II Petus 2:3-10
Nqe cim:
“Vajtswv pab tau cov neeg uas Vajtswv kav lawm kom lawv dim lawv tej kev nyuaj siab…” (II Petus 2:9a)
Lus nug xav:
– Timthawj Petus hais txog ob qhov kev cawm twg?
– Qhov cim ntawm cov neeg uas tau cawm no yog dabtsi?
– Peb ua li cas thaum zeem paub txoj koob hmoov thiab Vajtswv txojkev hlub peb?
Hauv ob zaj kawm ua ntej, peb zeem paub Vajtswv tus yamntxwv dawbhuv, ncaj ncees dhau los ntawm qhov rau txim rau cov neeg uas tsis mloog tus Tswv lus. Hnub no, peb kuj zeem paub Vajtswv tus yamntxwv hlub thaum Nws cawm cov neeg uas yog Nws tug, txawm yog muaj qee zaus lawv ua txhaum Vajtswv Txojlus.
Tim ib, Vajtswv cawm Nau-es thiab nws tsevneeg (nqe 5). Nyob rau “lub ntiajteb thaud”, muaj “cov neeg loj heev… lawv yog cov neeg uas ua tau heev thiab muaj koob meej nyob txheej thaum ub los lawm.” (Chivkeeb 6:4) ces Vajtswv “tsuas cawm Nau-es tus uas qhia txojkev ncaj ncees, thiab cawm xya leej uas nrog Nau-es xwb” (Mww2022). Tus Tswv cawm ib tsevneeg pheej tshaj tiamsis tso tseg ntau leej uas tibneeg saib muaj nqis. Tej zaum muaj ntau leej yuav hais tias Nau-es tau cawm vim nws qhov kev ua neej zoo dua lwm tus, “yog ib tug neeg ncaj ncees thiab nws yeej ibtxwm ua zoo tas nws simneej” (Chivkeeb 6:9), thiab yog “tus uas qhia txojkev ncaj ncees” (nqe 5). tiamsis ua ntej yuav hais tawm cov lus qhuas ntawd ces Vajtswv Txojlus qhia paub: “tus Tswv txaus siab heev rau Nau-es” (Chivkeeb 6:8). Ua lwm seem lus hais, Nau-es yog ib tug neeg tau koob hmoov, tau Vajtswv xaiv, tau Vajtswv paub, thiab ua neej nrog tus Tswv los ntawm txojkev ntseeg, nov yog qhov uas txais Vajtswv txoj koob hmoov.
Tim ob, Vajtswv cawm Lauj (nqe 7). Timthawj Petus hais tias: “Vajtswv pab Lauj tus uas yog neeg ncaj ncees dim”. Nyuaj muab Lauj hu ua tus neeg ncaj ncees vim tej haujlwm uas nws ua. Qhov uas tsimnyog qhuas Lauj yog nws paub mloog thiab ntseeg timtswv tej lus ceebtoom. Zoo ib yam li Anplahas, Lauj tau suav hais tias yog neeg ncaj ncees thiab ntseeg Vajtswv tsis yog ntawm kev ua haujlwm zoo, tus Tswv suav hais tias ncaj ncees los ntawm txojkev ntseeg. Timthawj Petus qhia paub Lauj tsis ua lossis tsis koom nrog cov kev txhaum pojniam yuav pojniam txivneej yuav txivneej hauv lub nroog, dua li ntawd Lauj tseem mob siab thiab ntxhov siab thaum pom tej kev txhaum ntawd puv npho. Txawm li ntawd los, Lauj lub neej thaum yuav kawg yog ib lub neej tsis muaj qabhau, tsevneeg thiab cajces raug foom tsis zoo.
Nau-es yog tus neeg uas xaiv ua raws li Vajtswv Txojlus nyob hauv lub ntiajteb uas tawmtsam tus Tswv, thiab Lauj tsuas yog ib tug neeg qaug zog khiav mus nyob hauv lub tebchaws uas ua phem ua qias. Txawm li ntawd los, hauv Vajtswv txoj koob hmoov hlub, nkawd ob leeg puavleej tau cawm vim nkawd yog cov neeg uas tau Vajtswv koob hmoov, tau suav ncaj ncees los ntawm tus Tswv kev ncaj ncees. Vajtswv yog tus ncaj ncees thiab kuj yog kev hlub. Thaum zeem paub txoj koob hmoov thiab Vajtswv kev hlub, peb cia li tas siab kawm Vajtswv Txojlus thiab ua neej raws li Nws qhia, txawm yog ib ncig peb yuav zoo li cas los xij.
Thov Vajtswv,
Vajtswv, nyuam yaus ua Koj tsaug vim tej koob hmov hlub thiab kev tabpov cawm dim Koj pub. Thov pab nyuam yaus ncaj ncees nrog Koj thiab ua raws Koj qhia txhua hnub. Nyuam yaus tuav Tswv Yexus Khetos lub npe thov, Amees.
Peb puas zeem paub Vajtswv tus yamntxwv hlub los ntawm qhov Nws rau txim thiab tivthaiv tus ntseeg Nws?
Nyeem Vajluskub hauv peb lub xyoo: Nehemis 6
Kênh Youtube BHKTHN:
