I Timôthê 5:21-25
“Ih ‘nĕ kơ hăt-hot pel kơ̆l krao khan kơ đe wă ăn kơ đe wei-lăng bơngai lui. Ih athei gô pơlong lăng sư đunh ‘mơ̆i.” (I Timôthê 5:22a)
Nơ̆r jet tơchĕng pơwao:
– “Pel kơ̆l” lăm trong 22 wă khan kiơ?
– Yua kơ ‘bok Pôl bơtho Timôthê “’nĕ kơ hăt hot krao khan pel kơ̆l kơ đe”?
– Lu bơ̆n yua iŏk thoi yơ lăm tơdrong rơih chă bơngai jang lăm Khul Bơngai Lui?
‘Bok Pôl chih kơthơ tơgŭm Timôthê bơngai bơtho oei moh dôm tơdrong kăl lăm tơdrong pơgơ̆r chông anhăk bơngai lui. Adrol kơ ‘noh, sư đei bơtho gah tơdrong athei pơm ‘lơ̆ng hăm lu kră wei lăng bơngai lui jơ̆ bơngai bơ̆jang kơ Kră Yang hơdai bơ̆n. Kư̆m dai pơ’lơ̆ng mưh wă hơlen tơdrong khă găn dah ming hơmet. Nơ̆r ‘Bok Kei-Dei lăm năr ‘nâu, Sư bơtho “’Nĕ kơ hăt hot pel kơ̆l krao khan kơ đe” (trong 22).
Pơtrơp lăm tơdrong lu kră wei lăng ‘noh hei, lei nơ̆r pơma “Pel kơ̆l” bơ̆n hlôh kiơ̆ thoi nơ̆r khan tơbăt pôk ăn tơdrong jang, pơjao ăn tơdrong jang kơ minh ‘nu bơngai lăm tơdrong jang awih awăn kơ Kră Yang. ‘Nâu bơih tơdrong kăl dêh tơpă, đei ‘Bok Kei-Dei, Kră Yang Yêsu păng lu linh jang ‘lơ̆ng lăng ‘bôh. Thoi noh, ‘nĕ kơ lăng tơdrong ‘nâu juăt kơ jang mălei tơdrong jang ‘noh tơdrong jang gah bơhngol. Ih athei pơ’lơ̆ng, ‘nĕ kơ hăt hot. Adrol kơ ‘noh, kơplah ‘bok Pôl bơtho gah lăm lu ‘bok bơtho, kră wei lăng, na sư đei pơkă: “Iĕm athei pơlong lăng sư ‘mơ̆i. Dah sư jang ‘lơ̆ng na iĕm ăn kơ sư jang ling lang.” (I Timôthê 3:10).
Athei pơ’lơ̆ng, ‘nĕ kơ lăng minh ‘nu bơngai hloh kơ bơngai nai (trong 21). Minh ‘nu bơngai jang lăm teh đak kư̆m kăl kơ tơdrong jang ‘lơ̆ng thoi yơ, lei na pơma kiơ kơ bơngai lui wă jang lăm hnam akŭm, athei kăl lăng ming pơnhen rai hloh dơ̆ng. ‘Bok Pôl bơtho kơ Timôthê lăm trong 24-25, athei pơ’lơ̆ng lăng hơlen ming lăm tơdrong arih pơm ‘lơ̆ng, adrol kơ wă pel kơ̆l krao khan. Khul Bơngai Lui kăl kơ hlôh wao păng wă kơ Yang Bơhngol ‘Lơ̆ng chông anhăk, rơih chă lu bơngai bơ̆jang. Krê hơmơt dêh dah hăt hot pel kơ̆l krao khan kơ minh ‘nu bơngai tam mă đei đon lui kơjăp, minh ‘nu bơngai ưh kơ hlôh wao, dah mă minh ‘nu bơngai arih ưh kơ pơm ‘lơ̆ng lăm tơdrong jang pơgơ̆r. Păng krê hơmơt hloh dơ̆ng dah bơngai pơgơ̆r lăng minh ‘nu bơngai hloh kơ bơngai nai lăm tơdrong pel kơ̆l krao khan, dah yua jên tơmam, tơdrong jang.
Tơdrong bơ̆jang lăm hnam akŭm ưh kơ trŏ trăp pơmat lăm tơdrong pơjing, tơdrong pơgơ̆r mălei ‘noh lăm tơdrong pơjing, tơdrong pơgơ̆r, mălei ‘noh tơdrong hiơ̆k gah bơhngol ‘bơ̆t anăp Kră Yang ‘Bok Kei-Dei. Timôthê minh ‘nu ‘bok bơtho athei pơ’lơ̆ng lăng pơnhen hơlen lăm chăl arih, đon lui păng jơhngơ̆m bơngai mă Kră Yang rơih. Dôm tơdrong pơkă lăm tơdrong jang kơ Kră Yang tă kơ ‘bơm lăm chăl arih gah bơhngol bơngai nai păng ‘bơm akâu bơ̆n kơdih, Pôk đei pơma hơđăl: “Ih ‘nĕ kơ hăt-hot pel kơ̆l krao khan kơ đe wă ăn kơ đe wei-lăng bơngai lui. Ih athei gô pơlong lăng sư đunh ‘mơ̆i. Dah ih hơloh pel kơ̆l krao khan kơ sư, na sư ưh tam tơchĕng đon hơdrol noh, hli kơ sư pơm yoch ning-mônh, dang lĕ ih athei sư pơm yoch. Ih athei pơm ‘lơ̆ng tơpăt ling lang.” (trong 22). Wă khan ih athei bơwei arih ‘lơ̆ng rơgoh, ‘nâu kư̆m dai hơnă wă kơ ih huay “hăt hot dan ti ih”. Ahrei âu, hnam akŭm ngăl kơ’bah kơ bơngai bơ̆jang, mălei ưh kơ trŏ kơ yua kơ tơdrong noh na hăt hot pel kơ̆l krao khan, ưh kơ đei tơchĕng tôm. Apinh Kră Yang ăn kơ rim ‘nu lu bơ̆n ‘bôh hiơ̆k bơngơ̆t lăm tơdrong rơih chă bơngai wei lăng bơ̆jang lăm hnam akŭm.
Ơ Kră Yang, apinh Ih ăn kơ bơngai pơgơ̆r lăm hnam akŭm kư̆m thoi lu nhôn đei tơdrong gơh hơgei păng pơ’lơ̆ng lăm tơdrong rơih chă bơngai bơ̆jang. Wă kơ Khul Bơngai Lui đei tơiung dih băl, chăl arih gah bơhngol gơh wơ̆ ‘lŏ, păng lơ bơngai gơh klaih. Krao khan yua anăn Kră Yang Yêsu Krist, Amen.
Lu bơ̆n hăm pơ’lơ̆ng lăm tơdrong rơih chă bơngai bơ̆jang lăm hnam akŭm ưh?
Đŏk Sơ̆p hla bơar ‘Bok Kei-Dei lăm pêng sơnăm: Tơdrong Tơ’bôh 12
Kênh Youtube BHKTHN:
