1 Kauleethaus 7:12-16
Nqe cim:
“Yog tus niam ntseeg Vajtswv lawm, tus txiv yeej yog Vajtswv tug thiab. Yog tus txiv ntseeg Vajtswv lawm, tus niam yeej yog Vajtswv tug ib yam nkaus” (1 Kauleethaus 7:14a)
Lus nug xav:
– Timthawj Paulus qhia tus uas muaj pojniam lossis muaj txiv tsis tau ntseeg tus Tswv kom ua li cas?
– Nws tau muab ob lo lus taw qhia twg rau nkawm niamtxiv uas tseem nyob ua ke?
– Peb yuav tsum ua li cas kom peb txoj kev sib yuav qhia tawm Vajtswv txoj kev hlub?
Pawg ntseeg Kauleethaus hnub thaud kuj zoo ib yam li niaj hnub nim no, muaj coob leej ntseeg tus Tswv tom qab uas twb muaj txij nkawm lawm, tiamsis tus pojniam lossis tus txiv tseem tsis tau kam ntseeg tus Tswv, vim li ntawd, timthawj Paulus thiaj sau tej lus no taw qhia rau cov uas muaj tus txij nkawm zoo li ntawd xwb, yeej tsis yog hais rau cov uas twb ntseeg tus Tswv lawd tiamsis nws npaj yuav mus yuav tus pojniam lossis yuav txiv uas tseem tsis tau ntseeg.
Timthawj Paulus hais tias, yog tus ntseeg uas muaj tus txiv lossis tus pojniam uas tseem tsis tau ntseeg tus Tswv, ces qhov uas yuav txiav txim siab nyob ua ke ntxiv los tsis nyob, yog nyob ntawm tus txij nkawm uas tsis tau ntseeg txiav txim siab. Yog nws kam nyob ua ke, ces “tsis txhob muab nws nrauj” (nqe 12–13). Tiamsis yog nws xav sib cais, ces “tso tau”, tus uas ntseeg tsis raug khi rau txoj kev sib yuav ntawd lawm (nqe 15). Thaum timthawj Paulus sau tej lus no, nws xub hais tias, “lo lus no yog kuv hais, tsis yog tus Tswv hais”, qhov no qhia pom hais tias nws tabtom qhia kev pab daws tej teebmeem uas pawg ntseeg tabtom ntsib. Muaj qee tus uas tsis ntseeg tus Tswv tsis xav sib nrauj, tiamsis lawv ua phem rau yus tus txij nkawm uas nyuam qhuav ntseeg tus Tswv raug txomnyem los ntawm lawv txoj kev limhiam, kev txob thuam, ntaus, hais phem hnyav kawg nkaus rau tus txij nkawm, tsis tas li ntawd lawv tseem mus deev hluas tabmeeg tus txij nkawm. Vajtswv ntxub kev sib nrauj, thiab Nws kuj ntxub txoj kev ua limhiam rau tus txij nkawm kawg nkaus (Malakis 2:16).
Timthawj Paulus qhia ob qho vimchiv uas nkawm niam txiv yuavtsum rov nyob ua ke ua neej txuas ntxiv mus. Qhov xubthawj, timthawj Paulus hais tias: “Yog tus niam ntseeg Vajtswv lawm, tus txiv yeej yog Vajtswv tug thiab”. Yog tus txiv ntseeg Vajtswv lawm, tus niam yeej yog Vajtswv tug ib yam nkaus” (nqe 14a). Qhov no txhais tias tus uas tsis tau ntseeg yuav muaj sijhawm los ntseeg tus Tswv yog thaum nws pom nws tus txij nkawm lub neej hloov tshiab thiab hnov nws ua tim khawv txog tus Tswv. Tsis tas li ntawd xwb, lawv cov menyuam kuj yuav muaj sijhawm kawm paub Vajtswv (nqe 14b). Hauv nqe 16, Paulus rov hais ob zaug ntxiv hais tias “puas paub”, qhov no qhia pom hais tias ntawd tsis yog ib lolus cogtseg. Tiamsis yeej muaj coob tus uas tau los ntseeg tus Tswv vim pom lawv tus txij nkawm lub neej hloov dua tshiab. Qhov vimchiv tim ob rau tus uas tsis tau ntseeg txiav txim siab yuav ua neej ua ke nrog tus ntseeg ntxiv lossis tsis ua mas cuam tshuam txog Vajtswv kev hu rau tus uas ntseeg: “Rau qhov Vajtswv yeej hu nej kom los nyob sib haumxeeb” (nqe 15). Qhov kev sib haumxeeb ntawd tsis yog cia rau peb xwb, tiamsis kuj yog rau tus txiv lossis tus pojniam uas tseem tsis tau ntseeg thiab, kom nkawd nyob tau sib haumxeeb.
Txawm peb txoj kev txij nkawm tabtom nyob lub tsamthawj twg los xij, qhov tseemceeb tshaj yog peb yuav tsum rau siab thov Vajtswv coj thiab qhia peb, kom peb tsev neeg lub neej qhia tawm Vajtswv txoj kev hlub.
Thov Vajtswv,
Tus Tswv, nyuam yaus ua Koj tsaug vim Koj yeej hmov tshua txog cov uas muaj tus txiv lossis tus pojniam tseem tsis tau ntseeg. Thov Koj tswj thiab coj nyuam yaus txoj kev txij nkawm thiab tsev neeg mus raws li Koj txoj kev kom coj tau tus tsis tau ntseeg los paub Koj. Nyuam yaus tuav Tswv Yexus Khetos lub npe thov, Amees.
Peb puas muab Vajtswv Txojlus los ua lub plag thaum peb txiav txim siab ua ib yam dabtsi twg hauv peb txoj kev txij nkawm?
Nyeem Vajluskub hauv peb lub xyoos: Xefaniyas 1
Kênh Youtube BHKTHN:
