Klei Aê Diê Blŭ: Y-Yôsuê 6:6-20
Êlan kliăng: “Ƀiădah brei diih ngă tui si klei blŭ, amâo djŏ knŏng hmư̆ leh anăn mplư diih pô ôh. ” (Y-Yakơ 1:22)
Klei Êmuh ksiêm mĭn: Ya asăp mtrŭn tal êlâo mơ̆ng Y-Yôsuê brei ƀuh jing klei bi mklă ƀuôn Yêrikô klưh? Ya klei đru kơ phung ƀuôn sang Israel mâo klei dưi? Ya klei hlăm klei hriăm hruê anei bi mdih leh drei?
Leh hmư̆ klei Aê Diê lač, Y-Yôsuê gưt asăp hlue ngă hŏng klei mbha bruă kơ phung khua ngă yang leh anăn phung ƀuôn sang. Diñu ăt gưt asăp hlue ngă. Grăp hruê, diñu kgŭ ưm čiăng êbat dar ƀuôn hlue si Klei Aê Diê mtă. Êlâo hĭn jing phung djă mnơ̆ng bi blah, leh anăn kjuh čô khua ngă yang, grăp čô djă sa ƀĕ ki kwang êbat êjai ayŭ êjai. Ti tluôn jing Hip Klei Bi Mguôp ăt kyua phung ngă yang kkung, knhal tuč jing sa êpul djă mnơ̆ng bi blah.
Asăp mtrŭn tal êlâo Y-Yôsuê lač jing “Kkung bĕ hip klei bi mguôp” (êlan 6), brei ƀuh ñu dlăng myuôm snăk klei mâo wăt Hip Klei Bi Mguôp hlăm êpul kahan. Leh anăn mtam, hip mâo mñă wĭt hŏng anăn pia “hip Yêhôwa”. Klei bi mlih klei pia anăn brei ƀuh hip jing klei bi knăl klei bi mguôp Aê Diê hŏng phung ƀuôn sang Ñu, mbĭt anăn ăt bi knăl kơ Aê Diê. Leh anăn, Hip Klei Bi Mguôp lŏ dơ̆ng mñă truh 9 blư̆ hlăm jih kdrêč anei, mñă klă jing tơdah amâo mâo ôh Aê Diê ti krah phung ƀuôn sang Ñu snăn diñu amâo mâo klei dưi ôh. Grăp hruê, êpul kahan hŏng phung khua ngă yang leh anăn Hip Klei Bi Mguôp êbat dar jŭm ƀuôn prŏng sa blư̆. Hlăk êjai phung khua ngă yang ayŭ ki snăn diñu dôk kriêp. Truh hruê tal kjuh, diñu êbat kjuh blư̆ jŭm ƀuôn. Hlăm blư̆ tal kjuh, hlăk êjai phung khua ngă yang ayŭ ki snăn Y-Yôsuê lač kơ phung ƀuôn sang “Ur driâo bĕ, kyuadah Yêhôwa jao leh ƀuôn kơ diih” (êlan 16). Asăp ur driâo hlai mbĭt hŏng asăp ki kwang kniă knga leh anăn mnư̆ ƀuôn Yêrikô klưh djŏ hlue si klei Aê Diê ƀuăn. Grăp čô mnuih Israel đĭ mtam ti mnư̆ ƀuôn ti anăp pô nao plah mă ƀuôn.
Phung ƀuôn sang Israel mblah dưi kyua diñu mđing hmư̆ Klei Aê Diê Blŭ êlâo kơ ngă bruă. Diñu đăo hlăm Klei Aê Diê Blŭ leh anăn gưt asăp. Diñu ngă bruă kyua klei đăo. Hlăm năm hruê êbat dar jŭm ƀuôn amâo yua ya kdrăp mnơ̆ng bi rai ƀuôn ôh, diñu kăn ƀuh sa klei bi knăl mkăn. Mnư̆ ƀuôn ăt dôk kjăp snăn. Ƀiădah diñu ăt gĭr gưt hlue si Klei Aê Diê Blŭ. Truh hruê tal kjuh, diñu êbat dar jŭm ƀuôn prŏng truh kjuh blư̆. Diñu tuh êyuh lu ai tiê snăk leh anăn klei gĭr, klei gưt asăp. Knhal tuč, kyua gưt asăp Aê Diê hŏng klei kluôm dhuôm, diñu dưi leh.
Klei hriăm hruê anei bi mdih drei. Lu blư̆ drei kƀah klei gĭr kyua ka ƀuh ôh Aê Diê wĭt lač, amâodah drei ƀuh asăp blŭ Aê Diê mklăk hŏng klei ksiêm dlăng kyua klei pô hriăm… anăn drei amâo dưi ôh. Brei hriăm Klei Aê Diê Blŭ, mđing hmư̆ asăp Khua Yang, leh anăn gưt asăp, hlue ngă, wăt tơdah drei amâo thâo săng jih ôh klei Khua Yang čiăng, ƀiădah hŏng klei đăo kluôm dhuôm hlăm Klei Ñu ƀuăn, drei êbat nao hŏng klei đăo, klă sĭt klei hdĭp drei srăng mâo klei dưi.
Ti anăp sa asăp blŭ Khua Yang msĕ si amâo djŏ ôh hlăm boh klei pô dôk găn, si knuih drei mâo?
Wah lač: Ơ Khua Yang, akâo kơ Ih đru kâo amâo djŏ knŏng mđing hmư̆ Klei Aê Diê Blŭ ôh ƀiădah đăo leh anăn hlue ngă hlăm djăp boh klei lông dlăng, dleh dlan, hŏng klei đăo knang kluôm dhuôm Aê Diê srăng brei hlue si mmông Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: A-ghê 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
