Mathais 26:17-25
Nqe cim:
“Neeg Leej Tub yuav tuag raws li Vajtswv Txojlus sau tseg hais txog nws, tiamsis tus uas ntxeev siab rau Neeg Leej Tub, nws yuav raug kev puastsuaj! Yog nws tsis txhob yug los kuj yuav zoo dua!” (Mathais 26:24)
Lus nug xav:
– Tswv Yexus thiab cov thwjtim ua kevcai hla dhau qhov chaw twg?
– Lub sijhawm noj hmo tus Tswv tau hais li cas rau cov thwjtim txog tus neeg uas ntxeev siab rau tus Tswv lub neej?
– Nimno, tus Tswv ceebtoom rau peb los ntawm yam twg?
Kevcai Hla Dhau yog cov neeg Yudais ib lub kevcai loj, txhua lub tsevneeg puavleej npaj rau rooj kevcai no, Tswv Yexus thiab cov thwjtim los kuj ib yam nkaus. Raws li Txojmoo Zoo uas Lukas sau tshooj 22:7-13, Tswv Yexus tau txib ob tug Timthawj uas yog Petus thiab Yauhas mus ua ntej npaj ib qhov chaw rau tus Tswv thiab cov thwjtim ua kevcai. Nkawd ua raws li tus Tswv qhia, raws tus neeg kwv hub dej mus rau hauv nws lub tsev thov nws lub tsev rau Tswv Yexus thiab cov thwjtim ua Kevcai Hla Dhau. “Tus tswv tsev yuav coj neb mus qhia ib chav dav dav uas nyob txheej saud thiab twb muaj rooj muaj tog txhij lawm rau neb, neb cia li npaj txhua yam rau qhov ntawd” (Lukas 22:12).
Tej zaub mov noj rau lub Kevcai Hla Dhau ntawm cov neeg Yudais muaj ncuav tsis xyawkeeb, zaub iab thiab cawv txiv hmab. Lawv yuav tsum xaiv thiab tua ib tug menyuam yaj ntawm tuamtsev, muab cov ntshav coj mus tso ntawm lub thaj, thiab muab tus tsiaj ci saum cov ncaig taws, ces mam pib noj mov ua Kevcai Hla Dhau. Thaum tabtom noj pluas hmo nrog cov thwjtim, Tswv Yexus hais tias: “Kuv qhia rau nej hais tias, nej cov uas nyob ntawm no muaj ib tug yuav ntxeev siab rau kuv”. Tsis yog Tswv Yexus txhob txwm hais rhuav Yudas Ixakali-us ntsejmuag, tiamsis Nws tabtom qhia tshwm txojkev hlub thiab koob hmoov rau Yudas. Yudas lub siab yuav tau xav txog thiab paub meej qhov nqi zog ntawm tus neeg ntxeev siab rau tus Tswv mas txaus ntshai heev. Cov thwjtim puavleej xav tsis thoob thiab nug tus Tswv saib tus ntawd puas yog yus, thiab Yudas Ixakali-us kuj nug li ntawd: “Xibhwb, koj hais li no puas yog koj hais kuv? Yexus teb hais tias, koj hais yog lawm” (nqe 25), Tswv Yexus lo lus teb ib zaug ntxiv yog lo lus ceebtoom meej heev rau Yudas. Nyob hauv nqe 24 Tswv Yexus hais tias txojkev cawm dim twb npaj tseg thiab yeej yuav tiav, txawm yog muaj Yudas Ixakali-us lossis tsis muaj, “tiamsis tus uas ntxeev siab rau Neeg Leej Tub, nws yuav raug kev pasutsuaj! Yog nws tsis txhob yug los kuj yuav zoo dua!” Vim yog ntxeev siab rau tus Tswv, Yudas Ixakali-us lub neej yuav raug qhov tsis zoo. Tiamsis qhov tu siab dua thiab yog Yudas tsis kam hloov siab!
Nimno, tus Tswv kuj tabtom siv yam no yam tod los ceebtoom rau peb paub tej uas peb ua yuam kev. Tej zaum yog ib lo lus qhia, lub tsamthawj ua tsis tau; muaj qee zaus tus Tswv hais nruj heev, ua rau peb raug kev mob siab, tiamsis tagnrho tej ntawd puavleej yog txojkev hlub tus Tswv pub rau peb, Nws ceebtom peb kom peb lees ua ntej yuav lig. Cia li tuav txojkev sib raug zoo nrog tus Tswv thiab ua tib zoo mloog tej lus Nws qhia peb ua neej, thiab lees txim tas siab kom tsis raug lub txim ua neeg tawvncauj.
Thov Vajtswv,
Vajtswv tus ua siab ntev, thov Koj pab kom nyuam yaus hnov tej lus Koj hais, thov pub nyuam yaus txo hwjchim lees txim thaum Koj ntuas, qhia yam uas nyuam yaus ua yuam kev. Nyuam yaus tuav Tswv Yexus Khetos lub npe thov, Amees.
Tus Tswv qhia peb yam dabtsi? Cia li txais yuav thiab lees txim tamsim.
Nyeem Vajluskub hauv peb lub xyoo: Yauj 12
Kênh Youtube BHKTHN:
