I Kauleethaus 5:1-8
Nqe cim:
“Nej tsis txhob hais lus twm lwm tus, tiamsis nej yuav tsum hais tej lus zoo xwb thiaj muaj nqis rau cov uas mloog” (Efexus 4:29)
Lus nug xav:
– Yam teebmeem loj twg tabtom tshwm muaj nyob rau hauv ib feem cov ntseeg ntawm Kauleethaus?
– Vim li cas lub txim no yuav tsum “cob rau dab Ntxwgnyoog”?
– Vajtswv Txojlus hnub no ceebtoom thiab ntuas peb li cas?
Muaj ib qho teebmeem loj ntawm kev nkauj nraug tshwm muaj nyob rau hauv Kauleethaus. Qhov teebmeem ntawd yog muaj neeg mus yuav nws txiv tus niam yau ua pojniam(nqe 1). Yuav yus txiv tus niam yau tsis yog ib lub txim loj txog seem kev ua zoo xwb, tiamsis yog muab tshuaj xyuas tej kev coj ua hauv ntiajteb thiab lub tebchaws los kuj tsis muaj leejtwg kam lees txais tau. Nov yog yam uas Vajtswv txoj Kevcai twb txwv tseg meej lawm (Levis Kevcai 18:8). Thaum uas hais tias “txawm yog cov tsis ntseeg los lawv twb tsis ua txhaum loj npaum li ntawd,” qhov no qhia pom ua rau timthawj Paulus xav tsis thoob thiab mob siab kawg li, vim li cas tej kev txhaum loj li no yuav tshwm muaj nyob hauv Pawg ntseeg, thiab vim txoj kev txhaum ntawd ua rau Vajtswv lub npe raug thuam. Lo lus “rau txim” uas timthawj Paulus siv, qhia pom txoj kev txhaum no yog ib txoj kev txhaum loj tiag tiag (nqe 4). Thiab kev qhuab ntuas rau tus neeg ua txhaum nkauj nraug ntawd yog “muab tus ntawd cob rau dab Ntxwgnyoog” lub ntsiab yog muab nws rho tawm tsis pub koom Pawg ntseeg lawm, lub homphiaj yog pab tus neeg txhaum tso kev txhaum tseg, kom “thaum txog Hnub uas tus Tswv los tus ntawd tus ntsujplig thiaj yuav dim” (nqe 5).
Ntau zaus peb xav hais tias txoj kev txhaum no tsis ntsig txog peb dabtsi vim peb tsis tau xav txog txoj kev nkauj nraug phem npaum li ntawd. Thov Vajtswv pab kom peb nco txog Tswv Yexus tej lus sau tseg hauv Mathais 5:28 hais tias “Tiamsis nimno kuv qhia rau nej hais tias yog leejtwg saib ib tug pojniam thiab xav deev tus pojniam ntawd, qhov uas nws saib li ntawd kuj txhaum ib yam li nws twb tau deev tus pojniam ntawd lawm ntag”. Raws li Vajtswv tus cai, kev ua nkauj nraug nyob hauv kev xav thiab kev ntshaw hauv lub siab tsis yog qhov uas mus ua kiag xwb. Vim li ntawd, peb yeej tau ua neej tsis dawbhuv, thaum uas peb taum xovtooj saib pom tej duabyees, duab liab qab ua rau peb qaug siablais thiab xav ntsoov txog qhov ntawd.
Yeej tsis yoojyim ua tau lub neej dawbhuv mus raws li Vajtswv lub siab nyiam, thaum peb tabtom nyob rau tiam uas neeg pom hais tias txoj kev ywjpheej ua nkauj nraug yog kev vam meej, thiab suav hais tias tej uas Vajluskub qhia raug poob qab lawm. Yog tsis ceevfaj, peb yuav xav hais tias tej kev txhaum ua nkauj nraug ua ntej sib yuav, pojniam deev pojniam, txivneej dheev txivneej yeej tsis ua li cas, los ntawm qhov vimchiv uas xav hais tias “tsuas yog sib hlub thiab ib leeg txaus siab rau ib leeg lawd ces yeej tau”, ib yam li cov neeg tsis ntseeg pheej hais daws lawv zaj.
Paub hais tias ua ntej los ntseeg Vajtswv, coob tus twb tau muab yus lub cev coj mus ua kev lomzem, kev txhaum lawm. Timthawj Paulus thiaj ntuas cov ntseeg hauv tebchaws Loos hais tias “muab nej lub cev fij rau Vajtswv kom dawbhuv thiab haum Vajtswv siab” dhau los ntawm kev hloov lub siab dua tshiab thiab ua tib zoo xyuam xim rau tej uas peb yuav txais los rau hauv yus lub hlwb. Yog muaj tej yam uas peb xav tsis dawbhuv, xav txog kev nkauj nraug, thov Vajtswv pab kom peb txiav tu nrho tso tseg.
Thov Vajtswv,
Vajtswv, thov koj hloov nyuam yaus lub hlwb dua tshiab. Thov pab nyuam yaus ua neej dawbhuv rau txoj kev xav thiab tej haujlwm ua txhua hnub kom haum Koj siab. Nyuam yaus tuav Tswv Yexus Khetos lub npe thov, Amees.
Txhua hnub peb yug peb txoj kev xav los ntawm Vajtswv Txojlus lossis tej xovxwm saum huab cua?
Nyeem Vajluskub hauv peb lub xyoos: Tshwmsim 19
Kênh Youtube BHKTHN:
