1 Kauleethaus 6:9-11
Nqe cim:
“Nej tsis txhob rov dag nej…” (1 Kauleethaus 6:9b)
Lus nug xav:
– Timthawj Paulus hais lolus twg kom ceebtoom cov neeg uas lees hais tias yog tus ntseeg tiamsis tseem tsau tsawv hauv txojkev txhaum?
– Tswv Yexus qhia Nws cov thwjtim txoj haukev twg kom zeem paub cov cevlus cuav thiab kev ntseeg cuav?
– Yuav ua li cas kom peb tsis txhob rov dag yus?
Nyob rau ntawm feem lus xub thawj tshooj 6, Timthawj Paulus cem cov ntseeg hauv Kauleethaus vim lawv coj cov ntseeg tej teebmeem hauv Pawg ntseeg mus rau cov neeg tsis ncajncees thiab “cov tsis ntseeg” tu (1 Kauleethaus 6:1, 6). Hauv nqe 9, Paulus qhia hais tias “Cov neeg uas ua phem ua qias yuav tsis muaj feem mus nyob Vajtswv lub Tebchaws”. Thaum hnov li ntawd, qee tus neeg uas pheej ua tej kev txhaum uas hais ntawm nqe 10, tsau tsawv rau lub neej kev txhaum, tej zaum lawv yuav zoo siab rau lawv tus kheej vim xav hais tias lawv tsis yog “cov neeg tsis ncaj ncees” lossis “cov neeg tsis ntseeg”. Vim li ntawd, timthawj Paulus thiaj hais ib lolus ceebtoom lawv: “Tsis txhob rov dag nej…” (nqe 9b). Hais rau lwm seem, Tsis txhob xav tias tsuas yog cov neeg uas tsis lees yuav Tswv Yexus ua Tus Tswv xwb thiaj yog neeg tsis ncajncees thiab tsis tau mus Vajtswv lub tebchaws! Tiamsis cov uas muaj npe yog tus ntseeg tseem pheej ua kev nkauj kev nraug, pe mlom, deev luag pojniam luag txiv, txivneej deev txivneej, pojniam deev pojniam, ua tubsab, ntshaw luag tug, quav cawv, thuam lwm tus thiab txhav luag tug. Cov neeg ntawd yuav tsis muaj feem mus nyob Vajtswv lub Tebchaws li, vim lawv tseem yog cov neeg tsis ncajncees. Lawv ua neej raws li lub neej “yav tas los”, uas yog lub neej nqaij tawv, lawv tsis coj tsis ua neej dawbhuv ncajncees (nqe 11).
Tswv Yexus qhia cov thwjtim zeem paub cov cevlus cuav thiab kev ntseeg cuav, Tswv Yexus hais tias: “Tsis yog txhua tus uas hu kuv hais tias, ‘Tus Tswv! tus Tswv,’ ces yuav tau mus Ntuj Ceebtsheej. Tiamsis tsuas yog cov uas ua raws li kuv Txiv tus uas nyob saum ntuj lub siab nyiam, thiaj tau mus xwb” (Mathais 7:21). Tswv Yexus qhia pom yam uas txaus ntshai yog ntau leej cimciv rov dag yus thiab txog hnub kawg lawv yuav hais tias: “Tus Tswv! tus Tswv, peb twb tuav koj lub npe qhia Vajtswv Txojlus, peb tuav koj lub npe ntiab dab thiab ua ntau yam txujci tseemceeb!’ Thaum ntawd Tswv Yexus yuav teb rau cov neeg uas hu “Tus Tswv, Tus Tswv” tiamsis tsis ua li Tus Tswv tej lus qhia hais tias, ‘Cov neeg siab phem, cia li khiav mus, kuv tsis paub nej!’ (Mathais 7:22-23). Tswv Yexus qhia hais tias yog tsis xav kom yus rov dag yus, cia li tig tshuaj xyuas yus lub neej saib puas tau coj raws li Vajtswv Txojkev dawbhuv qhia thiab Nws txoj kev hlub lawm tau, vim thaum pom cov txiv ces yeej paub tsob ntoo (Mathais 7:16-18).
Timthawj Paulus ntuas cov ntseeg kom lawv tsis txhob rov dag lawv, nws hais txog kev ua neej sib txawv ntawm lub neej qub thiab lub neej tshiab, lub neej qub nyiam ua kev nkauj kev nraug, pe mlom… lub neej tshiab yog “raug ntxuav kom huv lawm thiab raug muab cais ua dawb huv thiab raug suav tias ncaj ncees rau hauv tus Tswv Yexus Khetos lub npe thiab hauv peb tus Vajtswv tus Ntsujplig lawm” (nqe 11 HMOWSV). Thov Vajtswv pab peb ua neej kom phim lub neej tshiab uas Nws pub rau peb, tsis txhob cia peb rov dag yus tuskheej tiamsis cia peb ua lub neej haum Vajtswv siab.
Thov Vajtswv,
Tus Tswv, ua tsaug rau Koj lo lus ceebtoom, “Tsis txhob rov dag nej”. Thov pab nyuam yaus pheej niaj hnub ua neej nrog Koj sib raug zoo, thiab tshawb xyuas nyuam yaus txojkev ntseeg saib puas coj raws li Koj Txojlus lawm tau, kom nyuam yaus tsis rov dag nyuam yaus tus kheej. Nyuam yaus tuav Tswv Yexus Khetos lub npe thov, Amees.
Peb yuav tsum tshuaj xyuas peb lub neej li cas kom peb thiaj tsis rov dag peb?
Nyeem Vajluskub hauv peb lub xyoos: Malakaus 2
Kênh Youtube BHKTHN:
