Tơdrong Pơđơ̆k 19:17
“Bơngai bu băt mơnat kơ bơngai dơnuh hoh, noh thoi ăn kơ Kră Yang mơng; Kră Yang pơkă wă tơwih ăn thoi tơdrong ‘lơ̆ng sư pơm.” (Tơdrong Pơđơ̆k 19:17)
Nơ̆r jet tơchĕng pơwao:
– Pơtao Sôlômô tơlĕch nơ̆r bơtho ayơ kơplah tơ’bơ̆p tơ’bưh hăm bơngai dơnuh hin?
– Pơtao lăng, pơm tơdrong ‘nâu đei yua tih dêh ayơ?
– Chu kiơ̆ nơ̆r bơtho gô iŏk tơdrong kiơ?
Đơ̆ng sơ̆ kon bơngai ngăl đei tơdrong hiơ̆k tơgŭm, lăng tơ bơngai mă mơdrŏng lơ hloh kơ bơngai dơnuh hoh, “‘bôh bơngai mơdrŏng ‘maih pơm juăt” lăm nơ̆r bơngai chih tơdrong juăt kon bơngai lăm teh đak anăn sư Nguyễn Bình Khiêm đei chih: “Oei đei tơmam, oei đei jê, oei đei buăl juăt. Ưh pă đei por sŏng, pă đei tơdrô, pă đei buăl juăt!” mă khan lei ră, noh tơdrong juăt kon bơngai, ưh kơ sĭ khan tơdrong bơngai hli yom kơ Kră Yang ôh.
Lăm âu, Pơtao Sôlômôn đei nơ̆r bơtho tơpă: “Mơnat kơ bơngai dơnuh hoh,” păng gĭt ‘biơ̆ hloh kơplah pơtao pơgơ̆p tơdrong “Mơnat kơ bơngai dơnuh hoh” hăm tơdrong “ăn kơ Kră Yang mưng”. Kon bơngai lăm teh đak wă pơm lơ tơdrong ăn kơ bơngai mơdrŏng, na hơpơi wă kơ đei jơ năr pơm ăn kơ bơngai mơdrŏng mơng hloi tăm wă kơ pơm buăl juăt tơ’bưh hăm lu sư, păng hơmĕng gô đei lơ tơdrong đơ̆ng lu sư. Mălei pơtao Sôlômôn bơtho khan, dah “mơnat kơ bơngai dơnuh hoh” lei bơ̆n ăn kơ ‘Bok Kei-Dei, jơ̆ Yang mơdrŏng tih tin hloh, mơng! Tơdrong juăt gah năr Sa’bat (Bơtho khôi juăt 15:7-11). Pơma hơđăl tơdrong Kră Yang ‘Bok Kei-Dei kơ kon pơlei Sư gah tơdrong ‘mêm kơ bơngai dơnuh hoh. Pah ‘Nao pơma hơđăl hloh nơ̆r bơtho ‘nâu đơ̆ng Kră Yang Yêsu bơtho păng ‘bok Yakơ (Lăng Mathiơ 25:34-46, păng Yakơ 2:1-13). Lăm noh dơ̆ng, nơ̆r pơđơ̆k ‘nâu tơ’bôh lăm bơngai mă mơnat păng tơgŭm “bơngai dơnuh hoh” lĕch đơ̆ng tơdrong tơbăt kơ Kră Yang păng lui yom kơ Sư. Tơdrong bơtho tơkêng lăm Mathiơ 6:19-24). Đei tơdrong pơgơ̆p tơ’bưh kơjăp lăm jơhngơ̆m lăng hơmrah hăm tơdrong kơkuh păng ‘mêm yom kơ ‘Bok Kei-Dei, păng kư̆m ưh kơ sĭ khan bơngai mơnat kơ bơngai dơnuh hoh tơpă ôh, mălei minh ‘nu bơngai kơkuh tơpă păng ‘mêm yom kơ ‘Bok Kei-Dei, ‘noh bơngai hơlăng hơmrah păng mơnat kơ bơngai dơnuh hoh. “Bơngai bu mơdrŏng ‘bôh ‘nhŏng oh sư dơnuh hin sơmă ưh kơ mơnat ăn tơmam kiơ kơ ‘nhŏng oh sư, dah ưh kơ tơdŏng dih băl tơdrong jang, noh thoi yơ khan sư ‘mêm kơ ‘Bok Kei-Dei lĕ?” (I Yôhan 3:17).
“Bơngai mơnat kơ bơngai dơnuh hoh” ưh kơ đei wă kơ đe ‘bôh dah wă kơ đei apah. Mălei yua kơ tơdrong ‘mêm păng mă loi sư yua kơ jơhngơ̆m hli yom kơ Kră Yang. Mă khan lei ră, Sơ̆p hla bơar ‘Bok Kei-Dei khan tơbăt Kră Yang ‘Bok Kei-Dei lăng ‘bôh “Kră Yang pơkă wă tơwih ăn thoi tơdrong ‘lơ̆ng sư pơm”. Lăm tơdrong Kră Yang bơtho tơ kơpal kông. Kră Yang Yêsu bơtho: “Dah iĕm wă tơgŭm đe tơmam, dah jên, iĕm ‘nĕ roi kơ đe, mă bôl juăt kơdih kư̆m ‘nĕ kơ roi. Iĕm thĕng đĕch mă-lei ‘Bă bơ̆n tơ plĕnh ti ‘bôh boih tơdrong iĕm pơm ‘noh, thoi noh na Sư gô bơnê kơ iĕm tơpă.” (Mathiơ 6:3-4). Nơ̆r pơkă gah tơdrong apah lăm Pah ‘Nao ưh kơ đei pơma hơđăl kơ tơdrong pŭn hiôk gah sĕch akâu akar, tơdrong mơdrŏng, dah đei pơyom. Mălei pơma kơ tơdrong pŭn hiôk gah bơhngol kơplah băt Kră Yang lăp đon kơ bơ̆n pwng hlôi mơn tơdrong đei yua. Apinh Kră Yang ăn kơ bơ̆n ling lang arih ‘mêm mơnat kiơ̆ nơ̆r Kră Yang bơtho.
Ơ Kră Yang, apinh Ih ăn kơ inh đei jơhngơ̆m păng tơpang ti Kră Yang wă kơ inh ‘mêm mơnat. Klah asong dôm tơdrong kiơ Ih ăn kơ inh wă tơgŭm kơ lu bơngai dơnuh hoh jum dăr kơ inh. Krao khan yua anăn Kră Yang Yêsu Krist, Amen.
Bu jơ̆ “bơngai dơnuh hoh” jum dăr kơ bơ̆n? Bơ̆n wă pơm thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: Markôs 16
Kênh Youtube BHKTHN:
