Klei Aê Diê Blŭ: Klei Mmuñ Hđăp 6:1-10
Êlan kliăng: “Pap mñai kơ kâo, Ơ Yêhôwa, kyuadah kâo jing awăt; Ơ Yêhôwa, bi hlao kâo kyuadah klang kâo ruă. Wăt mngăt kâo rŭng răng snăk” (Klei Mmuñ Hđăp 6:2-3a)
Klei êmuh ksiêm mĭn: Ya klei Mtao Đawit dôk găn leh anăn ya klei čiăng? Hlăm boh klei giăm truh kơ djiê, ya klei ñu ngă leh čiăng msir klei mâo? Ya klei hriăm drei mâo mơ̆ng klei Mtao Đawit kwưh akâo?
Mtao Đawit dôk tŭ lu klei dleh dlan. Ñu dôk đih ti jhưng, ruă bŏ asei mlei, hriêt jih klang kleh, ală mta mmăt mơh,… Kơ ai tiê, ñu ƀuh êgah êmăn, ênguôt hnĭng, êa ală luh, ñu bi msĕ si “jhưng pĭt kâo msah hŏng êa ală” grăp mlam, kyua klei ruă ngă leh anăn klei phung roh arưp kwang dar. Ñu ƀuh msĕ si klei djiê giăm truh ƀiădah Aê Diê ăt dôk kriêp ti anăp klei ñu kwưh akâo. Mngăt ñu rŭng răng đei kyua klei soh hlăm ênuk leh êgao dôk bi êdah. Djŏ mơ̆ klei knap mñai ñu dôk tuôm jing boh jhat mơ̆ng klei soh ñu ngă leh?
Mtao Đawit thâo Aê Diê kpă ênô bi kmhal djŏ mnuih djŏ klei soh. Tơdah Khua Yang bi kmhal djŏ hlue si klei soh grăp čô mnuih, hlei pô dưi dôk ti anăp klei Ñu ngêñ? Wăt tơdah snăn, ñu đăo Khua Yang bŏ hŏng klei pap, ñu knŏng kwưh akâo kơ Khua Yang pap brei kơ klei hdĭp điêt dhiêt, soh jhat leh anăn êdu awăt pô: “Ơ Yêhôwa, đăm ƀuah kâo ôh êjai Ih ăl, kăn bi kmhal kâo rei êjai Ih ngêñ” (êlan 1). Aê Diê jing Pô kpă ênô phat kđi klei soh, Pô bi hlao klei ruă hlăm asei mlei, kơrŭ wĭt mngăt ai tiê leh anăn bi mtlaih ñu kơ klei phung roh tiŏ mdjiê.
Hlăm boh klei giăm truh kơ klei djiê, Mtao Đawit amâo knang kơ hlei yang amâodah sa čô mkăn ôh. Knang kơ ai tiê thâo pap Khua Yang, ñu gĭr, čŏk hia, kwưh akâo leh anăn dôk guôn klei Aê Diê bi mtlaih. Ñu akâo dưi lŏ hdĭp čiăng lŏ dơ̆ng hdơr kơ Khua Yang leh anăn bi mni kơ Ñu (êlan 5). Knhal jih Klei Mmuñ Hđăp mrô 6, ñu mâo Aê Diê bi juh kyua Aê Diê hmư̆ leh, leh anăn wĭt lač klei ñu kwưh akâo. Aê Diê srăng bi mtlaih ñu leh anăn ngă kơ phung roh ñu hêñ.
Hlăm klei ruă duam leh anăn klei phung roh tiŏ, Mtao Đawit nao leh kơ Aê Diê hŏng anak mnuih sĭt pô, amâo mdăp ôh klei huĭ hyưt kơ klei phat kđi, klei êdu awăt hlăm asei mlei, mngăt ai tiê leh anăn mngăt myang. Klei jăk ñu jing đăo knang leh anăn păn kjăp hlăm klei pap prŏng Aê Diê. Ñu jhŏng kwưh akâo kơ Aê Diê pap brei hlăm klei bi kmhal, bi hlao klei ruă leh anăn bi mtlaih ñu mơ̆ng kngan phung roh. Ñu đăo leh, leh anăn thâo kơ klei pap leh anăn klei Aê Diê pap brei bi mtlaih. Dŭm klei Mtao Đawit kwưh akâo jing klei hriăm kơ drei tơdah tuôm hŏng klei truh hlăm klei hdĭp.
Ya klei găn ruă knap, rŭng răng jih hnơ̆ng drei tuôm leh, leh anăn si klei drei ngă?
Wah lač: Ơ Khua Yang, kâo bi mni kơ Ih jing Pô kpă ênô leh anăn bŏ hŏng klei pap. Ih amâo ngă hŏng kâo hlue si klei soh kâo ôh ƀiădah mă klei pap prŏng prĭn snăk bi mtlaih kâo mơ̆ng êrah Khua Yang Yêsu. Akâo kơ Ama bi hlao klei ruă hlăm kâo, đru kâo găn jih klei ktrŏ hlăm klei hdĭp leh anăn bi mrâo klei bi mguôp kruh leh kâo hŏng Khua Yang leh anăn hŏng pô mkăn. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Bi Êdah 18
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
