Mathiơ 24:43-44
“Thoi noh na iĕm athei kơchăng bĕ, yua kơ iĕm ưh kơ băt layơ Inh mă Kră Yang iĕm wă jur dơ̆ng”. (Mathiơ 24:42)
Nơ̆r jet tơchĕng pơwao:
- Kră Yang Yêsu yua rup tơngla hnam kral kơchăng kơ bơngai wă tơtông wă bơtho tơdrong kiơ?
- Nơ̆r “Kơchăng” tơ’bôh Kră Yang wă kơ lu jơ̆ng ‘bang athei arih lăm tơdrong thoi yơ?
- Lu tơdrong kiơ lămg tơdrong arih ngăl pơhlŭ bơ̆n ưh kơchăng?
Kră Yang Yêsu oei yua rup pơtih ‘bônh kơ hlôh wă tơbăt gah tơdrong truh ưh kơ tam băt adrol năr Kră Yang wă jur dơ̆ng. Ưh kơ đei lai yơ bơngai wă tơtông roi lê̆ adrol kơ bơngai nai băt tơdrong sư wă tơtông. Mă-lei, yua kơ minh tơdrong kiơ noh, dah tơ’ngla hnam băt lê̆ adrol jơ ayơ bơngai tơtông wă mơ̆t tơ hnam sư, rŏ lăng tơ’ngla pă gơh tep bơih păng kral kơchăng prăt măng wă bơwei, đơ̆ng roi tơdrong pơtih gia âu, Kră Yang khan kơ lu jơ̆ng ‘bang Sư: “Na iĕm athei kơchăng ‘nĕ kơ thoi bơngai noh, hli kơ Inh Kon Bơngai wă jur tơ iĕm dơ̆ng kơplah iĕm ưh kơ lêng ê.” (Mathiơ 24:44). Tơdrong âu, Kră Yang ưh kơ pơtih Sư hăm bơngai tơtông, mă-lei Kră Yang wă pơma gah năr Kră Yang wă jur dơ̆ng ưh kơ băt lê̆ adrol kư̆m thoi bơngai wă tơtông truh bŏk tơnăr hnam kơplah kơmăng. Đơ̆ng rŏng kơnoh, Lu Jơ̆ng ‘Bang Kră Yang Pôl păng Pêtrôs kư̆m tơ’blŏk dơ̆ng tơdrong pơtih gia ‘nâu wă bơtho khul bơngai lui gah tơdrong Kră Yang wă jur dơ̆ng: “Mă iĕm kư̆m băt nhên mơ̆n tơdrong ưh kơ đei bu băt Kră Yang Yêsu wă jur layơ, kư̆m thoi bơ̆n ưh kơ băt kơ bơngai wă tơtông klĕ sư wă truh măng ayơ” (I Têsalônik 5:2): “Gah tơdrong Kră Yang Yêsu Krist wă jur, Sư wă jur tơpă, mă Sư wă jur thoi bơngai tơtông ưh kơ ăn đe băt…” (II Pêtrôs 3: 10).
Adrol kơ noh, Kră Yang Yêsu roi tơbăt kơ lu Jơ̆ng ‘Bang Sư gah tơdrong truh adrol kơ năr Kră Yang wă jur dơ̆ng (Mathiơ 24:1-42). Lăng đơ̆ng dôm tơdrong đêl đei truh tơpă lăm teh đak, kon pơlei Kră Yang mă khan ưh kơ băt jơ ‘năr Kră Yang truh, mă-lei kăl kơ băt kơnăl Kră Yang gô truh păng jơ năr Kră Yang jur rai wă jê̆, thoi noh athei kơchăng. nơ̆r “kơchăng” lăm tơdrong Kră Yang pơma pơtih gia wă tơ’bôh lăm jơhngơ̆m tơ’ngla hnam chang gô kơplah bơngai tơtông gô mơ̆t tơ hnam sư, Kră Yang kư̆m wă kơ lu jơ̆ng ‘bang ling lang kơchăng, krăng chang gô Kră Yang wă jur dơ̆ng, yua kơ Kră Yang roi tơbăt bơih kơ lu sư dôm tơdrong tơdra lê̆ adrol Kră Yang wă jê̆ jur dơ̆ng.
Lu bơ̆n dang ei kư̆m athei đei jơhngơ̆m krăng kơchăng, ‘nĕ ăn tơdrong pơhlŭ jum dăr pơhlŭ pơlung lu bơ̆n păng pơm ăn kơ lu bơ̆n hiơt đĭ dôm tơdrong kơnhăm lăm chăl arih lu bơ̆n oei chang gô Kră Yang Yêsu wă jur dơ̆ng. lơ wơ̆t yua kơ kiơ̆ Kră Yang đunh sơnăm pơm kơ lu bơ̆n jing lăng đĕch, hiong tơdrong kơnhăm, ưh pă krăng kơchăng. athei ‘blŏk yang kơnê̆ đei lơ trong wă pơhlŭ dah pơlung lu bơ̆n. Pôl jơ̆ng ‘bang Kră Yang đei roi tơbăt “Na dang ei đĭ đăng kơ bơ̆n ‘nĕ pă jô̆ yo kơ bơngai mă yoch noh, hli kơ sư hiong lăm tơdrong yang Satan, yua kơ bơ̆n băt kơ yang Satan sư pơhlŭ hơgei dêh.” (II Kôrintô 2:11). Lu bơ̆n kăl kơ băt kơnăl ‘bơ̆t dôm tơdrong wă pơhlŭ ‘mêm kơ tơdrong ala teh, arih mơ̆ng kơ wă ưh pă lui ngeh kơ năr Kră Yang wă jur dơ̆ng. đĭ đăng dôm tơdrong noh gô pơm kơ lu bơ̆n hiơt hiong đĭ lăm jơhngơ̆m chang gô năr Kră Yang Yêsu wă jur dơ̆ng. athei ling lang đei jơhngơ̆m krăng kơchăng, “Sư đĭ hrŭk hơmet hơbĕn ao boih. Ŭnh kơđeng sư oei khơ̆ng ” (Luka 12:35).
Kơkuh kơ Ih Kră Yang Tơ’ngla ‘mêm mơnat, apinh Ih ăn kơ inh ling lang đei jơhngơ̆m kơchăng chang gô năr Kră Yang wă jur dơ̆ng wă kơ inh gơh oei hơdai Ih ling lang pŭn hiôk. Krao khan yua anăn Kră Yang Yêsu Krist, Amen.
Lu bơ̆n oei arih lăm jơhngơ̆m krăng kơchăng chang gô năr Kră Yang Yêsu wă jur dơ̆ng thoi yơ?
Đŏk sơ̆p hla bơar nơ̆r ‘Bok Kei-Dei lăm pêng sơnăm: Nêhêmi 11
Kênh Youtube BHKTHN:
