Mathais 26:30-35
Nqe cim:
“Yog leejtwg xav hais tias nws twb sawv khov kho lawm, nws yuav tsum ceevfaj nyob tsam nws ntog” (I Kauleethaus 10:12)
Lus nug xav:
– Tswv Yexus tau hais txog qhov tseemceeb twg rau cov thwjtim?
– Timthawj Petus thiab lwm tus thwjtim tau ua qhia tshwm lawv qhov kev rov tso siab dhau rau tus kheej zoo li cas?
– Qhov uas Timthawj Petus raug swb pab peb kawm tau zaj kawm twg rau tus kheej?
Tom qab uas hu zaj Nkauj xaus lub Kevcai Hla Dhau, Tswv Yexus tawm mus thiab nrog cov thwjtim nce mus saum roob Txiv Ntoo Roj. Thaum taug kev mus, Tswv Yexus qhia rau cov thwitim ib yam tseemceeb rau lawv: “Hmo no nej txhua tus yuav khiav tas huv tibsi tso kuv tseg” (nqe 31). Lo lus “yuav khiav” muaj lub ntsiab tias yuav raug kev sim siab ntawm kev ntseeg loj heev thiab tagnrho lawv puavleej khiav txojkev ntseeg. Nov yog cov lus ceebtoom tseemceeb tiamsis Timthawj Petus tseem tsis tau zeem paub qhov teebmeem, yog li Petus tso siab dhau thiab muaj kev khav theeb thaum nws hais tias nws paub dua lwm tus: “Txawm yog sawvdaws tso koj tseg tas lawm los kuv yuav tsis tso koj tseg li!” (nqe 33). Tswv Yexus qhia rau Petus paub: “Kuv qhia rau koj hais tias, hmo no thaum qaib tsis tau qua, koj yuav hais peb zaug hais tias, koj tsis paub kuv” (nqe 34). Tiamsis Petus tus kheej thiab tagnrho cov thwjtim tseem pheej hais tias lawv yuav tsis tso tus Tswv tseg li (nqe 35).
Tswv Yexus paub ua ntej tej kev nyuaj los raug cov thwjtim thaum lawv tus Tswv raug ntes thiab coj mus tua, Nws paub hais tias qhov ntawd yog yam uas lawv tsis tau ntsib dua thaum nrog tus Tswv mus. Twb tsimnyog zeem pom qhov kev qaug zog es vamkhom tus Tswv qhia kom muaj yeej, los Petus thiab cov thwjtim tseem pheej tso siab heev. Hmo ntawd ntag, lawv ua tsis tau li lawv hais! Cov thwjtim khiav tas, hos Petus los kuj tsis lees paub Yexus thiab.
Dhau los ntawm tus duab tso siab dhau coj Petus mus rau qhov uas raug swb ua tsis tau, peb pom yus tus duab nyob hauv thiab. Txawm yog peb niaj hnub hnov tus Tswv tej lus ceebtoom los ntawm ntu Vajluskub uas peb tabtom nyeem, tabtom mloog qhia, lossis los ntawm tej lub tsamthawj tus Tswv cia tshwm muaj… kom peb muaj qhov kev pom meej txog txojkev ntseeg, tiamsis peb kuj pheej saib qhov ntawd tsis muaj nqis; rau qhov peb pheej xav tias yus twb ntsib lossis twb ua tau dhau lawm, qhov no ua rau peb tso siab dhau thiab tsis tas paub tus Tswv tej lus ntuas. Tej zaum peb tau tus Tswv siv ua ib tes haujlwm twg, peb cia li tsis vamkhom tus Tswv lawm, yog li peb kuj yoojyim qaug zog hauv txojkev ntseeg thiab ua txhaum. Tswv Yexus twb hais rau Petus: “Ximoos, Ximoos! Koj mloog kuv hais! Vajtswv twb cia dab Ntxwgnyoog los sim nej txhua tus siab lawm, muab tus zoo cais tawm ntawm tus phem, ib yam li tus neeg yaj nplej muab vab ntxuaj cov npluag tawm ntawm cov nplej” (Lukas 22:31). Qhov ntawd kuj yog cov lus ceebtoom rau peb txhua tus kom peb niaj hnub vamkhom tus Tswv hauv lub neej ntseeg. “Rau qhov tsis yog peb tawmtsam neeg, tiamsis yog peb tawmtsam tej dab uas nyob saum nruab ntug, tsis hais cov thawj, tej uas muaj hwjchim loj thiab tej uas muaj hwjchim uas kav tiam tsaus ntuj” (Efexus 6:12). Thov Vajtswv qhia rau peb paub ua tib zoo saib kom peb tsis txhob xav tias peb tabtom sawv, nyob tsam peb ntog!
Thov Vajtswv,
Tus Tswv Yexus, thov Koj pub rau nyuam yaus ua tau tus neeg hnov Koj tej lus qhia, thov Koj pab kom nyuam yaus ua neeg txo hwjchim mloog, kho tus kheej kom qaij tau tej kev qaug zog thiab niaj hnub ua haum tus Tswv siab. Nyuam yaus tuav Tswv Yexus Khetos lub npe thov, Amees.
Tus Tswv tabtom ceebtoom yam dabtsi txog peb lub neej ntawm sab ntsujplig?
Nyeem Vajluskub hauv peb lub xyoo: Yauj 14
Kênh Youtube BHKTHN:
