Chivkeeb 14:17-24
Nqe cim:
“Thaum Anplas hnov dheev hais tias, yeebncuab ntes tau nws tus kwv Halas tus tub Lauj lawm, nws thiaj hu tagnrho peb puas kaum yim leej tubrog hauv nws lub yeej tawm mus caum tua plaub tug vajntxwv ntawd txog ntua hauv lub nroog Das” (Chivkeeb 14:14)
Lus nug xav:
– Thaum yeej rog rov qab los, Anplas ntsib leejtwg?
– Qhov uas lawv tuaj ntsib Anplas sib txawv li cas?
– Qhov uas Anplas ua rau cov vajntxwv qhia tau yam dabtsi?
– Peb kawm tau dabtsi dhau ntawm Anplas tus qauv?
Tom qab uas tua yeej cov vajntxwv sib koom, yeej rog rov qab los, Anplas cov tubrog tau txais tos hauv lub Hav Vajntxwv (nqe 17). Anplas ntsib tus vajntxwv kav lub nroog Xaudoos thiab Vajntxwv Mekhixedes kav lub nroog Xalees. Vajtswv Txojlus tsis hais txog vajntxwv Xaudoos ntau tiamsis hais mus tob txog tus vajntxwv kav nroog Xalees hais tias, “Mekhixedes uas ua vajntxwv kav lub nroog Xalees thiab ua ib tug povthawj rau Vajtswv tus uas muaj hwjchim loj kawgnkaus” (nqe 18), kuj yog tus Vajtswv uas Anplas pehawm (nqe 22). Vajntxwv Mekhixedes yog tus duab hais txog Yexus Khetos, yog Vajntxwv thiab yog tus Povthawj Hlob nyob mus ibtxhis (Henplais 7).
Qhov uas ob tug vajntxwv tuaj tos Anplas sib txawv heev. Mekhixedes “coj ncuav thiab cawv txiv hmab tuaj pub rau Anplas” (nqe 18), hos vajntxwv Xaudoos tuaj tes dawb tes npliag. Ua ntej ntawd, thaum nrog cov vajntxwv Mexunputamias sib tua, vajntxwv Xaudoos swb rog, tso tes khiav. Txhua yam khoom, zaub mov noj, thiab tej pejxeem raug ntes coj mus. Nimno, Anplas ntaus yeej yeebncuab thiab cawm tau tej pejxeem rov qab los, vajntxwv Xaudoos tsis muaj ib yam dabtsi qhia tawm lub siab ua tsaug li. Muaj qee zaus qhov ntawd kuj yog ib qhov tshwjxeeb ntawm lub nroog ua kev txhaum uas Vajtswv Txojlus tau hais ua ntej ntawd (Chivkeeb 13:13). Thaum Vajntxwv Xalees tuaj tos yog tuaj foom koob hmoov rau Anplas thiab muab txhua yam koob npe fij rau Vajtswv (nqe 19-20a), tiamsis vajntxwv Xaudoos tuaj yog tuaj hais kom Anplas cia li muab tej pejxeem cob rov qab rau nws kav (nqe 21). Tej zaum nws ntshai tsam ntxab ntxawm lub caijnyoog no Anplas txeeb nws lub meejmom!
Qhov uas Anplas ua rau ob tug vajntxwv kuj muaj qhov txawv. Vajntxwv Mekhixedes, Anplas txais yuav tej lus foom koob hmoov thiab tseem muab ib feem kaum fij rau vajntxwv tus uas yog Vajtswv tus povthawj, qhia tau hais tias Anplas paub ua tus Tswv tsaug thiab muab txhua yam koob npe muaj yeej fij rau tus Tswv. Thaum ntsib vajntxwv Xaudoos ces Anplas tawm lus hais tias nws tsis yuav tej uas yog vajntxwv li kom tsis ris lub npe hais tias vamkhom vajntxwv Xaudoos thiaj npluanuj (nqe 23).
Muaj ntau leej muaj yeej thaum ua tes haujlwm nyuaj tiamsis swb thaum tej neeg sawvdaws qhuas, thaum raug kev sim siab txog koob npe thiab khoom txhua yam. Peb hais tau tias kob rog thaum raug sim siab tom qab uas yus muaj yeej tseem nyuaj dua kob rog tua yeebncuab thiab teebmeem. Kawm raws li Anplas tus qauv, thov Vajtswv pab rau peb tom qab uas ua tau txhua yam, paub muab lub koob npe fij rau Vajtswv thiab tsis txais tej lus caw lus ntxias ntawm lub ntiajteb uas muaj kev txhaum.
Thov Vajtswv,
Vajtswv, ua tsaug qhov uas Koj pub kev muaj yeej rau cov neeg uas vamkhom Koj. Thov pab kom nyuam yaus paub ua neej txo hwjchim, paub fij rau Koj txhua yam koob npe. Thov Koj pub rau nyuam yaus txiav tu nrho tej kev sim siab txog kev qhuas, meejmom ntawm lub ntiajteb no, too hau ntshis rau qhov nqi zog nyob mus ibtxhis saum ntuj ceebtsheeb xwb. Nyuam yaus tuav Tswv Yexus Khetos lub npe thov, Amees.
Peb yuav ua dabtsi rau tus Tswv tom qab uas peb muaj yeej?
Nyeem Vajluskub hauv peb lub xyoo: Yauj 11
Kênh Youtube BHKTHN:
