1 Kauleethaus 7:10-11
Nqe cim:
“Nkawd tsis yog ob leeg lawm, tiamsis yog ib leeg xwb. Vajtswv twb muab nkawd los txis ua txij ua nkawm lawm, yog li ntawd neeg tsis txhob muab nkawd cais” (Mathais 19:6)
Lus nug xav:
– Timthawj Paulus hais meej txog Vajtswv tej lus samhwm twg hais rau cov tsev neeg ntseeg Vajtswv?
– Vajtswv lub homphiaj ib txhis rau kev sib yuav yog dabtsi?
– Thaum muaj kev sib cav thiab tsis sib haum hauv tsev neeg, peb yuav daws li cas?
Qhib thawj timthawj Paulus hais tias tej lus no yog Vajtswv lo lus samhwm rau cov ntseeg uas muaj txij nkawm lawd hais tias, muaj ib txoj kev khi txoj kev txij nkawm ruaj khov heev tsis muaj kev sib cais tau li, “tus pojniam yuav tsum tsis txhob tso nws tus txiv tseg” thiab “tus txiv tsis txhob muab nws tus pojniam nrauj” (nqe 10-11). Tus pojniam thiab tus txiv puavleej tsis muaj cai nrhiav kev los sib nrauj, tsuas yog tshwj thaum muaj ib tug mus ua nkauj ua nraug raws li Tswv Yexus qhia lawd xwb thiaj muaj cai nrauj (Mathais 5:31-32). Nyob ntawd ib txhia neeg “yog nws muab nws tus txiv tso tseg, nws tsis txhob mus yuav dua txiv tshiab, tiamsis yog nws xav yuav txiv, nws cia li rov qab los yuav tus txiv qub xwb; thiab tus txiv tsis txhob muab nws tus pojniam nrauj”. Tej lus qhia no qhia pom tseeb Vajtswv lub homphiaj hauv kev sib koom ntawm txoj kev txij nkawm zoo kawg nkaus, tus pojniam yuav tsum nyob li ntawd kom nws muaj sijhawm tig rov los sib haumxeeb nrog nws tus txiv.
Kev sib yuav hauv tus Tswv yog kev sib koom ntawm ib tug txivneej thiab ib tug pojniam tabmeeg ntawm Vajtswv xubntiag. Vajtswv yog tus rhawv tsim txoj kev sib yuav xubthawj rau Adas thiab Evas, thiab Nws tsim muaj txoj cai rau tibneeg kev sib yuav: “Twb yog vim li no tus txivneej thiaj tso nws niam thiab nws txiv tseg mus nrog nws tus pojniam nyob ua txij ua nkawm, thiab nkawd thiaj los koom ua ib lub cev” (Chivkeeb 2:24). Nyob rau tiam Vajluskub qub, Vajtswv hais rau Nws haivneeg hais tias: “Kuv ntxub txojkev sib nrauj heev. Kuv ntxub thaum uas muaj ib tug twg ua nruj ua tsiv rau nws tus pojniam. Nej yuav tsum nco ntsoov tsis txhob rhuav nej tej lus cog tseg uas hais tias nej yuav muab siab npuab nej tus pojniam” (Malakis 2:16) thiab nyob rau tiam Vajluskub tshiab Tswv Yexus hais meej: “Nkawd tsis yog ob leeg lawm, tiamsis yog ib leeg xwb. Vajtswv twb muab nkawd los txis ua txij ua nkawm lawm, yog li ntawd neeg tsis txhob muab nkawd cais” (Mathais 19:6). Qhov no qhia pom hais tias kev sib yuav hauv tus Tswv yog kev koom ua ke ruaj khov thiab nyob mus ib txhis. Thaum muaj teebmeem, yuav tsum nco ntsoov hais tias txoj kev sib yuav yog Vajtswv ua tus muab los sib koom. Vim li ntawd, kev hais kom rov sib haumxeeb ces yog txoj haukev daws teebmeem ntag. Tibneeg tsis muaj leejtwg muaj cai cais nkawd. Kev sib nrauj thiab tsev neeg tawg tsis yog Vajtswv tus dej siab.
Lub neej txij nkawm thiab tsevneeg uas yog neeg txhaum nyob ua ke, ces yeej zam tsis dhau kev sib cav thiab kev tsis sib haumxeeb. Tibneeg ntiajteb, txoj kev daws teebmeem ces yog sib nrauj xwb, tiamsis Vajtswv cov menyuam yuav tsum tsis txhob xav li ntawd. Peb yuav tsum nco ntsoov hais tias kev sib yuav Vajtswv yog tus rhawv tsim, thiab tej lus cogtseg rau Vajtswv tabmeeg pawg ntseeg hauv kev txis txij nkawm yuavtsum tau nkawm niam txiv nco ntsoov, vim no yog tej lus cog uas tseemceeb kawg nkaus. Thaum muaj kev tsis sib haum, tsis txhob cia kev chim, kev ntxub, lossis kev npautaws kav peb lub siab… Tej kev xav ntawd tej zaum yuav ploj tsis tau tamsim ntawd, tiamsis tsis txhob cia tej kev xav ntawd lossis lwm tus tej lus dag ntxias los rhuav peb txoj kev sib yuav uas Vajtswv muab los koom ua ke. Peb yuav tsum thov Vajtswv thiab cia Nws Txojlus coj peb, thiab paub tseeb hais tias Vajtswv tus dej siab hauv peb txoj kev txij nkawm yog muaj kev ncajncees thiab rov muaj kev sib haumxeeb dua thaum muaj teebmeem.
Thov Vajtswv,
Tus Tswv, thov Koj foom koob hmoov rau nyuam yaus txoj kev sib yuav kom nyob ruaj khov raws li Koj lub siab nyiam. Thov nco ntsoov qhia nyuam yaus kom nco txog tej lus cogtseg uas nyuam yaus tau coglus rau Koj hnub ua rooj sib yuav, kom nyuam yaus tsis txhob cia kev xav hauv siab lossis lwm tus tej lus ntxias coj nyuam yaus mus yuam kev. Thov kom nyuam yaus txoj kev sib yuav ua rau Koj lub npe raug qhuas. Nyuam yaus tuav Tswv Yexus Khetos lub npe thov, Amees.
Peb puas tseem nco tej lus cogtseg uas peb tau hais thaum sib yuav? Thiab peb tau coj tej lus cogtseg li cas hauv peb lub neej txij nkawm?
Nyeem Vajluskub hauv peb lub xyoos: Ntawv Nkauj 123-125
Kênh Youtube BHKTHN:
