Yausuas 5:13-15
Nqe cim:
“Yausuas txhos caug ntua pe thiab hais tias, “Tus tswv, kuv yog koj tus tubtxib, koj xav kom kuv ua dabtsi?” (Yausuas 5:14b)
Lus nug xav:
– Cov lus sib nug sib teb ntawm Yausuas thiab tus thawj ntawm tus Tswv pab tubrog qhia rau Yausuas paub txog dabtsi?
– Yausuas tus cwjpwm hloov li cas?
– Peb yuav tsum ua li cas rau Vajtswv tej lus samhwm kom tshaj tawm Txojmoo Zoo?
Thaum Yausuas tabtom sawv ze lub nroog Yelikaus tshuaj xyuas lub nroog, tej zaum nws muaj kev txhawjxeeb vim nws yuav tsum coj haivneeg Yixalyees mus tua thiab txeeb lub nroog loj no, ua ciav nws txawm pom ib tug tub rog sawv tabmeeg nws, tuav ib rab ntaj twb rho tawm hauv hnab los lawm. Yausuas xav tsis thoob ua cas tus neeg ntawd tuav rawv ntaj npaj txhij sib ntaus, nws thiaj txav mus nug tus neeg ntawd saib yog cov Yixalayees tog lossis yog yeebncuab tog. Tus neeg ntawd thiaj teb hais tias nws tsis tuaj leejtwg tog tiamsis nimno nws “los ua tus TSWV pab tubrog tus thawj”. Tseeb tiag nws tsis yog neeg ntiajteb, yog li nws yeej tsis tuaj leejtwg tog li. Nws tsis tuaj ua rog raws li Yausuas tej lus txib lossis raws li tus thawj tubrog hauv nroog Yelikaus tej lus txib, tiamsis nws tuaj ua raws li Vajtswv tej lus samhwm xwb. Qhov no ua rau Yausuas totaub hais tias kev yuav ntaus yeej lub nroog Yelikaus tom ntej no tsis yog nyob ntawm Yausuas ua tus thawjcoj coj mus ntaus tiamsis yog nyob ntawm Vajtswv tus uas muaj hwjchim loj kawg nkaus kev coj thiab kev kovyeej ntawd yog Vajtswv li.
Yav tas los, Vajtswv twb qhia rau Mauxes paub lawm hais tias haivneeg Yixalayees yuav tsum hla tus dej Yauladees mus txeeb tej tebchaws uas muaj haivneeg loj thiab muaj zog dua lawv. Vajtswv yuav mus ua lawv ntej, tua rhuav tshem txhua haivneeg no tabmeeg cov Yixalayees. Lawv yuav tau txais lwm haivneeg tej chaw ntawd los ua lawv tug tsis yog vim lawv ncajncees, tiamsis vim haivneeg ntawd ua kev phem kev qias, thiab Vajtswv yuav ua kom tiav tej lus Nws cogtseg rau cov Yixalayees cov yawgkoob lawm (2 Kevcai 9:1–5). Tamsim no, ua ntej uas yuav mus txeeb lub nroog Yelikaus, Yausuas xav tau Vajtswv kev txhawb zog hais tias Vajtswv yuav pub cov Yixalayees kovyeej raws li Nws tau cog lus lawm. Thiab Yausuas kuj yuav tsum nco ntsoov hais tias Vajtswv xwb thiaj yog tus Thawjcoj tiag, hos nws tsuas yog ib tug tub txib, yog ib tug tub rog rau Vajtswv xwb. Thaum Yausuas paub hais tias tus thawj tubrog ntawd yog los ntawm Vajtswv los, nws tus cwjpwm hloov kiag, txo hwjchim thiab mloog Vajtswv lus. Nws txhos caug, nyo hau ti nkaus rau hauv av thiab hais tias: “Tus tswv, kuv yog koj tus tubtxib, koj xav kom kuv ua dabtsi?”
Peb txhua tus yeej tau Vajtswv muab rau nyias ib tes haujlwm sib txawv, tiamsis puavleej muaj tib lo lus samhwm xwb uas yog yuav tsum mus tshaj tawm Txojmoo Zoo rau ib thaj tsam, tsev neeg lossis ib tug twg los rau Vajtswv. Kom lawv tso kev pe dab pe mlom, kev phem kev qias thiab siab qub tseg. Thov tsis txhob ntshai tes haujlwm uas loj dhau, nco ntsoov hais tias Vajtswv yog tus mus ua ntej thiab pab peb. Peb txoj haujlwm tsis yog ntshai lossis cia siab rau peb tus kheej lub zog xwb, tiamsis peb yuavtsum mloog Vajtswv lus thiab hais rau Nws hais tias: “Tus tswv, kuv yog koj tus tubtxib, koj xav kom kuv ua dabtsi?” thiab peb cia li sawv tsees mus raws li Vajtswv txib.
Thov Vajtswv,
Tus Tswv, thov tshem txoj kev txhawjxeeb thiab kev ntshai tawm hauv nyuam yaus thaum nyuam yaus yuav ua ib tes haujlwm loj twg. Thov qhia nyuam yaus paub tias txoj kev ua tsov rog nrog yeebncuab yog koj li, kom nyuam yaus tsuas mloog Koj lus thiab ua raws li Koj lub siab nyiam xwb. Nyuam yaus tuav Tswv Yexus Khetos lub npe thov, Amees.
Peb puas tabtom lossis yuav tau txais ib txoj haujlwm nyuaj twg ntawm Vajtswv? Peb pom yus yuav tsum muaj tus cwjpwm zoo li cas?
Nyeem Vajluskub hauv peb lub xyoos: Xefaniyas 2
Kênh Youtube BHKTHN:
