Mathais 24:43-44
Nqe cim:
“Nej yuav tsum ceevfaj zov tos, rau qhov nej tsis paub lub sijhawm uas nej tus Tswv yuav los” (Mathais 24:42)
Lus nug xav:
– Tswv Yexus siv tus duab tswv tsev ceevfaj zov tubsab tuaj qhia yam dabtsi?
– Lo lus “ceevfaj” qhia paub tus Tswv xav kom cov thwjtim ua neej muaj kev coj zoo li cas?
– Tej yam twg hauv kev ua neej ntxias peb tsis nco ceevfaj zov?
Tswv Yexus tau siv tus duab yoojyim totaub los ceebtoom txog qhov uas tsis paub hnub Tswv Yexus rov qab los. Tsis muaj ib tug tubsab twg qhia hais tias nws yuav tuaj nyiag peb tsevneeg li. Tiamsis, ib lub vimchiv twg, yog tus tswv tsev paub tau tias lub sijhawm twg tubsab tuaj ces tus tswv tsev yeej yuav tsis pw tsaug zog li, nws yuav nyob tshab hmo zov. Tom qab uas hais zaj lus pivtxwv no, tus Tswv hais rau cov thwjtim tias: “Yog li ntawd, nej yuav tsum zov tos, rau qhov Neeg Leej Tub yuav los lub sijhawm uas nej tsis ceevfaj” ( nqe 44). Qhov no, tsis yog tus Tswv muab Nws piv zoo li tubsab, tiamsis yog Nws xav hais txog qhov tsis muaj leejtwg paub, tus Tswv hnub yuav los li tus tubsab tuaj nyiag hmo ntuj. Tom qab no, cov Timthawj Paulus thiab Petus kuj rov hais txog tus duab no qhia cov ntseeg txog lub sijhawm tus Tswv rov qab los: “Rau qhov nej yeej paub lawm hais tias hnub uas tus Tswv Yexus yuav los, nws yuav los ib yam li tubsab tuaj hmo ntuj” (I Thexalaunikes 5:2); “Hnub uas tus Tswv los, hnub ntawd nws yuav los ib yam li tubsab tuaj” (II Petus 3:10).
Ua ntej ntawd, Tswv Yexus twb qhia rau cov thwjtim paub txog tej xwm tshwm muaj ua ntej hnub tus Tswv rov qab los (Mathais 24:1-42). Muab tawm hauv tej uas tshwm muaj hauv ntiajteb, tus Tswv haivneeg txawm yog tsis paub meej hnub tus Tswv los, los cheemtsum paub meej tias tus Tswv yuav los thiab hnub ntawd los ze lawm, yog li ntawd yuav tsum ceevfaj zov tos. Lo lus “ceevfaj zov tos” hauv zaj lus pivtxwv tus Tswv hais qhia paub lub siab xub tos ua ntej ntawm tus tswv tsev thaum paub tubsab tuaj nyiag. Tus Tswv kuj xav kom cov thwjtim muaj lub siab ceevfaj, tos rawv hnub uas tus Tswv rov qab los, vim tus Tswv twb qhia lawv paub tej cim uas qhia ua ntej ntsig txog hnub tus Tswv rov los.
Nimno peb kuj yuav tsum muaj lub siab ceevfaj, tsis txhob cia tej kev sim siab ibncig ntxias peb tsaug zog thiab ua kom peb tsis nco lub homphiaj ua neej nyob tos Tswv Yexus rov los. Ntau zaus nrog tus Tswv mus ntev xyoo ua rau peb nkees, tsis kam mus lossis xwv kom peb tsaug zog. Timthawj Paulus ceebtom hais tias“Kuv ua li no kom dab Ntxwgnyoog thiaj ntxias tsis tau peb; rau qhov peb twb paub nws tes haujlwm tas lawm” (II Kauleethaus 2:11). Peb cheemtsum ceevfaj ntawm tej kev dag ntxias hlub lub ntiajteb, tso lub neej ntws mus ywj siab thiab ua xyem xyav txog qhov tus Tswv rov qab los. Tagnrho tej yam no yuav ua rau peb hnov qab lub siab uas npaj tos tus Tswv rov qab los. Cia li muaj lub siab npaj tos rawv, “nej yuav tsum hnav ris tsho khov kho tos thiab taws teeb cia” (Lukas 12:35).
Thov Vajtswv,
Vajtswv tus muaj kev hlub, thov Koj pab kom nyuam yaus ua neej muaj lub siab tos rawv hnub Tswv Yexus rov qab los, kom nyuam yaus tau nrog Koj nyob kaj siab mus ibtxhis. Nyuam yaus tuav Tswv Yexus lub npe thov, Amees.
Peb tabtom ua neej muaj lub siab tos rawv hnub uas tus Tswv rov qab los zoo li cas?
Nyeem Vajluskub hauv peb lub xyoo: Nehemis 11
Kênh Youtube BHKTHN:
