Klei Aê Diê Blŭ: I Y-Timôthê 6:1-2
Êlan kliăng: “Brei jih jang dôk ti gŭ knông jing hlŭn yap phung khua diñu năng kơ jih klei mpŭ, čiăng kơ arăng amâo dlao wač ôh kơ anăn Aê Diê leh anăn kơ klei mtô klei đăo” (I Y-Timôthê 6:1)
Klei êmuh ksiêm mĭn: Si knuih Khua ƀĭng kna Y-Pôl mtô kơ phung hlŭn đăo kơ Aê Diê brei ngă hŏng khua pô? Ya ngă? Si knuih leh anăn ai tiê mnuih mă bruă jing phung đăo hruê anei brei mâo?
Hlăm ala mtao Rôm ênuk Klei Bi Mguôp Mrâo, ênoh phung hlŭn jing lu snăk. Klei hâo hưn mrâo mrang jăk bi mtlaih mơ̆ng Klei Mrâo Mrang Jăk iêô jak diñu lu snăk, leh anăn lu phung hlŭn đăo leh kơ Aê Diê. Khădah snăn, bruă kčah kơ diñu leh đăo kơ Aê Diê jing: leh thâo kral leh Khua Yang Yêsu, diñu jing mtăp mđơr kơ ênoh yuôm hŏng ayŏng amai adei hlăm gŏ sang klei đăo, diñu srăng dưi hrăm mbĭt mă bruă kơ Aê Diê hŏng khua pô đăo kơ Aê Diê hlăm sa Phung Sang Aê Diê, snăn si knuih brei diñu mâo hŏng pô khua anăn?
Khua ƀĭng kna Y-Pôl mtô, hŏng phung khua đăo leh kơ Aê Diê wăt phung khua ka đăo kơ Aê Diê, phung hlŭn brei “mpŭ” sơăi kơ diñu. Hŏng phung khua ka đăo kơ Aê Diê, brei phung hlŭn “yap phung khua diñu năng kơ jih klei mpŭ” (êlan 1-2). Ênưih snăk kơ sa čô hlŭn đăo leh kơ Aê Diê ƀuh hơĭt ai tiê kyua pô ruah leh klei jăk hĭn kơ klei hdĭp lă lar, mơ̆ng anăn atăt kơ klei mđĭ kơ pô, dlăng hơăi mang kơ khua pô, jing klei srăng ngă kơ arăng dlao wač kơ anăn Aê Diê leh anăn kơ klei mtô klei đăo (êlan 1).
Tơdah drei đăo kơ Aê Diê, drei thâo săng pô mtăp mđơr kơ ênoh yuôm hŏng pô mkăn, drei amâo hơăi mang hĭn kơ khua amâodah phung mâo bruă prŏng hlăm ala ƀuôn ôh. Mơ̆ng anăn, drei amâo kkui kŏ, nao lia, kăn dưm pô ti dlông hĭn kơ pô mkăn, ƀiădah jhŏng hdĭp sĭt hŏng drei pô mâo leh klei bi tui. Khădah snăn, bruă klam leh anăn bruă hlăm ala ƀuôn drei amâo bi mlih ôh, drei ăt jing mnuih mă bruă kơ khua. Klei čiăng brei drei bi mlih jing knuih drei tơdah ngă bruă klam hlŭn, kyua ară anei, drei jing pô bi ala kơ “anăn knăl leh anăn klei bhiăn Aê Diê (êlan 1) ti anăp phung ka đăo.
Tơdah khua jing mnuih đăo kơ Aê Diê, lu phung hlŭn tŭ klei arăng mplư mjhua klei bi mguôp ayŏng adei sa klei đăo leh anăn akâo kơ khua srăng kăp đru, mâo klei pap mdê hjăn kơ pô, mơ̆ng anăn ngă bruă ngơi mang. Klei đăo amâo djŏ jing mta phŭn čiăng alah amâodah amâo mpŭ ôh ƀiădah jing klei mđĭ ai čiăng hdĭp bi hmô. Kyua anăn, hŏng phung khua đăo kơ Aê Diê, phung hlŭn amâo djŏ knŏng mpŭ ôh ƀiădah “brei diñu mă bruă kơ khua diñu jăk hĭn” (êlan 2).
Hruê anei, drei ăt dưi ngă mnuih mă bruă kơ khua ka đăo amâodah khua jing phung đăo. Wăt tơdah mă bruă kơ hlei pô dưn, phung mă bruă jing phung đăo brei hdơr mpŭ kơ khua, mă bruă jih ai tiê “msĕ si mă bruă kơ Khua Yang, amâo djŏ kơ mnuih ôh” (Kôlôs 3:23). Kyua anăn, Anăn Aê Diê mâo klei mpŭ mni hlăm ai tiê leh anăn knuih drei mă bruă.
Drei ƀuh brei pô bi mlih ya knuih hŏng khua pô?
Wah lač: Ơ Khua Yang, kâo bi mni lač jăk kơ Ih brei mâo bruă knuă mă. Akâo kơ Ih đru kâo mpŭ kơ khua kâo hlăm klei blŭ, knuih leh anăn ai tiê bruă klam, čiăng Anăn Ih mâo klei guh kơang hlăm bruă kâo ngă. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Bi Êdah 13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
