I Petus 5:13-14
Nqe cim:
“Nej ib leeg yuav tsum hlub ib leeg thiaj tsimnyog qhov uas nej yog cov ntseeg. Thov kom txojkev thajyeeb nrog nej txhua tus uas ntseeg Yexus Khetos” (I Petus 5:14)
Lus nug xav:
– Xaus tsab ntawv, Timthawj Petus hais txog yam dabtsi?
– Vim li cas Petus hais txog qhov no?
– Cov ntseeg Yexus yuav tau ua dabtsi kom muaj txojkev kaj siab tseeb hauv Vajtswv tsevneeg?
Xaus tsab ntawv, Timthawj Petus cob cim rau cov ntseeg uas khiav mus nyob rau txhua qhov hauv cheebtsam Axias yau paub hais tias lawv tsis nyob ib leeg, rau qhov “Cov ntseeg uas nyob hauv lub nroog Npanpiloos uas Vajtswv tau xaiv lawm ib yam li nws xaiv nej, lawv hais noj qab nyob zoo rau nej, thiab kuv tus tub Malakaus los hais noj qab nyob zoo rau nej ib yam nkaus” (nqe 13). Lub sijhawm ntawd, lawv muab lub npe Npanpiloos tis rau lub nroog Loos, vim qhov chaw no yog lub nroog ua phem ua qias ntawm cov neeg Loos. Txuas ntxiv, Timthawj Petus hais rau cov ntseeg tias, “nej ib leeg nwj ib leeg los ntawm Vajtswv txojkev hlub”. Nov yog txoj cai hais noj qab nyob zoo thaum sib ntsib hauv cov ntseeg Yexus nyob rau tiam thaud (Loos 16:16; I Kauleethaus 16:20; II Kauleethaus 13:12; I Thexalaunikes 5:26). Nwj los ntawm Vajtswv txojkev hlub” muaj lub ntsiab hais tias saib taus, sib hlub thiab koom siab hauv tus Tswv. Tej lus xa xov nug moo thiab txojkev hlub tseeb yog qhov uas ua rau muaj kev kaj siab hauv Vajtswv tsevneeg zoo ib yam li Timthawj Petus cov lus hais noj qab nyob zoo: “Thov kom txojkev thajyeeb nrog nej txhua tus uas ntseeg Yexus Khetos” (nqe 14).
Cov lus hais xaus tsab ntawv no qhia paub Timthawj Petus hais txog txojkev thajyeeb tseeb tsis yog los ntawm tibneeg lossis caijnyoog los, tiamsis yog los ntawm Tswv Yexus los. Cov ntseeg raug tsimtxom thiab tiv txomnyem tau khiav mus nyob txhua qhov, tiamsis tej kev txomnyem ntawd tsis ua rau lawv poob txojkev kaj siab uas Tswv Yexus pub li: “Kuv muab kuv txojkev kaj siab tso rau nej; txojkev kaj siab uas kuv muab pub rau nej, kuv tsis muab rau nej li neeg ntiajteb muab. Nej tsis txhob txhawj, tsis txhob nyuaj siab thiab tsis txhob ntshai” (Yauhas 14:27). Vajtswv Pawg Ntseeg yuav muaj kev kaj siab tseeb yog thaum Vajtswv cov menyuam muaj kev sib raug zoo nrog Vajtswv, thiab nyob hauv txojkev sib raug zoo ntawd, txhua tus ntseeg yuav txhim tsa txojkev sib hlub, sib ncawg hauv tus Tswv, txhua tus txawm yog yuav nyob rau lub meejmom twg los yuav muaj kev txo hwjchim, zam txim thiab ib leeg txais yuav ib leeg.
Nimno, leejtwg los yeej xav kom Pawg Ntseeg muaj txojkev kaj siab tseeb uas tus Tswv pub. Cia kom tau li ntawd, txhua tus ntseeg yuav tsum muaj kev sib raug zoo, ib leeg hmov tshua txog ib leeg, tsis xaiv ntsejmuag. Tsis txhob cia cov neeg uas lub neej txomnyem, cov neeg pom kev tsis meej, tuag tes tuag taw nyob zoo li tsis muaj leejtwg hmov tshua. Tsuas cheemtsum ib lo lus noj qab nyob zoo, tuav tes nug hmoo kuj ua rau lawv muaj kev sov siab. Txojkev txajmuag lossis khavtheeb yuav ua rau Pawg Ntseeg cais ua pab ua pawg, ntxhov hnyo. Txhua tus ntseeg paub ua neej hmov tshua yuav hloov Pawg Ntseeg dhau los ua qhov chaw rub tau neeg, vim lawv pom qhov chaw cov ntseeg nyob muaj kev hlub thiab muaj cwjpwm hmov tshua, saib taus, tsis xaiv tus muaj tus pluag ntsejmuag.
Thov Vajtswv,
Vajtswv, ua tsaug vim Koj pub txojkev kaj siab tseeb. Thov Koj pab kom nyuam yaus nrhiav kev tsim muaj kev kaj siab nyob hauv Vajtswv tsevneeg los ntawm kev hmov tshua, sib raug zoo thiab txo hwjchim ib leeg saib taus ib leeg los ntawm txojkev hlub. Nyuam yaus tuav Tswv Yexus Khetos lub npe thov, Amees.
Peb txiav txim siab tsim muaj txojkev kaj siab hauv Vajtswv tsevneeg los ntawm yam dabtsi?
Nyeem Vajluskub hauv peb lub xyoo: Hanpakus 1
Kênh Youtube BHKTHN:
