Klei Aê Diê Blŭ: I Kôrantô 5:1-13
Êlan kliăng: “Ƀiădah kâo čih leh kơ diih đăm bi mguôp ôh hŏng sa čô mâo anăn jing ayŏng adei đăo tơdah ñu jing soh leh kyua ngă klei knhông, amâodah khăp kơ prăk, kkuh rup yang, kreh dlao wač, kreh kpiê ruă, amâodah jing knĕ, kăn dưi huă ƀơ̆ng rei hŏng mnuih msĕ snăn” (I Kôrantô 5:11).
Klei êmuh ksiêm mĭn: Khua ƀĭng kna Y-Pôl mtă “đăm bi mguôp ôh hŏng phung knhông” si klei čiăng lač? Si srăng ngă čiăng hdĭp mdê ƀiădah amâo bi ktlah mdê ôh? Si jing klei drei ngă djŏ hŏng “phung đăo kơ Krist mgưt” hlăm Phung Sang Aê Diê?
Ƀuh phung đăo ti ƀuôn Kôrantô čiăng mâo klei mtô lu hĭn kơ klei srăng dôk dơ̆ng hŏng phung ngă soh, Khua ƀĭng kna Y-Pôl lŏ blŭ klă hĭn hlăm êlan 9-13. Êlâo hĭn, ñu lŏ mkra klei thâo săng soh kơ klei mtă “đăm bi mguôp ôh hŏng phung knhông” (êlan 9) tui si klei mblang khut khat jing kăm amâo brei bi mguôp ôh hŏng phung amâo đăo wăt phung đăo leh kơ Khua Yang. Tui si Khua ƀĭng kna Y-Pôl, klei mtă “đăm bi mguôp” anei amâo yua kơ phung ka đăo ôh. Kyuadah hlăm klei hdĭp drei bhiăn mă bruă leh anăn bi mguôp hŏng phung ka đăo. Tơdah săng tui si klei mblang khut khat msĕ snăn, sĭt nik drei srăng bi tlah drei pô kluôm dhuôm hŏng lăn ala, ƀiădah klei anăn drei knŏng dưi ngă tơdah drei “kbiă mơ̆ng lăn ala” anei (êlan 10). Klei đăo kơ Krist amâo djŏ klei đăo đuĕ kbưi mơ̆ng phung amâo đăo čiăng djă pioh pô jing doh jăk ôh. Phung đăo kơ Krist srăng hdĭp doh jăk ti krah phung ka đăo ôh čiăng jing “hra kơ lăn” leh anăn “klei mngač kơ lăn ala” (Y-Mathiơ 5:13-16). Drei srăng jing mdê hlăm klei hdĭp doh jăk ƀiădah amâo bi ktlah mdê drei pô mơ̆ng lăn ala ôh.
Čiăng hdĭp mdê ƀiădah amâo bi ktlah mdê ôh, sa kdrêč jing tui si knuih Phung Sang Aê Diê hŏng phung “mâo anăn jing ayŏng adei đăo”, čiăng lač kơ phung dôk hlăm sang Aê Diê, yap diñu pô jing phung đăo kơ Krist ƀiădah “ngă klei knhông, amâodah khăp kơ prăk, kkuh rup yang, kreh dlao wač, kreh kpiê ruă, amâodah jing knĕ” (êlan 11). Êjai hdĭp ti lăn ala, grăp čô hlăm phung drei mâo blư̆ ăt ngă soh mơh. Ƀiădah lĕ, jih jang klei soh răk leh hlăm êlan 11, boh nik nak hlăm ênuk ƀuôn Kôrantô mâo klei hing ang jhat hlăm klei ngă soh, anăn jing klei soh ngă hŏng klei êdah, arăng dưi ƀuh, ngă klei bi hmô jhat hŏng klei klă. Sa nah mkăn, tơdah yap klei knhông, klei khăp kơ prăk mđơr hŏng klei kkuh rup yang, Khua ƀĭng kna Y-Pôl brei ƀuh jih jang phung dôk nanao hlăm klei soh anăn ƀiădah amâo kmhal ôh, phung anăn knŏng jing phung đăo mgưt, mâo anăn ƀiădah amâo sĭt ôh. Jih jang phung yap diñu jing phung đăo kơ Krist ƀiădah dôk hdĭp hlăm klei soh anei ngă klei bi têč hnêč prŏng leh anăn bi jhat lu snăk kơ klei hing ang jăk Phung Sang Aê Diê.
Klei Phung Sang Aê Diê lŏ wĭt ngă djŏ hŏng phung yap diñu pô jing phung đăo kơ Krist ƀiădah ăt dôk kram hlăm klei ngă soh msĕ snăn jing: “đăm bi mguôp” hŏng diñu ôh, čiăng lač amâo bi mguôp sĭt suôr, amâo mâo sa ai, amâo mâo sa klei mĭn hŏng diñu ôh; “kăn dưi huă ƀơ̆ng rei hŏng mnuih msĕ snăn”, amâo ngă klei bi mguôp sĭt suôr; leh anăn wăt “suôt hĕ” mnuih soh anăn mơ̆ng krah phung drei (êlan 11-13). Pô čih Klei Mmuñ Hđăp mrô 1 lač msĕ mơh mnuih amâo êbat ôh tui si êlan phung ƀai kčĕ, amâo dôk ôh hlăm êlan phung soh, kăn dôk rei mbĭt hŏng phung mưč jing mnuih mâo klei jăk mơak.
Si knuih drei khăng mâo hŏng “phung đăo kơ Krist mgưt”?
Wah lač: Ơ Khua Yang, kâo khăng ngă klei ênưih đei hŏng klei kâo leh anăn phung ayŏng amai adei kâo ngă soh kjham. Đru kâo mâo klei jhŏng čiăng kơ kâo ngă khăng leh anăn mtô lač hŏng klei kpă hlăm klei khăp čiăng ba hriê klei bi mđĭ kơ Phung Sang Aê Diê Ih, kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Haƀakuk 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail:elankleisitnik@gmail.com
Kênh Youtube BHKTHN:
