Klei Aê Diê Blŭ: II Y-Pêtrôs 2:3-10
Êlan kliăng: “Snăn Khua Yang thâo bi mtlaih phung mpŭ kơ Aê Diê mơ̆ng klei lông dlăng…” (II Y-Pêtrôs 2:9a)
Klei êmuh ksiêm mĭn: Ti dua klei bi mtlaih Khua ƀĭng kna Y-Pêtrôs bi êdah? Ya jing anôk mdê mơ̆ng phung mâo klei bi mtlaih anei? Si drei lŏ wĭt ngă tơdah thâo kral klei khăp leh anăn klei pap Khua Yang?
Hlăm klei hriăm êlâo, drei thâo kral leh knuih doh jăk leh anăn kpă ênô Aê Diê mơ̆ng klei Ñu bi kmhal sĭt nik hlei phung amâo gưt ôh asăp Ñu. Hruê anei, drei thâo kral msĕ mơh klei khăp Aê Diê tơdah Ñu bi mtlaih hlei phung jing dŏ Ñu, wăt tơdah mâo blư̆ digơ̆ ngă soh hŏng Klei Ñu Blŭ dưn.
Tal sa, Aê Diê bi mtlaih Y-Nôê leh anăn gŏ sang gơ̆ (êlan 5). Hlăm “lăn ala hđăp”, mâo lu “mnuih prŏng dlông…jing phung mnuih jhŏng ktang hlăm ênuk đưm. Diñu jing phung hing ang” (Klei Mphŭn Dơ̆ng 6:4), ƀiădah Aê Diê knŏng “bi mtlaih Y-Nôê, sa čô pô mtô klei kpă ênô, mbĭt hŏng kjuh čô mkăn” đuč. Aê Diê kiă kriê leh sa boh gŏ sang mnuih amâo mâo klei hing ang ôh, ƀiădah Ñu lui hĕ phung lu mâo klei jing kdlưn hĭn tui si ală mnuih dlăng. Mâo lu mnuih lač Y-Nôê mâo klei bi mtlaih kyuadah gơ̆ jing kpă ênô hĭn kơ phung mkăn, jing “mnuih kpă ênô, amâo mâo klei năng ƀuah ôh, Y-Nôê êbat mbĭt hŏng Aê Diê” (Klei Mphŭn Dơ̆ng 6:9), leh anăn gơ̆ “jing sa čô pô mtô klei kpă ênô” (êlan 5). Ƀiădah lĕ, êlâo kơ mâo klei bi mni anăn Klei Aê Diê Blŭ brei thâo: “Y-Nôê mâo klei pap ti anăp ală Khua Yang” (Klei Mphŭn Dơ̆ng 6:8). Amâodah lač snei, Y-Nôê jing sa čô mnuih mâo klei Aê Diê pap, mnuih Aê Diê ruah, mnuih thâo kral Aê Diê, leh anăn klei ñu dôk sĭt suôr leh anăn mpŭ kơ Aê Diê yơh jing klei ñu lŏ wĭt ngă hŏng klei pap Aê Diê brei leh kơ ñu.
Tal dua, Aê Diê bi mtlaih Y-Lot (êlan 7). Khua ƀĭng kna Y-Pêtrôs lač Aê Diê bi mtlaih leh “pô kpă ênô Y-Lot”. Dleh snăk pia kơ Y-Lot jing pô kpă ênô kyua bruă ñu ngă leh. Bruă Y-Lot ngă năng bi mni hĭn jing klei ñu hmư̆ leh anăn đăo kơ klei dĭng buăl jăk hưn. Jing msĕ si Y-Abraham mơh, Y-Lot mâo klei yap kpă kyua ñu đăo kơ Aê Diê amâo djŏ kyua bruă ngă ôh, leh anăn Aê Diê yap ñu kpă kyua klei ñu đăo. Khua ƀĭng kna Y-Pêtrôs brei ƀuh Y-Lot amâo ngă leh anăn amâo ư ai ôh hŏng klei ngă knhông čhŏ mrŏ êkei hdơ̆ng êkei mơ̆ng phung ƀuôn sang hlăm ƀuôn. Êgao hĭn kơnăn, ñu mâo klei rŭng răng snăk tơdah ƀuh ƀuôn anăn bŏ hŏng klei soh. Ƀiădah lĕ ti knhal tuč klei hdĭp Y-Lot jing hĕ klei hdĭp hơăi mang, gŏ sang amâo mâo klei tŭ ôh leh anăn jing hĕ sa găp djuê tŭ klei tăm pah.
Y-Nôê jing sa čô mnuih ruah hdĭp tui si Klei Aê Diê Blŭ ti krah lăn ala bi kdơ̆ng hŏng Aê Diê, bi Y-Lot, knŏng jing sa čô mnuih awăt nao dôk hdĭp ti krah phung bŏ hŏng klei soh. Ƀiădah hlăm klei pap Aê Diê, jih diñu dua mâo klei bi mtlaih sơăi kyuadah diñu jing phung mâo klei Aê Diê pap, phung Aê Diê dưm hlăm klei kpă ênô Ñu. Aê Diê jing Pô kpă ênô ƀiădah ăt jing Pô bŏ hŏng klei khăp mơh. Tơdah thâo kral klei khăp leh anăn klei pap Aê Diê, brei drei hŏng jih ai tiê hriăm leh anăn hdĭp djŏ tui si Klei Ñu Blŭ măng ai si djiêo gah drei jing.
Si ngă drei thâo kral mơ̆ knuih klei khăp Khua Yang mơ̆ng klei Ñu bi kmhal klei soh leh anăn răng mgang phung đăo kơ Ñu?
Wah lač: Ơ Khua Yang, kâo bi mni kơ Ih kyua klei Ih pap leh anăn klei rơ̆ng kjăp kơ klei bi mtlaih Ih brei leh kơ kâo. Đru kâo dôk sĭt suôr hŏng Ih leh anăn ngă tui si Klei Ih Blŭ grăp hruê. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Nêhêmi 6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
