Klei Aê Diê Blŭ: Klei Bi Hriêng 19:17
Êlan kliăng: “Hlei pô brei pap kơ mnuih ƀun ƀin jing brei Yêhôwa čan, leh anăn Yêhôwa srăng lŏ bi wĭt kơ ñu tui si bruă jăk ñu ngă leh.” (Klei Bi Hriêng 19:17)
Klei êmuh ksiêm mĭn: Ya klei Mtao Salômôn mtă mtăn, tơdah dôk ti anăp mnuih ƀun ƀin? Tui si mtao, si klei mblang yuôm kơ bruă ngă anei? Ya klei tŭ dưn mâo tơdah gưt klei mtă mtăn anei?
Mơ̆ng đưm truh ară anei anak mnuih khăng mđing uêñ kơ phung mdrŏng sah hĭn kơ phung ƀun ƀin, “Ƀuh mnuih mdrŏng čiăng mă mjing găp djuê yơh”. Hlăm klei duê Klei Mưng Lăn Ala, pô mkra klei duê Nguyễn Bỉnh Khiêm čih snei: “Adôk mah, adôk prăk, adôk dĭng buăl; Jih êsei, jih kpiê, jih ih kâo!” Ƀiădah lĕ, klei anăn jing Klei Mưng Lăn Ala gơ̆, amâo djŏ knhuah dôk hdĭp mnuih huĭ mpŭ kơ Aê Diê ôh.
Tinei, Mtao Salômôn brei sa klei mtă mtăn sĭt êmĭt: “Pap kơ mnuih ƀuh ƀin”, leh anăn klei mdê yuôm hĭn tơdah mtao bi mguôp bruă “Pap kơ mnuih ƀun ƀin” hŏng bruă “Brei Yêhôwa čan”. Mnuih lăn ala êlưih čiăng ngă lu mta bruă kơ phung mdrŏng sah, tơl hmăng hmưi mâo mmông găl čiăng brei kơ phung mdrŏng čan čiăng mjing klei bi mguôp hŏng diñu, leh anăn čang hmăng lŏ mă wĭt lu mta mnơ̆ng mơ̆ng diñu. Ƀiădah Mtao Salômôn mtô snei, tơdah “Pap kơ mnuih ƀun ƀin” snăn jing drei brei kơ Yêhôwa čan, Pô Mdrŏng Sah Dlông Yuôm Hĭn Kơ Jih Jang, čan! Klei Bhiăn kơ Thŭn Sabat (Klei Mtô Mñă Klei Bhiăn 15:7-11) hưn klă mngač kơ klei Aê Diê čiăng phung ƀuôn sang Ñu thâo khăp kơ phung ƀun ƀin. Klei Bi Mguôp Mrâo bi klă hĭn mơh klei mtă mtăn anei hŏng klei mtô mơ̆ng Khua Yang Yêsu leh anăn mơ̆ng Y-Yakơ (dlăng Y-Mathiơ 25:34-46, leh anăn Y-Yakơ 2:1-13).
Mbĭt djiêô anăn, êlan Klei Bi Hriêng anei brei ƀuh klei mtrŭt mnuih thâo pap leh anăn đru “phung ƀun ƀin” kbiă hriê mơ̆ng klei thâo kral Khua Yang leh anăn huĭ mpŭ kơ Ñu. Klei Mtô Ti Dlông Čư̆ hlăm Y-Mathiơ 6:19-24: mâo klei bi mguôp suôr tliêr ti krah ai tiê kmah hŏng klei kkuh mpŭ leh anăn khăp kơ Aê Diê. Sa čô mnuih kmah, brei kơ phung ƀun ƀin lu mta mnơ̆ng, ka sĭt mơh jing mnuih kkuh mpŭ leh anăn khăp kơ Aê Diê, leh anăn ăt ka sĭt mơh jing mnuih thâo pap kơ phung ƀun ƀin, ƀiădah sa mnuih SĬT ÊDI kkuh mpŭ leh anăn khăp kơ Aê Diê, snăn khăng jing mnuih mâo ai tiê kmah leh anăn thâo pap kơ phung ƀun ƀin, “Tơdah arăng mâo ngăn dŏ lăn ala anei leh anăn ƀuh ayŏng adei ñu mâo klei kƀah, ƀiădah kđăl ai tiê kơ gơ̆, si klei Aê Diê khăp dưi dôk hlăm ñu lĕ?” (I Y-Yôhan 3:17).
“Hlei pô brei pap kơ mnuih ƀun ƀin” amâo ngă bruă anăn kyua čiăng kơ mnuih mkăn ƀuh amâodah bi mni kơ pô ôh, ƀiădah kyua klei khăp leh anăn boh nik nak kyua klei huĭ mpŭ kơ Khua Yang. Ƀiădah lĕ, Klei Aê Diê Blŭ lač klă Aê Diê ƀuh leh anăn “srăng lŏ bi wĭt kơ ñu tui si bruă jăk ñu ngă leh”. Hlăm klei mtô ti dlông čư̆, Khua Yang Yêsu mtô: “Ƀiădah tơdah ih brei mnơ̆ng pap, đăm brei ôh kngan điâo ih thâo ya klei kngan hnuă ih ngă, čiăng kơ mnơ̆ng ih brei pap arăng amâo thâo ôh; knŏng hjăn Ama ih Pô ƀuh hlăm klei hgăm srăng mưn ih.” (Y-Mathiơ 6:3-4). Klei ƀuăn kơ klei Khua Yang srăng mưn hlăm Klei Bi Mguôp Mrâo amâo kñăm kơ klei jăk mơak hlăm kđeh, klei mdrŏng sah amâodah klei arăng mpŭ ôh, ƀiădah lač kơ klei jăk mơak hlăm klei hdĭp myang, tơdah thâo klei Khua Yang mơak kơ drei leh anăn thâo kral sa klei hdĭp mâo klei tŭ dưn. Akâo Khua Yang brei drei dôk hdĭp thâo khăp nanao tui si klei Khua Yang mtô.
Hlei jing “mnuih ƀun ƀin” jŭm găn drei? Ya klei drei čuăn ngă?
Wah lač: Ơ Khua Yang, brei kâo mâo ai tiê leh anăn jih dua kngan msĕ Khua Yang čiăng kơ kâo thâo khăp, kah mbha klei Khua Yang brei kơ kâo, čiăng đru phung dleh knap jŭm găn kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Markôs 16
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
