Klei Aê Diê Blŭ: I Kôrantô 6:9-11
Êlan kliăng: “Đăm mplư diih pô ôh …” (I Kôrantô 6:10a)
Klei êmuh ksiêm mĭn: Ya klei Khua ƀĭng kna Y-Pôl lač čiăng bi mdih phung lač diñu jing phung đăo kơ Krist ƀiădah ăt dôk kma êlam hlăm klei soh? Si klei Khua Yang Yêsu mtô phung khua ƀĭng kna čiăng thâo kral khua pô hưn êlâo mgưt leh anăn klei đăo mgưt? Si ngă čiăng kơ drei amâo mplư drei pô ôh?
Akŏ kdrêč 6, Khua ƀĭng kna Y-Pôl ƀuah phung đăo ti Kôrantô hlăk diñu ba klei mâo hlăm êpul ayŏng adei hlăm Phung sang Aê Diê kơ “phung amâo kpă ênô”, jing “phung amâo đăo” phat kđi (I Kôrantô 6:1, 6). Hlăm êlan 9, ñu lač “phung wê” anăn “amâo srăng dưn ƀuôn ala mtao Aê Diê ôh”. Tơdah hmư̆ snăn, đa đa mnuih khăng ngă soh ya klei soh ñu čih leh hlăm êlan 10, dôk nanao hlăm klei hdĭp soh jhat, ƀuh hdjul ai tiê kyua pô amâo jing “mnuih amâo kpă ênô”, “mnuih amâo đăo”. Kyua anăn, Khua ƀĭng kna Y-Pôl lač leh sa pruê̆ čiăng bi mdih diñu: “Đăm mplư diih pô ôh!” (êlan 10). Lač mdê, đăm bi mĭn ôh knŏng phung amâo đăo kơ Khua Yang Yêsu jing mnuih amâo kpă ênô, jing phung amâo dưi dưn Ƀuôn Ala Mtao! Phung mâo anăn jing phung đăo kơ Krist ƀiădah dôk lĕ hlăm klei ngă knhông, phung kkuh rup yang, phung tlĕ piu,phung êkei ngă soh hdơ̆ng êkei leh anăn phung mniê ngă soh hdơ̆ng mniê, phung knĕ, phung khăp kơ prăk, phung kreh kpiê ruă, phung kreh dlao wač, phung plah mă ăt msĕ snăn mơh, ăt kăn dưi dưn Ƀuôn Ala Mtao rei, kyua diñu ăt jing phung amâo kpă ênô. Diñu hdĭp hlue si knuih hdĭp “êlâo dih”, knuih hdĭp hlue si kđeh, knuih hdĭp mklăk hŏng knuih hdĭp dưi “rao diih leh, bi doh jăk diih leh, yap kpă” (êlan 11).
Tơdah mtô phung ƀĭng kna klei thâo kral phung khua pô mtô soh leh anăn klei đăo mgưt, Khua Yang Yêsu lač: “Amâo djŏ ôh grăp čô hlei pô lač kơ kâo, ‘Ơ Khua Yang, Ơ Khua Yang’ srăng mŭt hlăm ƀuôn ala mtao adiê, ƀiădah knŏng hlei pô ngă tui si Ama kâo hlăm adiê čiăng” (Y-Mathiơ 7:21). Khua Yang Yêsu brei ƀuh sa klei huĭ hyưt jing lu mnuih čŏng mplư pô, truh hruê knhal tuč diñu lač: “Ơ Khua Yang, Ơ Khua Yang, amâo djŏ hĕ hmei tuôm hưn êlâo leh hlăm anăn ih, suôt yang jhat hlăm anăn ih, leh anăn ngă lu bruă myang hlăm anăn ih?”. Hlăk anăn Khua Yang srăng iêô phung “Ơ Khua Yang, Ơ Khua Yang”, ƀiădah amâo hdĭp hlue si klei Khua Yang mtô snei: “Kâo amâo tuôm thâo kral diih ôh; đuĕ bĕ mơ̆ng kâo, Ơ phung soh jhat” (Y-Mathiơ 7:22-23). Khua Yang mtô tơdah amâo čiăng čŏng mplư drei pô, brei dlăng hlăm klei hdĭp pô dlăng djŏ hlue si hnơ̆ng čuăn doh jăk leh anăn klei khăp Khua Yang mơ̆ amâodah ka, kyua dlăng kơ boh srăng thâo ana (Y-Mathiơ 7:16-18).
Čiăng mtă kơ phung đăo đăm čŏng mplư pô ôh, Khua ƀĭng kna Y-Pôl lač leh klei bi mdê plah wah mnuih “êlâo dih” jing knhông, kkuh kơ rup yang,.. hŏng mnuih yap kpă leh “hlăm anăn Khua Yang Yêsu Krist leh anăn hlăm Yang Mngăt Jăk Aê Diê drei”, pô anăn srăng mâo klei hdĭp “rao diih leh, bi doh jăk diih leh” (êlan 11). Akâo kơ Khua Yang đru drei hdĭp djŏ hŏng anôk jing mrâo Aê Diê brei kơ pô čiăng kơ drei amâo mplư drei pô ôh, ƀiădah hdĭp bi mơak kơ Aê Diê.
Brei drei ksiêm dlăng klei hdĭp pô hlue si ya hnơ̆ng čuăn čiăng amâo mplư drei pô ôh?
Wah lač: Ơ Khua Yang, kâo bi mni lač jăk kơ Ih kyua klei bi mdih “Đăm mplư diih pô ôh”. Akâo kơ Ih đru kâo hdĭp nanao hlăm klei bi mguôp sĭt suôr hŏng Khua Yang leh anăn ksiêm dlăng klei hdĭp huĭ mpŭ kâo năng hŏng Klei Aê Diê Blŭ mơ̆ čiăng kơ kâo amâo hdĭp mplư kâo pô. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Markôs 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
