Klei Aê Diê Blŭ: I Y-Pêtrôs 5:13-14
Êlan kliăng: “Brei diih kkuh čhưn hdơ̆ng diih hŏng klei čŭm klei khăp Yang Krist. Brei klei êđăp ênang kơ jih jang phung diih dôk hlăm Krist” (I Y-Pêtrôs 5:14 ).
Klei êmuh ksiêm mĭn: Bi ruê̆ hră mơĭt, kơ ya klei Khua ƀĭng kna Y-Pêtrôs blŭ? Ya ngă ñu kñăm kơ klei anei? Ya klei phung đăo kơ Krist srăng ngă čiăng mâo klei êđăp ênang sĭt hlăm sang Aê Diê?
Bi ruê̆ hră mơĭt, Khua ƀĭng kna Y-Pêtrôs bi hdơr kơ phung dôk tar ƀar hlăm čar Asi thâo kơ digơ̆ amâo dôk hjăn ôh, kyuadah “Phung Sang Aê Diê ti ƀuôn Ƀaƀilôn, jing phung Aê Diê ruah leh msĕ si diih mơh, mơĭt klei čhưn kơ diih. Wăt Y-Markôs anak êkei kâo mơĭt klei čhưn kơ diih mơh” (êlan 13). Ênuk anăn, arăng pia ƀuôn Ƀaƀilôn kơ ƀuôn Rôm kyuadah ƀuôn Rôm jing ƀuôn kŏ bŏ hŏng klei jhat ƀai hlăm ƀuôn ala mtao Rôm.
Ti tluôn anăn, Khua ƀĭng kna Y-Pêtrôs mtă kơ phung đăo, “Brei diih kkuh čhưn hdơ̆ng diih hŏng klei čŭm klei khăp Yang Krist.” Anei jing klei bhiăn phung đăo kơ Krist bi kkuh drông hdơ̆ng digơ̆ hlăm ênuk anăn (Rôm 16:16; I Kôrantô 16:20; II Kôrantô 13:12; I Têsalônik 5:26). Klei čŭm doh jăk” čiăng lač kơ klei mpŭ, klei bi khăp leh anăn klei bi mguôp jing sa hlăm Khua Yang. Jih jang klei kkuh čhưn leh anăn klei khăp sĭt yơh jing klei čoh čuăn bi mâo hĕ čiăng mkŏ mjing klei êđăp ênang hlăm sang Khua Yang msĕ si klei hơêč hmưi đŭt mơ̆ng Khua ƀĭng kna Y-Pêtrôs snei: “Brei klei êđăp ênang kơ jih jang phung diih dôk hlăm Krist” (êlan 14).
Klei kkuh čhưn ti knhal tuč hră brei ƀuh Khua ƀĭng kna Y-Pêtrôs kñăm klei êđăp ênang sĭt amâo kbiă hriê mơ̆ng mnuih amâodah mơ̆ng klei truh ôh ƀiădah kbiă hriê mơ̆ng Yêsu Krist yơh. Phung đăo tŭ klei arăng ngă jhat leh anăn tŭ klei knap mñai snăn digơ̆ bra đuĕ tar ƀar anôk, ƀiădah klei dleh dlan anăn kăn dưi bi rai rei klei êđăp ênang Khua Yang Yêsu lui brei: “Kâo lui klei êđăp ênang mbĭt hŏng diih; Kâo brei kơ diih klei êđăp ênang Kâo pô. Kâo brei kơ diih amâo djŏ msĕ si lăn ala brei ôh. Đăm brei ai tiê diih rŭng răng ôh, kăn huĭ rei” (Y-Yôhan 14:27). Phung Sang Aê Diê srăng mâo klei êđăp ênang sĭt tơdah djă pioh klei bi mguôp sĭt suôr hŏng Khua Yang, leh anăn hlăm klei bi mguôp anăn, grăp čô phung đăo srăng ngă klei bi mguôp hlăm klei khăp, bi mguôp kjăp hlăm Khua Yang, grăp čô măng ai hlei ñu jing ăt hŏng klei luă gŭ brei hdĭp hŏng klei thâo pap leh anăn bi tŭ mơh hdơ̆ng găp.
Hruê anei, jih jang mnuih čiăng sơaĭ kơ Phung Sang Aê Diê mâo klei êđăp ênang sĭt mơ̆ng Khua Yang. Čiăng dưi mâo klei anăn, brei grăp čô phung đăo mâo klei bi mguôp, bi uêñ mĭn hdơ̆ng phung đăo, amâo dlăng mnuih mdê mdê ôh. Đăm lui phung knap mñai, phung bum ală, phung asei mlei amâo hrông mâo klei hêñ ôh kyua amâo mâo pô uêñ kơ digơ̆. Knŏng hŏng klei kkuh čhưn, hŏng klei êyuh kiê kngan ăt dưi bi mơak leh mơh kơ phung ayŏng adei. Klei hêñ amâodah klei bi mđĭ pô srăng ba klei bi rŭng leh anăn klei bi kah hlăm Phung Sang Aê Diê. Grăp čô phung đăo bi uêñ mĭn hdơ̆ng găp srăng đru bi mjing Phung Sang Aê Diê jing anôk dưi ktŭng hrip lu mnuih, kyuadah digơ̆ ƀuh tinăn phung đăo mâo klei bi khăp, bi uêñ mĭn, bi mpŭ hŏng klei djŏ hnơ̆ng, amâo bi kah phung mdrŏng sah hŏng phung ƀun ƀin ôh.
Si hdră drei bi mklă đru mguôp mkŏ mjing klei êđăp ênang hlăm Sang Aê Diê?
Wah lač: Ơ Khua Yang, bi mni kơ Ih kyuadah Ih brei leh kơ kâo klei êđăp ênang sĭt. Đru kâo êpa mhao nanao kơ klei mkŏ mjing klei êđăp ênang hlăm sang Ih hŏng klei uêñ mĭn, bi mguôp leh anăn hŏng klei luă gŭ bi mpŭ hdơ̆ng ayŏng adei hlăm klei khăp. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Haƀakuk 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail:elankleisitnik@gmail.com\
Kênh Youtube BHKTHN:
