mĭn “tui duah klei kpă ênô leh anăn klei khăp”, mblang jing tui tiŏ klei hdĭp tui hlue Klei Aê Diê Blŭ mtô leh anăn thâo khăp srăng mă tŭ “klei hdĭp, klei kpă ênô, leh anăn klei arăng mpŭ”. Blŭ mdê jing, mnuih tui duah “klei kpă ênô” srăng mă tŭ “klei kpă ênô” leh anăn kdlưn hĭn mơh, diñu wăt srăng mă tŭ “klei hdĭp, … leh anăn klei arăng mpŭ” mơh. Mnuih “tui duah klei kpă ênô leh anăn klei khăp” srăng duah ƀuh lu hĭn kơ klei diñu hmăng hmưi. Mnuih anăn duh kơ klei bhiăn Aê Diê, tui duah klei kpă ênô, bi mlih wĭt, diñu duah ƀuh klei kpă ênô, wăt klei guh kơang leh anăn klei hdĭp. Amâo mâo bi kngăr ôh tơdah bruă tui tiŏ klei kpă ênô leh anăn klei khăp ba wĭt klei mưn prŏng prĭn msĕ snăn, kyuadah mnuih tui tiŏ klei yuôm bhăn tui si klei Aê Diê čiăng srăng mâo klei mưn msĕ si Klei Aê Diê Blŭ ƀuăn: “Ƀiădah brei diih duah êlâo hĭn ƀuôn ala mtao Aê Diê leh anăn klei kpă ênô Ñu, leh anăn Ñu srăng thiăm brei kơ diih jih jang mnơ̆ng anăn.” (Y-Mathiơ 6:33).
Hruê anei, Khua Yang Yêsu brei leh kơ drei klei kpă ênô, klei hdĭp, leh anăn klei mpŭ hŏng klei bi mtlaih, brei drei wĭt lač kơ klei brei prŏng prĭn anăn hŏng klei hdĭp kpă ênô leh anăn klei khăp.
Si drei tuôm thâo kral leh klei ƀuăn jăk mơak anei?
Wah lač: Ơ Khua Yang, lač jăk kơ Khua Yang brei leh kơ kâo djăp mta klei jăk mơak hŏng Khua Yang Yêsu, akâo Khua Yang đru kâo grăp hruê hdĭp klei hdĭp thâo khăp leh anăn kpă ênô hŏng phung riêng gah kâo, čiăng kơ hŏng klei anăn kâo dưi bi êdah klei guh kơang Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 119:57-120
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
