I Kôrintô 6:12-20
“Mă-lei ning-mônh sư wă pơrăm đĭ ‘bar anăn ‘noh, kơlih kơ ưh pă yua boih năr noh kơnh. Mă-lei gah akâu bơ̆n ưh kơ sĭ ‘Bok Kei-Dei pơjing akâu bơ̆n wă kơ bơ̆n ngôi pơyô kư̆ kă ôh. Sư pơjing akâu bơ̆n wă kơ bơ̆n jang tơdrong Yŏng bơ̆n Yêsu Krist na Yŏng bơ̆n wei-lăng akâu bơ̆n.” (I Kôrintô 6:13b)
Nơ̆r jet tơchĕng pơwao:
– ‘Bok Pôl tơlĕch nơ̆r pơma tơpăt gĭt kăl ayơ gah akâu jăn?
– Tơdrong sư bơtho kiơ kơ tơdrong kăl tơm ayơ?
– Ih kăl kơ arih thoi yơ kiơ̆ kơ lăm teh đak lăp đon rơngei yua akâu jăn mơ̆ng kơ wă?
Kiơ̆ kơ tơdrong juăt hlôh băt gah lu bơngai Grĕk lăm jơhnơr mă mônh sơ̆ sư khan bơhngol noh kăl hloh, na akâu jăn noh “bơngai ‘bŭ atâu dah hnam bơnă wei bơhngol”. Thoi noh, đei ‘bar tơdrong tơchĕng tơplơ̆ dih băl gah akâu jăn: Tơchĕng gah chu pơmat akâu, chă trong wă kơ kĕ pơgăn tơdrong ‘maih wă kiơ̆ kơ sĕch akar. Tơdrong tơchĕng hlôh mă ‘bar ‘noh hloh kơ tôm tơdrong thoi lăm Kôrintô. Tơdrong nai dơ̆ng, hăm tơdrong ‘bok Pôl bơtho gah tơdrong rơngei lăp đon kiơ̆ kơ sĕch akar wă.
‘Bok Pôl đei tơlĕch lơ nơ̆r pơma tơpăt gĭt kăl gah akâu jăn, tơdrong mă gĭt kăl tơdrong truh kơplah noh sư ‘bơm “tơdrong ‘maih wă” “pơm đi” (trong 13-18). Mă mônh, sư pơma tơpăt “Akâu jăn ưh kơ sĭ yua kơ tơdrong ‘maih wă kiơ̆ sĕch akar ôh, mă ‘noh yua kơ Kră Yang” (trong 13). Sư pơtih gia, bơ̆n sa tơmam kiơ tơmơ̆t lăm klak ưh kơ gĭt kăl ôh, yua kơ gô lĕch đĭ tơ ‘nguaih, mălei tơdrong kiơ đei pơm hăm akâu jăn bơ̆n ‘noh sư pha. Yua kơ nhen thoi Kră Yang Yêsu đei akâu jăn iung arih, akâu jăn lu bơ̆n kư̆m iung arih lăm năr tôch kơnh. Wă tơ’bôh Kră Yang dŏng pơklaih bơhngol đĕch noh ưh kơ trŏ kiơ̆ kơ Sơ̆p hla bơar ‘Bok Kei-Dei. Bơhngol ‘noh kăl, trŏ thoi noh, mălei akâu jăn kư̆m gĭt kăl, yua kơ akâu jăn âu gô iung arih lăm năr tơ’bơ̆p Kră Yang.
Mă ‘bar, pơma tơdrong kăl tơm ‘bok Ađam păng yă Ewơ jing minh sĕch akar đơ̆ng pôm jơhngơ̆m đon gah akâu akar (Blŭng a 2:24). Wă tơ’bôh tơdrong pơgơ̆p sĕch akar ‘noh bơih tơdrong jrŭ să, gĭt kăl. Yua kơ thoi noh, pơgơ̆p pôm đon lăm akâu jăn hăm lu pơm đi jơ̆ tơdrong pơgơ̆p ưh kơ trŏ ‘lơ̆ng păng pơm tơdrong yoch.
Mă pêng, sư tơ’blŏk tơdrong kăl tơm gah tơdrong Yang, ‘noh jơ̆ Yang Bơhngol ‘Lơ̆ng oei lăm chăl arih bơngai lui “Lu bơ̆n ‘Bok Kei-Dei huai iŏk hăm tơmam gĭt tơpă, hăm kon Sư kơdih lôch tơ ‘long pơglang. Yua kơ thoi noh, akâu jăn lu bơ̆n gĭt kăl dêh, păng athei yua wă “ưang Anăn Kră Yang ‘Bok Kei-Dei” (trong 20).
Hloh kơ đĭ đăng tôm tơdrong, lăm teh đak lu bơ̆n mă oei arih dang ei lăp đon kơ tơdrong rơngei gah sĕch akar “mălei huay kơ pơrăm bơngai bu”! Đei lơ bơngai rơngei kiơ̆ kơ hrăp măt lăng hăm lu rup pơm tơdrong kơnê̆; rơngei mơ̆ng kơ wă pơm pơyô kư̆kă adrol kơ pơjing ŭnh om, ‘nguaih kơ ŭnh om klo kăn, mălei oei năm tơ hnam akŭm păng kư̆m pơ̆n bơ̆jang kơ Kră Yang! Kon pơlei Kră Yang athei ‘blŏk: “Akâu jăn ưh kơ sĭ wă pơm kiơ̆ kơ sĕch akar ôh, mălei noh yua kơ Kră Yang păng Kră Yang yua kơ akâu jăn” (trong 13b). Lăm năr hơtuch, Kră Yang dŏng pơklaih bơ̆n tôm tơdrong mă akâu jăn, mă bơhngol. Yua kơ thoi noh, kơplah oei arih tơ ala teh, athei yua akâu jăn bơ̆n mă ‘lơ̆ng rơgoh yua kơ Kră Yang wă ưang Anăn Sư.
Ơ Kră Yang, apinh Ih tơgŭm inh ‘blŏk kơ akâu jăn inh gĭt kăl dêh. Inh apinh pơkăm pơkă gô yua akâu jăn inh wă ưang Anăn Ih lăm năr hơtuch kơnh akâu jăn gơh tơplih arih hơdai Ih tơ pơlei ‘lơ̆ng. Yua Anăn Kră Yang Yêsu Krist, Amen.
Lu bơ̆n hăm oei druh kiơ̆ tơdrong ‘maih wă kiơ̆ kơ sĕch akar na ưh kơ chu yom nơ̆r Kră Yang pơkă gah tơdrong bơwei akâu jăn ưh?
Đŏk Sơ̆p Hla bơar ‘Bok Kei-Dei lăm pêng sơnăm: Markôs 3
Kênh Youtube BHKTHN:
