Yuasuas 6:6-20
Nqe cim:
“Nej yuav tsum xyaum ua raws li Vajtswv Txojlus, tsis yog ua cov mloog xwb. Yog nej mloog xwb, tsis ua raws li, ces kuj yog nej rov dag nej” (Yakaunpaus 1:22)
Lus nug xav:
– Yausuas tej lus samhwm xub thawj qhia pom qhov keeb tiv uas ua rau lub nroog Yelikaus raug puas tsuaj yog dabtsi?
– Txoj haukev twg pab rau cov Yixalayees kovyeej?
– Zaj kawm hnub no ceebtoom peb yam dabtsi?
Tom qab uas hnov Vajtswv tej lus samhwm, Yausuas mloog lus thiab ua raws los ntawm qhov uas faib haujlwm rau cov povthawj thiab cov pejxeem. Lawv kuj mloog lus thiab ua raws li Yausuas hais. Txhua tagkis lawv sawv ntxov taug kev mus ncig lub nroog raws li Vajtswv hais. Cov uas nqa tej cuabyeej ua rog mus ua ntej, txuas ntxiv 7 tus Povthawj ib leeg nqa ib lub raj ke mus ke tshuab suab raj nrov. Tom qab ntawd cov Povthawj kwv Lub Phijxab raws qab thiab pab kawg yog ib pab tubrog nqa lawv tej cuabyeej ua rog tom qab.
Yausuas thawj lo lus samhwm yog, “Nej cia li kwv lub Phijxab mus” (nqe 6), qhov no qhia pom hais tias Yausuas saib muaj lub Phijxab nrog cov tubrog nyob mas tseemceeb heev. Tom qab ntawd, rov hais txog lub Phijxab dua ntxiv thiab hu ua “Tus Tswv lub Phijxab.” Kev hloov npe no qhia hais tias lub phijxab yog lub cim ntawm Vajtswv kev coglus thiab kuj piv txog Vajtswv kev nrog lawv nyob. Tom qab ntawd, lub Phijxab hais txog ntxiv cuaj zaus hauv tshooj Vajluskub no, qhia meej hais tias yog tsis muaj Vajtswv nyob nrog ces lawv yeej yuav tsis muaj peevxwm kovyeej. Ib hnub, cov tubrog nrog rau cov povthawj kwv Lub Phijxab mus ncig lub nroog ib zaug. Thaum cov povthawj tshuab raj, txhua tus yuav tsum nyob twjywm tsis txhob hais ib lo lus li. Txog hnub tim xya, lawv taug kev ncig lub nroog xya zaus. Thaum ncig zaum xya, cov povthawj tshuab raj, ces Yausuas samhwm hais tias “cia li qw nrov nrov, thiab nws hais tias, “Tus TSWV twb muab lub nroog no rau nej lawm!” (nqe 16). Suab qw nrog suab raj nrov ncha, ces tus tsa yeej nroog Yelikaus vaus los raws li Vajtswv tau coglus. Txhua tus neeg Yixalayees txawm nce ncaj qha ntawm lawv xubntiag mus txeeb lub nroog
Cov neeg Yixalayees kovyeej vim lawv mloog Vajtswv lus ua ntej uas lawv ua haujlwm. Lawv ntseeg Vajtswv tej lus thiab ua raws li Nws hais. Lawv ua txhua yam los ntawm kev ntseeg. Hauv rau hnub mus ncig lub nroog, lawv yeej tsis siv ib yam cuabyeej twg los tsoo tus ntsa yeej, lawv kuj tsis pom muaj ib lub cim twg txawv li. Tus ntsa yeej tseem nyob li qub. Tiamsis lawv yeej ua siab ntev mloog Vajtswv lus. Txog hnub tim xya lawv yuav tsum taug kev mus ncig lub nroog xya zaus. Lawv tau siv dag zog heev thiab ua siab ntev, mloog lus. Thaum kawg, vim lawv mloog lus ua raws nraim li Vajtswv tej lus, lawv thiaj kovyeej.
Zaj kawm hnub no ceebtoom peb. Ntau zaus peb ua tsis taus siab ntev vim tsis pom Vajtswv teb peb tej lus thov, lossis peb pom Vajtswv tej lus samhwm tsis zoo li peb kev xav thiab peb txoj kev paub, ces peb thiaj tsis mloog Vajtswv lus thiaj kov tsis yeej. Yog li ntawd, peb yuav tsum kawm Vajtswv Txojlus, mloog Nws lub suab, thiab ua raws li Nws hais, txawm muaj qee zaus peb tsis to taub Vajtswv lub homphiaj los xij, tiamsis los ntawm kev ntseeg ruaj khov rau Vajtswv tej lus cogtseg, peb yuav tsum rhais ruam mus ntawm kev ntseeg, paub tseeb hais tias peb lub neej yeej yuav muaj yeej.
Thov Vajtswv,
Tus Tswv, thov koj pab kom nyuam yaus tsis yog tsuas mloog Koj Txojlus tas xwb, tiamsis ntseeg thiab ua raws li Koj hais hauv txhua lub sijhawm thaum uas ntsib kev sim siab thiab kev nyuaj. Thov pub nyuam yaus ntseeg ruaj khov hais tias Koj yuav pub txhua yam raws li Koj lub sijhawm rau nyuam yaus. Nyuam yaus tuav Tswv Yexus Khetos lub npe thov, Amees.
Thaum sawv ntawm Vajtswv tej lus samhwm uas saib zoo li tsis phim yog rau peb lub tsamthawj, peb muaj tus cwjpwm li cas?
Nyeem Vajluskub hauv peb lub xyoos: Hakais 1
Kênh Youtube BHKTHN:
